مانگرتنی گشتیی ٢٠١٨ی ڕۆژھەڵاتی کوردستان

بەھۆی بەربڵاوی و پەیامە ڕوون و ئاشکراکەی کە گەیاندی، ئەو مانگرتنە بە ڕێفراندۆم ناوی لێ دەبردرێ.

بەرەبەیانی ڕۆژی شەممە ١٧ی خەرمانانی ١٣٩٧ی کۆچیی ھەتاوی سێ بەندکراوی سیاسیی کورد بە ناوەکانی زانیار مورادی، لوقمان مورادی و ڕامین حوسێن پەناھی لە زیندانی ڕەجایی شاری کەرەج لەلایەن کۆماری ئیسلامیی ئێرانەوە لە سێدارە دران؛ چەند کاتژمێر دواتر، پێش نیوەڕۆی ھەمان ڕۆژ سپای پاسدارانی شۆڕشی ئیسلامی ھێرشی مووشەکی کردە سەر بنکەکانی حیزبی دێموکراتی کوردستانی ئێران (حدکا) و حیزبی دێموکراتی کوردستان (حدک) و کارەساتی ١٧ی خەرمانان ڕوویدا.

ناوەندی ھاوکاریی حیزبەکانی کوردستانی ئێران لە ڕاگەیەدراوێکدا داوای لە خەڵکی ڕۆژھەڵاتی کوردستان کرد بۆ مەحکوومکردنی ئیعدامی سێ لاوی کورد و پیلانی تیرۆرستی و پەلاماری مووشەکی ھێزێکی سیاسی لە خاکی ھەرێمی کوردستاندا، لەژێر دروشمی «من کەرامەتی نەتەوەییم دەپارێزم و لە ماڵ نایەمە دەرەوە» مان بگرن و دووکان و بازاڕ دابخەن.

• زیاتر لە ٢١ شاری ڕۆژھەڵات وەکوو: ورمێ، بۆکان، مەھاباد، کرماشان، سنە، شنۆ، سەوڵاوا، سەردەشت، پیرانشار، پاوە، سەرپێڵ، کەنگاوەر، سەلاس، جوانڕۆ، کرماشان، سەقز، دێولان، قوروە، دیواندەرە، بانە و مەریوان بەرەوپیری مانگرتنەکە چوون و لە ماڵ مانەوە و شەقام و بازاڕیان چۆڵ کرد.
• لە زۆربەی وڵاتە ئەورووپاییەکان لەبەر دەرکی سەفارەتی ئێران خۆپێشابدان بەڕێوەچوو.
• لە باشووری کوردستانیش لەبەر دەرگای نەتەوە یەکگرتووەکان خەڵک ناڕەزایەتییان دەربڕی.

• ناوەندی ھاوکاریی حیزبەکانی کوردستانی ئێران سپاسی بەشداریی جەماوەری خەڵکی کرد.
• خەڵک خۆشحاڵیی خۆیان لە سەرکەوتنی مانگرتنەکە دەربڕی.
• ڕووداوەکە لە میدیا جیھانییەکان دەنگی داوە.

کاردانەوەی ئێران

• ڕژیمی ئێران بە بابگھێشتکردن و تەلەفۆن پەیوەندی بە بازاڕییان و خاوەن پیشەکانەوە کرد کە بێتوو بەشداری لەم ناڕەزایەتییەدا بکەن مۆڵەتیان لێ دەستێندرێتەوە.
• دواتریش ھەوڵی دا لە ڕێگەی فیلمھەڵگرتنەوە و ڕەنگکردن، دووکانە داخراوەکان دیاری بکات و بەم شێوەیە ھەڕەشە لە دووکانداران بکات.
• ھەروەھا ھەوڵی دا بە زۆرەملی ھەندێک دووکان بکاتەوە.
• ناوەندە ئەمنییەکان ھەر لەو پەیوەندییەدا زیاتر لە ٤٠ ھاووڵاتی مەدەنییان لە شارە جیاجیاکان دەستبەسەر کرد و بۆ شوێنێکی نادیار ڕایگوێزتن؛ دەیان چالاکی مەدەنی دیکەشیان بۆ لێپرسینەوە بانگ کرد.