Lions-Klubs

Die vereniging het in 1917 in Chicago begin. Op inisiatief van die destydse burgemeester van Kaapstad, kol. J.W.L. Billingham, is die eerste Lions-klub in Suider-Afrika op 14 Oktober 1957 gestig. Klubs is later tot in Namibië, Lesotho en Swaziland gevorm.

Lidmaatskap van ‘n klub kan slegs op uitnodiging verkry word. Gewoonlik het ‘n klub nie meer as twee lede van ‘n bepaalde beroepsgroep nie. Dit is om te sorg dat ‘n klub se lede ‘n weerspieëling is van die beroeps- en sakelewe van sy gemeenskap. Die organisasie staan los van enige politieke of godsdienstige betrokkenheid.

Die naam Lions is ‘n akroniem vir Life in Our Neighbours’ Service. Dit beteken die klubs probeer om daar waar die lede woon diens aan hul minderbevoorregte medemens te lewer en sodoende ‘n beter samelewing op te bou. Daarom is hul leuse Ons Dien.

Die meeste ondersteuning gaan na mediese sorg: mobiele oogklinieke, bestryding van suikersiekte en steun aan invalides. Verder word hulpbehoewende instansies soos hospitale, klinieke, openbare swembaddens, sportklubs en speelskole in arm gemeenskappe ondersteun. In Suid-Afrika het die Lions-klubs vir MedicAlert sterk gesteun. Die lede organiseer fondsinsamelingsprojekte om hul steun te kan gee.

Vir lede tussen die 20 en 35 jaar oud bestaan die Leo-klubs. Leo is ‘n akroniem vir Leadership, Experience, Opportunity.

• Rotariërs

• lionsclubs.org
• lionsclubs.co.za