科學史

 

喺發明文字之前嘅時期嗰陣，人類已經有實踐性質嘅科學。當時嘅人類已經會發明啲嘢嚟幫助自己嘅生活，好似係石器時代嘅人噉：佢哋識整架生同埋諗方法改良啲架生，雖然因為冇文字搞到佢哋嗰啲有關架生嘅知識只係有得口耳相傳，但嗰啲查實已經算得上係原始嘅工程學；例如中美洲嗰頭嘅人喺呢方面就好出名，佢哋喺公元前 9000 年嗰陣已經將粟米馴養（指令一個非人類嘅物種嘅生物變得啱人類使用）咗，用咗一啲基礎嘅植物學知識。

打後少少，有好幾個公元前嘅文明－例如係古埃及、古印度、古華夏、古典時代嘅歐洲、同埋兩河流域文明（包埋波斯）－都識得一啲科學知識：好似係用啲（冇現代咁先進嘅）方法觀察天體嘅運行同整曆法、用文獻記載一啲基本嘅生理知識、又或者係觀察同紀錄自己周圍啲動植物。雖然係噉，嗰時啲人仲未有嚴格嘅科學可言－冇文獻顯示佢哋會走去傾歸納或者係可否證性呢啲科學哲學嘅概念，所以可以話係冇科學性嘅思考呢回事。

學者一般都認為，科學哲學嘅開端係喺公元前嘅古希臘。嗰陣時啲希臘人好興傾哲學同埋知識方面嘅話題，當中公元前 5 世紀嘅蘇格拉底（Socrates）就有喺度試緊用哲學方法理解人同政治，又有批判嗰時啲研究大自然啲學者唔夠實證，後嚟仲因為佢唔肯接受嗰時希臘人用希臘眾神解釋自然現象嘅做法，俾人當係異端份子處死。

打後少少，喺公元前 4 世紀，都係好出名嘅哲學家柏拉圖（Plato）同阿里士多德（Aristotle）就有喺度講點樣將人嘅諗嘢方法分類：佢哋提咗歸納同演繹推理嘅概念，仲有傾到兩者之間有乜嘢分別，可以話係歷史上第一次有人喺度傾科學哲學嘅概念；雖然係噉，阿里士多德佢接受少少用人做中心解釋宇宙嘅理論（客觀嘅科學應該係唔用任何人或物做中心嘅），而且又睇重用純理論性分析去了解大自然－唔會點講用實驗同觀察攞數據，所以嗰時嘅科學哲學淨係得個雛型，仲係未有乜嘢實證科學出現。

 

喺中世紀（Middle Age；大約係 5 至 15 世之間嗰段時間）嘅時候，世界各個地區都見到科學上嘅發展，例如當時嘅伊斯蘭世界繼承咗古希臘哲學家嘅思想，喺中東多地建立咗圖書館等嘅學問組織，用實驗嘅方法收集數據嚟研究天文、醫學、化學同煉金術等各方面嘅知識；打後喺 10 世紀開始，仲出咗阿拉伯人學者用實驗嘅方法嚟研究光嘅反射同折射（早期嘅光學）等嘅大創新，俾人覺得早期實證科學嘅代表之一。後嚟俾呢啲嘢影響咗，13 世紀嘅英格蘭學者羅傑培根（Roger Bacon）寫咗好幾本書講光學同語言學等嘅學問，又提倡用實證嘅方法嚟追求知識，令到歐洲嘅實證科學成咗形。喺中世紀後橛，歐洲嘅大學由結合天主教神學同阿里士多德思想嘅經院哲學（scholasticism）主導。喺呢個時代，亞巴郎諸教（Abrahamic religions）文明－包括歐洲同伊斯蘭世界－已經搞實驗科學搞得有聲有色－雖然呢個時期嘅科學好多時仲係俾宗教限住，例如係當時啲科學家間唔中就會因為討論科學嗰陣講錯嘢，得罪啲神職人員而有麻煩。

同時屬於中世紀嘅趙宋皇朝喺各方面嘅科學度都有一定嘅發展。宋朝嘅漢人發明咗火藥，仲利用呢樣發明品整咗一啲原始嘅大炮出嚟；除咗噉，佢哋發明咗指南車，又喺數學上改進咗好多嘢，俾人覺得係華夏文明歷史上最識搞科技嘅皇朝；同西人唔同嘅係，宋人嘅科學以實用為主，好似光學或者科學哲學呢啲冇乜實際用途嘅理論性探究會少啲，但佢哋嗰啲科技仲係吸引到唔少人喺西面走嚟交流。後嚟南宋皇朝喺 13 世紀尾俾蒙古人打冧，令到中世紀華夏文明嘅科學發展停滯咗一排。

趙宋皇朝嘅科技發展主要係喺中原嗰頭：嗰陣時嶺南仲未完全成為漢人，南越人嘅文化冇咁先進，唔似得閩越人噉曉造船，即係越人响科學上稍為落後啲，冇出到咁多有料到嘅學者或者技術。雖然係噉，嗰時嘅粵廣地區學咗啲大唐同大宋嘅先進漢文化，又有搞啲工藝，所以喺科技上開始萌芽。

 

 

文藝復興（Renaissance；1300 年至 1700 年）係歐洲嘅一個黃金時代，嗰時嘅歐洲人開始重新研究古羅馬同古希臘留落嚟啲文化遺產，令到佢哋喺藝術同思想方面有好多躍進。當中 16 至 17 世紀嘅意大利物理同天文學家伽利略（Galileo）最出位：佢用咗數學嘅概念嚟表達物理學嘅定律－呢樣嘢喺嗰時好新穎，因為佢之前嗰啲自然哲學家多數都淨係會用文字嚟寫科學定律，而好少可用精確嘅數學方程式表達。伽利略做咗好多創新嘅實驗，甚至仲挑戰當時羅馬教廷認定嘅地心說（geocentrism；話地球係宇宙中心嘅學說），最後搞到教廷唔妥佢，拉咗佢去審同軟禁，成為咗一個「因為唔服從當權者而受迫害嘅科學家」嘅典型例子。打後 16 世紀嘅法國哲學家笛卡兒（René Descartes）俾伽利略影響咗，提倡用數學嚟理解大自然，又發明咗用座標嚟計幾何嘅做法；同期嘅英國哲學家培根（Francis Bacon）寫咗好幾本有影響力嘅著作，主張自然哲學（嗰陣西人對自然科學嘅稱呼）應該係用實證做主導，又批判咗阿里士多德嘅思想，宣揚一種以「描述自然定律」為核心嘅科學方法。現代科學喺呢個時期可以算係成咗形。

呢個時期嘅嶺南地區已經做咗明朝中國嘅主要對外港口。粵人（嗰時現代廣東話已經成咗形）發展咗好多有睇頭嘅工藝技術，會將佢哋啲工藝品（例如係廣彩）賣俾西歐嘅人，而且仲因為同西歐人交流得多，出咗啲有西歐味道嘅思想流派，好似係嶺南學派噉，就會主張用「質疑」嘅方法嚟求學問。總體嚟講，呢個時期嘅嶺南同其他東亞嘅社會一樣，喺純科學方面冇乜話重要影響力，但喺科技上係有咁上下嘅水平。

喺 17 至 18 世紀，歐洲正係處於啟蒙時期（Age of Enlightenment）－俾笛卡兒同培根啟發咗，歐洲响自然哲學上開始有大幅嘅進步，西歐諸國同俄羅斯成為咗橫掃成個世界嘅強國。英國物理學家牛頓同德國數學家萊布尼茲（Gottfried Leibniz）改革咗數學同物理學，形成咗今日嗌嘅古典力學（classical mechanics）；而後者諗咗微積分（calculus）同能量呢啲概念出嚟－兩樣都係自然哲學上嘅大突破；除此之外，萊布尼茲仲改咗吓自然哲學上用嘅字眼，唔再用啲帶有目的論（teleology；指一啲假設宇宙所有嘢都有目的嘅學說）嘅字眼嚟寫自然哲學嘢，令到現代科學更加客觀咗。最後，西人就係响呢個時期開始用「science」呢個字嚟稱呼研究大自然嘅學問。

自從喺 19 世紀頭開始，各門嘅自然科學就喺度起勢噉發展。歐美地區喺呢個時期出咗好多個有突破性嘅科學理論－好似係查理斯·達爾文（Charles Darwin）提出嘅物競天擇、熱力學定律、電磁理論同埋原子論呀噉。呢柞理論係現代科技嘅基礎－好多現代嘅科技都係要靠呢啲理論先至整到出嚟，例如係同醫學好有關係嘅細菌研究就成日都會用到物競天擇理論。除咗噉，19 世紀早期仲係社會科學嘅開端。

响同一時間，遠東地區亦都開始搞科學：日本出咗好幾個好似係野口英世（平假名：のぐち　ひでよ）噉嘅著名科學家，成為咗廿至廿一世紀世界上科學方面最出色嘅國家之一；同期嘅香港亦都開咗好幾間大學搞科研，出咗啲好似係高錕同陳易希噉喺科學上有重大成就嘅人（當中前者仲攞埋諾貝爾物理學獎），而到咗廿一世紀初，香港嘅科研喺國際上都係處於算係比較前列嘅位置；中國大陸喺科研上水平都有返咁上下。

• 科學
• 科學哲學
• 科學革命

• Live Science: The Most Interesting Articles, Mysteries & Discoveries.