菲律賓: 東南亞一國

菲律賓共和國 Republika ng Pilipinas（菲律賓話） Republic of the Philippines（英文）
通稱：菲律賓、 菲國或者菲島
旗 徽
格言：Maka-Diyos, Maka-tao, Makakalikasan at Makabansa  （他加祿文） 「為咗上帝，人民，自然，同祖國」
國歌：《親愛嘅土地》
屬地（實轄）
幅員 國土：299,764平方公里（世界第72名） 水域：0.61%
首都	馬尼拉
最大城市	奎松市
至高地	阿波火山（2,954公尺）
至大湖	貝湖
海岸線長	36,289公里
時區	UTC+8
國民
人數	以下係2019年嘅估計數字 人數：107,225,000（世界第13名） 人口密度：343.13/km2（世界第43名）
官方語言	菲律賓話、英文
民族	維薩亞人（33.8%） 他加祿人（27.7%） 伊洛克人（英文：Ilocano people）（9.8%） 比科爾人（6.8%） 摩洛人（5.1%） 邦板牙人（英文：Kapampangan people）（3.1%） 邦阿西楠人（英文：Pangasinan people）（1.4%%） 華人（1.2%） 三寶顏人（1.1%） 其他種族（英文：Ethnic groups in the Philippines）（8.8%）
主要宗教	天主教、基督新教、伊斯蘭教
曆法	公曆
主要節日	濯足節：4月9號 獨立日：6月12號 （自西班牙獨立） 國家英雄日：8月31號 聖誕節：12月25號 黎剎日：12月30號
行車方向	靠右行駛
家用電源 電壓：220 V 插座：A、B
政制
國家結構形式	單一制
國家政權	菲律賓國會
政制	總統制下議會為立法機關嘅共和國
法律體系	以英美法系為基礎嘅普通法國家
主要領袖 國家元首（總統）：小馬可斯 政府首腦（副總統）：莎拉·杜特地
經濟
GDP（購買力平價） 以下係2016年嘅估計數字 總計：8,019.02億美元（第29名） 人均：7,696美元（第117名）
GDP（國際匯率） 以下係2016年嘅估計數字 總計：3,116.87億美元（第36名） 人均：2,991美元（第122名）
HDI 以下係2018年嘅估計數字 ▲0.712（第106名）－高
中央銀行	菲律賓中央银行
貨幣	菲律賓披索（PHP）
堅尼系數	0.458
資訊
立國歷史 立國日期：1946年7月4號 （完全由美國獨立） 立國事件：宣布由西班牙獨立（1898年6月12號）
國家象徵	國花：茉莉花 國樹：納拉樹 國石：珍珠 國鳥：菲律賓鷹
國家代碼	PHI
國際域名縮寫	.ph
國際電話區號	63
現役軍人數	113,000（第40名）

菲律賓（粵拼：fei1 leot6 ban1；菲律賓話：Pilipinas；英文：The Philippines），全名菲律賓共和國（fei¹ leot⁶ ban¹ gung⁶ wo⁴ gwok³）（菲律賓話：Republika ng Pilipinas，簡稱RP；英文：Republic of the Philippines），又繙飛獵邊（fei¹ lip⁶ bin¹），係東南亞一國，首都馬尼拉。佢全國都係島，有成七千六百四十一個，有千島之國之稱，面積大約三十萬平方千米。舊時廣東叫佢呂宋（leoi⁵ sung³），由佢最大島呂宋島Luzon而名。連佢舊時宗主國西班牙都叫大呂宋，所以相反來講，菲律賓舊時亦叫小西班牙（siu² sai¹ baan¹ ngaa⁴）。

菲律賓以海為界，東爲太平洋有帛琉，南有印尼同馬來西亞，西同北爲南海有中華人民共和國，北爲巴士海峽有中華民國台灣。

• 1521年，航海家麥哲倫發現菲律賓羣島。
• 1565年，宿霧島俾嚟自墨西哥嘅西班牙人霸咗，菲律賓開始俾西班牙統治。
• 1898年，爆發美西戰爭；6月12號菲律賓宣告獨立，成立菲律賓共和國。之後西班牙打輸，簽咗「巴黎和約」，美國接收菲律賓，菲律賓改由美國統治。
• 1935年3月24號，菲律賓建立菲律賓自治邦；第二次世界大戰期間俾大日本帝國霸咗（1942年-1945年），大日本帝國霸咗菲律賓之後，成立傀儡政權菲律賓第二共和國。
• 戰後嘅1946年7月4號，菲律賓獲得完全獨立。

而家總統係菲律賓民主黨–人民力量嘅杜特地，副總統係林麗妮，佢哋喺2016年6月上任。

民族

構成菲律賓嘅民族主要包括他加祿人、伊洛戈人、邦班牙人、米沙鄢人同埋比科爾人。少數民族包括中國人、印度人、阿拉伯人、西班牙人同埋美國人。

人口

2008年估計全國人口大約有 9200 萬。

宗教

根據2000年普查，菲律賓主要宗教係羅馬天主教，大概有 80.9% 嘅國民信。

官方語言

菲律賓嘅官方語言係菲律賓話同埋英文。

標準時間

菲律賓晌第二次世界大戰之後，1950年代至1970年代之間，同日本、緬甸同屬亞洲最有錢國家之列；而家係新興工業國家同埋世界嘅新興市場之一。2006年，菲律賓俾世界銀行依購買力平價列為第36大經濟體。

菲律賓嘅經濟結構以農業同埋工業為主，尤其著重食品加工、紡織成衣同埋電子、汽車組件等輕工業。大部分嘅工業集中晌馬尼拉大都會嘅市郊。另外，宿霧大都會亦成為吸引外國同埋本地投資嘅另一個地點。菲律賓嘅礦業有好大嘅潛力，有大量儲備嘅鉻鐵礦、鎳同埋銅。近來晌帕拉灣外島發現嘅天然氣，都係菲律賓豐富嘅地熱、水力同埋煤炭等能源儲備嘅一部分。

菲律賓所得大約係 1455 美元（2007年），算發展中國家，但係貧富差距好大；首都馬尼拉係國際購買力城市排第廿四。

貨幣名叫做菲律賓披索（Peso）。

海外勞工

呢幾十年嚟菲律賓經濟都唔係咁好，之不過菲律賓做美國殖民地嗰陣，普遍英文能力好，菲律賓人係國際流動性最高嘅人民之一，菲律賓海外勞工（Overseas Filipino Worker，OFW）世界知名。年年有差唔多一百萬人晌外國做嘢，二零零五年佢地匯返返國嘅錢，將近一百億美元。呢個銀碼排晌印度、中國、墨西哥、法國後便，係世界第五。不過由國內生產總值嚟睇，呢個數字佔生產總值13.5%，係前五國之中比例最高嘅，亦係菲律賓嘅經濟同埋幣值嘅支持。

旅遊業

菲律賓有全球最正嘅海灘同埋潛水嘅地方，2009年又開咗世界級賭場與度假村，令旅遊業成為菲律賓經濟嘅重要支柱，就講香港，平均每年都有大約十四萬人去嗰便遊埠。

菲律賓政府以振興旅遊業做主要政策目標之一，政府嘅措施包括增強基礎設施建設，提高旅遊產品品質，整合自然、歷史同埋文化資源，鼓勵私人投資酒店設施，爭取地方政府支持，同埋積極推銷等等，從而想旅遊業幫手開好多工做同埋收入。

其中，菲律賓嘅主要目標係東亞遊客。2001年，菲律賓移民局為咗吸引遊客，同中華人民共和國外交部同旅遊部協議，放寬對中國公民申請去菲律賓嘅簽證嘅規定。 到咗2010年1月至4月，東亞地區嘅遊客已經佔菲律賓遊客總人數嘅42%。

2008年就吸引咗314萬旅客去遊埠。

2010年，嗰陣時嘅旅遊部長阿爾韋托林宣佈之後6年旅遊業發展目標，主要包括實現年抵達遊客600萬人次，創造旅遊業收入187億美元，創造300萬個新嘅就業職位。

• 菲律賓旅遊大使（香港）：江若琳（2007年）
• 菲律賓旅遊親善大使：阿布
• Department of Tourism Main Portal
• 菲律賓
• 菲律賓觀光部-台灣分處

• 日本同菲律賓晌1956年7月建交。
• 中華人民共和國同菲律賓晌1975年6月9號建交。
• 而家嘅外長係羅慕洛（Alberto Romulo）。

菲律賓政治長期動蕩、貧富懸殊，搞到社會秩序立立亂，成日有綁架。綁架案又多，參與嘅人又多，手段又惡劣，令菲律賓有「亞洲綁架之都」嘅惡名。綁匪除咗綁本國有錢人，重綁美國、歐洲、法國、南韓等國家嘅人。近來特別針對華僑、華人同埋去菲律賓嘅中國人，首先因為華人同埋菲律賓人之間兩極分化明顯；加上華人唔信警察，一旦發生咗綁架事件往往願意「私了」，寧願使錢了事。

而國內非法組織都當咗綁架係揾錢同埋打擊政府嘅最佳途徑。例如伊斯蘭恐佈主義組織阿布沙耶夫就策動過好多單綁架事件，甚至試過晌2000年越境去到馬來西亞綁架外國旅客卅幾人，勒取贖金。唔少國家同埋地區對菲律賓有旅遊警告（例如香港，睇馬尼拉人質事件）。亦有旅遊網站警告去菲律賓嘅旅客小心嗰度嘅罪案問題。