Electrocompaniet is 'n Noorse vervaardiger van gesofistikeerde oudio-toerusting wat in die vroeë 1970's deur Per Arild Abrahamsen gestig is.
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Die onderneming het aanvanklik onder meer luidsprekers vervaardig, maar dit staan veral bekend vir sy sogenaamde Otala-versterker, die eerste industrieel vervaardigde effekversterker ter wêreld wat vry van kortstondige intermodulasie of klankverwringing was.
In 1970 het die Finse ingenieur Matti Otala, wat destyds aan die Universiteit van Uleåborg (Oulu) verbonde was, die resultate van sy baanbrekende navorsing oor versterker-tegnologie gepubliseer. Aanvanklik het sy werk min belangstelling by deskundiges gewek. Die prentjie het eers begin verander toe hy in 1973 'n voordrag oor kortstondige intermodulasie (Engels: transient intermodulation, TIM) by 'n byeenkoms van die Amerikaanse Audio Engineering Society (AES) gelewer het.
Een van die kongresgangers was die Noorse klanktegnikus Svein Erik Børja. Børja was soos baie ander musiekliefhebbers in dié tyd ontevrede met die klankgehalte van nuwe transistorversterkers wat dikwels as hard en metalliek beskou is. Ná die konferensie het hy Abrahamse in hierdie verband gekontakteer, en hulle het besluit om saam met Nils Jørgen Kjærnet, 'n medewerker van die Noorse onderneming Nera, 'n versterker volgens Otala se spesifikasies te ontwikkel.
Toe met die vervaardiging van die nuwe versterker begin is, is dit The 2 Channel Audio Power Amplifier genoem. Die produk het gunstige reaksie by deskundiges in Noorweë en in die buiteland uitgelok en 'n goeie reputasie aan Electrocompaniet besorg. Aangesien die tegnologie op Matti Otala se navorsing berus het, is na die versterker in die omgangstaal dikwels as "Otala-versterker" verwys. Die onderneming het sy produksieprogram vervolgens uitgebrei, waarby die meeste produkte uitgevoer is.
Nadat dit sowat dertig jaar in die hoëtroubedryf besig was, het Electrocompaniet ekonomiese moeilikhede ondervind en uiteindelik in 2004 bankrot gespeel. Dit is deur WestControl, 'n onderneming uit Stavanger, oorgeneem wat nuwe kapitaal beskikbaar gestel en Electrocompaniet weer aan die gang gekry het.
This article uses material from the Wikipedia Afrikaans article Electrocompaniet, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.