拉丁文: 羅曼語種

拉丁文，原本係喺而家意大利半島上邊，一個小地方拉丁山（今日屬羅馬）裏面，古代拉丁人嘅話。拉丁人之中一班人起咗個城市叫做羅馬。後尾，由於喺嗰個地方興起嘅羅馬共和國同埋羅馬帝國統治晒成個地中海地區，因此拉丁文成為咗成個地區共通話。羅馬帝國雖然喺公元5世紀滅亡，但係之後喺歐洲有好大影響力嘅羅馬天主教會，都將拉丁話作為佢嘅官方話。因此成個中世紀同埋之後到18世紀，成個歐洲嘅上層人士亦都用拉丁文交流。而家，雖然淨得梵蒂岡一國仍然用拉丁話，但好多學術用語例如生物學同法律入便都有用拉丁文做字。

印歐語系入邊嘅一個大語族－－羅曼語族，亦都係嚟自拉丁話，其中包括好多人都用緊嘅法文、西班牙同意大利文。

拉丁話主要係用拉丁字母寫。

拉丁話威望好高—拉丁文唔單只係羅馬帝國嘅官方語言，而且羅馬教會一路都係用拉丁文做神學討論嘅，但估計到咗大約 7 世紀（中世紀上半橛）各羅曼語言已經演變到同拉丁文冇互通能力，而英文同德文等嘅日耳曼語言更加由頭到尾都唔係拉丁文嘅語言後裔，即係話拉丁文唔再係任何人嘅母語；不過話晒羅馬教會成日用拉丁文，令到拉丁文喺西歐廣泛噉畀人攞嚟寫嘢，尤其係啲學術性質嘅嘢傾向係用拉丁文嚟寫嘅。就算到咗中世紀後，歐美等地嘅人寫「正經嘢」嗰陣依然成日用拉丁文。形成雙層語言嘅情況。