Abercrombie Robinson

Weens goeie militêre dissipline het geen opvarende van die troepeskip in die ramp omgekom nie.

Die seilskip Abercrombie Robinson van ongeveer 1 400 ton is in 1825 in Londen as 'n passasierskip vir Somes Joseph, 'n direkteur van die Britse Oos-Indiese Kompanjie, gebou. Op 2 Junie 1842 het dit die Kingstown-hawe by Dublin op pad na die Kaapkolonie onder bevel van die jong kaptein John Young verlaat. Aan boord was meer as 600 Britse soldate wat aan die Kaapse grensoorloë sou deelneem. Ook was daar 80 vroue en kinders as passasiers.

Op die reis van drie maande via Madeira na die Kaap die Goeie Hoop het verskeie passasiers tifus en skarlakenkoors opgedoen. Daarom het die skip Tafelbaai in plaas van die gebruiklike Simonsbaai binnegevaar. In die baai anker die skip te ver van die normale plek en dus te na aan die strand. Weens die kwaai wind kon die skip daarna moeilik veilig na die beter ankerplek verskuif. Vroeg in die oggendure van 28 Augustus steek 'n noordwesterstorm op gepaardgaande met donderweer en stortreën. Die ankertoue breek, die skip strand by die mond van die Soutrivier en die skip breek op. Weens die voortreflike leiding van die jong kaptein en sy goeie invloed op die jong soldate verloop die ontruiming vinnig en vlot. Enkele ure later in die oggend is eers besef dat die Waterloo ook dreig om te vergaan. Die ander 20 skepe in Tafelbaai het geringe skade opgeloop omdat hulle op die meer beskutte ankerplekke gelê het.

Dikwels word die ramp met die Birkenhead voorgehou as 'n voorbeeld van soldate se heldhaftige optrede en onderdanigheid aan militêre dissipline in 'n gevaarsituasie. Om dieselfde redes was daar aan boord van die Abercrombie Robinson ook geen panieksituasie nie. Dit was juis hierdie dissipline wat die verkeerde bevel om die skip nie te verlaat nie afgedwing het, wat die groot lewensverlies by die Birkenhead-stranding veroorsaak het. Dieselfde bevel, maar korrek gegee, het al die passasiers van die Abercrombie Robinson gered.

• Die wrak van die Abercrombie Robinson lê onder die ingepolderde grond in Kaapstad se strandgebied.
• In 1986 is die skeepsklok by die kerk van die NG gemeente Caledon teruggevind.
• In die Africana Museum is 'n skildery deur 'n onbekende kunstenaar wat die rampe van die Waterloo en die Abercrombie Robinson uitbeeld.

• Burman, Jose: The bay of storms – Table Bay 1503-1860. Kaapstad: Human & Rousseau, 1976. ISBN 0-7981-0670-0
• Potgieter, Coenraad: Skipbreuke aan ons kus. Kaapstad: Tafelberg Uitgewers, 1969.
• Turner, Malcom: Shipwrecks & salvage in South Africa – 1505 to the present. Kaapstad: Struik, 1988. ISBN 0-86977-387-9
• Wexham, Brian: Shipwrecks of the Western Cape. Kaapstad: Howard Timmins, [1984]. ISBN 0-86978-251-7
• www.wrecksite.eu