羅馬數字

羅馬數字一共有七個，即 I（1）、V（5）、X（10）、L（50）、C（100）、D（500）同埋 M（1000）。有套規則寫晒正整數。羅馬數字冇「0」。一般認為羅馬數字只用來記數，唔係運算。

譬如今年係2024年，用羅馬數字寫就係「MMXXIV」。

另一個成日見羅馬數字嘅地方就係鐘面或者錶面，例如右圖，用嚟表示時間嘅一至十二分別寫做：

I, II, III, IV, V, VI, VII, VIII, IX, X, XI, XII

• 重複：數字I、X、C、M重複幾次，就係佢嘅幾多倍。例如I係1，III就係3；C係100，CC就係200。
• 大到細係加，細到大係減：
  • 喺大啲嘅數字右邊寫細啲嘅數字，就係大加細。例如VI就係5+1=6。
  • 喺大啲嘅數字左邊寫細啲嘅數字，就係大減細。例如IV就係5-1=4。
  • 左減嘅數字只可以係I、X、C。例如45要寫XLV，唔可以寫VL。
  • 左減嘅數字唔可以超過一個位值，即係V、X可以減I，但係L、C就唔可以減I。例如99要寫XCIX（[100-10]+[10-1]），唔可以寫IC（[100-1]）。
  • 左減嘅數字只可以一位。例如8係VIII，唔可以寫IIX。
  • 右加嘅數字最多三位，四位就轉做左減，例如14就係XIV，唔可以寫XIIII。（有例外，睇下面）
• 加線乘一千：
  • 喺羅馬數字嘅上方加條線，或者加個下標M，表示將個數字乘1000。
  • 同樣道理，上方加兩條線，就係乘1000000=1000²。
• 另外，亦都有5同50寫做IIIII同XXXXX，代替V同L，甚至6同60寫做IIIIII同XXXXXX，代替VI同LX嘅情況。

例外

• 四有時會寫IIII，唔寫IV，坊間有傳係因為IV係古羅馬神話主神朱庇特（IVPITER，古羅馬字母無J同U）嘅頭兩個字母，所以避諱，另一種講法係喺鐘錶上面四嘅另一便係八（VIII），寫IV會搞到個設計唔對稱，所以寫IIII，而事實上IIII係英式手寫傳統。
• 喺大細楷羅馬數字未分家之前，排版嗰陣大楷標題會用大楷羅馬數字，細楷內文用細楷羅馬數字^:46。
• 喺英式手寫傳統，以前寫細楷i字尾嘅羅馬數字，最尾一個i會寫j，例如四係iiij，唔係iv。