Zoliswa Nkonyana

Zoliswa Nkonyana († 4 Februarie 2006, Kaapse Metro) was 'n jong Suid-Afrikaanse vrou wat vanweë haar seksuele oriëntering wreedaardig deur 'n Swart gepeupel vermoor is.

Nkonyana, 'n 19-jarige vrou uit die Swart dorpsgebied Khayelitsha, was saam met haar vriendin op pad huis toe toe hulle deur 'n skoolmeisie as tomboys gesmaad is wat graag "verkrag" sou wou word. Die twee jong vroue is daarna deur 'n gepeupel van jong Swartmans omsingel. Terwyl Nkonyana se vriendin kon ontvlug, is Nkonyana met gholfstokke geslaan, met bakstene bestook en met messe gesteek. Sy is kort daarna in 'n hospitaal oorlede. Sowat vierhonderd mense het haar begrafnis bygewoon, en die Swart dorpsgebied Gugulethu se eerste gay pride-betoging het op 19 Februarie ter ere van Zoliswa plaasgevind. Volgens plaaslike nuusberigte is ses mans in hegtenis geneem en van moord aangekla.

Die moord het skerp reaksie in veral die Verenigde State uitgelok. Die menseregte-organisasie Human Rights Watch het 'n beroep gedoen op die Suid-Afrikaanse regering om teen die skuldiges op te tree. Alhoewel die land se nuwe grondwet die eerste wêreldwyd was wat mense teen seksuele diskriminasie beskerm, word volgens mensereg-aktiviste veral Swart en Bruin lesbiese vroue in Suid-Afrika slagoffers van seksistiese geweldpleging soos verkragting.

• Human Rights Watch News: Moord werp lig op geweldpleging teen lesbiese vroue in Suid-Afrika
• Kaapstad se Triangle Project kritiseer tradisionele Swart leiers se haatspraak teen LGBT-gemeenskappe Geargiveer 27 September 2007 op Wayback Machine
• Amnesty International LGBT Concerns - Suid-Afrika: Trots en vooroordele
• International Federation of Black Prides (VSA): Gay-wees in Suid-Afrika Geargiveer 13 Augustus 2007 op Wayback Machine