Javier Hernández Balcázar: Futbollist meksikan

Hernández luan në fushë me pseudonimin Chicharito (Shqip: bizelja e vogël); këtë pseudoim e mban në fanellën e tij.

Javier Hernández

Hernández në 2019
Të dhënat vetjake
Emri i plotë	Javier Hernández Balcázar
Datëlindja	(1988-06-01) 1 qershor 1988 (35 vjeç)
Vendlindja	Guadalajara, Meksikë
Gjatësia	1.75 m (5 ft 9 in)
Pozicioni	Sulmues
Të dhënat e klubit
Klubi aktual	LA Galaxy
Numri	14
Karriera me të rinjtë
1997–2006	Guadalajara
Karriera me klube*
Vitet	Klubi	Ndeshje	(Golat)
2006–2010	Guadalajara	64	(26)
2010–2015	Manchester United	103	(37)
2014–2015	→ Real Madrid (huazim)	23	(7)
2015–2017	Bayer Leverkusen	54	(28)
2017–2019	West Ham United	55	(16)
2019–2020	Sevilla	9	(1)
2020–	LA Galaxy	2	(0)
Karriera ndërkombëtare‡
2007	Meksika U20	2	(1)
2009–	Meksika	109	(52)
*Ndeshjet dhe golat me klubet llogariten vetëm për ligën vendase – redaktuar më 7 mars 2020 ‡ Ndeshjet dhe golat me ekipin kombëtar të redaktuar më 7 shtator 2019

Hernández e nisi karrierën si profesionist në vitin 2006, duke luajtur me klubin meksikan Guadalajara. Në korrik 2010, ai u bë meksikani i parë që luan për Manchester United, duke shënuar 20 gola në sezonin e parë si dhe fitoi titullin e Premier Ligës. Pasi nuk ishte në planet e David Moyes dhe Louis van Gaal, ai e shpenzoi sezonin 2014–15 në huazim te Real Madridi. Në gusht 2015, Hernández firmosi për klubin e Bundesligës gjermane Bayer Leverkusen. Pas dy sezoneve në Gjermani, Hernández u rikthye në Premier Ligë për të luajtur me West Ham United. Mesatarja e tij e golave për minutë është një nga më të lartat në historinë e Premier Ligës. Pasi zhvilloi rreth 60 ndeshje për klubin, Hernández firmosi me Seviljen në shtator 2019.

Hernández debutoi për Meksiksën në vitin 2009 dhe që atëherë është golashënuesi më i mirë i të gjitha kohërave me 52 gola. Ai debutoi me kombëtare në në shtator 2009 në një ndeshje miqësore kundër Kolumbisë. Ai ka përfaqsuar ekipin në tre edicione të FIFA Kupës së Botës, dy edicione të FIFA Kupës së Konfederatave, CONCACAF Kupën Gold 2011 dhe Copa América Centenario në vitin 2016. Ai ishte golashënuesi më i mirë i Kupës Gold me 7 gola dhe u emërua si lojtari më i mirë i turnamentit.

Hernández ka lindur në Guadalajara, Meksikë dhe luajti për herë të parë futboll në moshën shtatë vjeç. Ai jetoi në Morelia, Michoacán për katër vite, kurse babai i tij, futbollisti Javier Hernández Gutiérrez, luante për Monarcas Morelia. Gjatë kohës që jetonte në Morelia, Hernández shkoi në shkollën fillore Instituto Piaget ku ai studioi nga klasa e tretë deri në të gjashtën dhe luajti futboll me ekipin e shkollës.

Në moshën nëntë vjeç, Hernández me bashkua me Guadalajara dhe firmosi kontratën e parë si profesionist në moshën 15 vjeç. Ai ishte bërë gati për të luajtur në FIFA Kampionatin Botëror nën-17 2005, por e dëmtim bëri që ai të mos ishte pjesë e skuadrës e cila në fund e fitoi turnamentin. Gjatë kohës që luante futboll si profesionist, Hernández gjithashtu ndiqte leksione për menaxhim biznesi në Universidad del Valle de Atemajac. Hernández ka emëruar Hugo Sánchez dhe Rafael Márquez si dy idhujt e tij të fëmijërisë.

C.D. Guadalajara

Hernández u bashkua me skuadrën e të rinjëve të Guadalajara në moshën 9 vjeç. Në sezonin 2005–06, ai u bashkua me skuadrën e parë, duke debutuar më 9 shtator 2006 në një ndeshje të Aperturës kundër Necaxa e cila përfundoi me fitoren 4–0 në stadiumin Estadio Jalisco; Hernández hyri në fushë në minutën e 82të në vend të Omar Bravo dhe shënoi golin e fundit për skuadrën e tij pesë minuta më vonë. Ky ishte goli i tij i vetëm në tetë ndeshje të luajtura në vitet 2006 dhe 2007. Ai luajti tetë ndeshje në Apertura 2008 por nuk arriti ta gjejë rrugën e rrjetës, kurse në Clausura 2009 shënoi katër gola në 15 ndeshje. Në Apertura 2009, Hernández u bë një lojtar i rëndësishëm në ekip dhe e sezonin si golashënuesi i tretë i skuadrës me 11 gola në 17 ndeshje, duke fituar përfundimisht vendin si titullar në formacion.

Në Torneo Bicentenario 2010, Hernández ishte golashënuesi më i mirë i ekipit dhe i ligës, sëbashku me Hérculez Gómez dhe Johan Fano, duke regjistruar 10 gola në vetëm 11 ndeshje. Ai e nisi turnamentin duke shënuar nga dy gola në tre ndeshjet e para të turnamentit kundër Deportivo Toluca, Tigres UANL dhe Estudiantes Tecos. Ndeshja kundër Estudiantes Tecos u pa si një ndeshjet më të mira të Hernández me Guadalajaran. Pasi shënoi kundër Querétaros dhe Atlantes, Hernández pësoi një dëmtim që nuk e la atë të luaj për pesë ndeshje. Ai nuk luajti deri në javën e 11të, më pas, Hernández u rikthye dhe shënoi në humbjen 2–1 kundër Monterrey.

Pas paraqitjeve të tij të mira në moshë të re me skuadrën e Guadalajara, shumë klube europiane si PSV Eindhoven i Hollandës, VfL Wolfsburg i Gjermanisë dhe Valencia e Spanjës shfaqën interes për Hernández. Megjithatë, më 8 prill 2010, Hernández firmosi një kontratë pesë-vjeçare me klubin anglez Manchester United dhe zyrtarisht u bashkua me klubin më 1 korrik të atij viti.

Manchester United

Transferimi

Manchester United ishte klubi i parë që shfaqi interes për Hernández në tetor 2009; një zbulues talentësh i klubit anglez shkoi në Meksikë në dhjetor dhe raportoi pozitivisht te Red Devils pasi pa disa ndeshje. Për shkak të moshës së Hernández, klubi fillimisht planifikoi që të priste para se të lëvizte për të nënshkruar me të, por mundësia që ai mund të luante me ekipin kombëtar Kupën e Botës 2010 bëri që Manchester United të nxitonte për ta blerë. Shefi i zbuluesve të talentëve të United u dërgua në Meksikë për tre javë në muajtë shkurt dhe mars për të parë sulmuesin dhe për të ngritur një raport pozitiv për të, para se avokati i klubit të shkonte në Meksikë për të finalizur dokumentat.

Më 8 prill 2010, Hernández pranoi për të firmosur me Manchester United për një shumë të pazbuluar. Një ditë para kësaj, Hernández kishte qënë Old Trafford fitoren e United ndaj Bayern Munich në çerek-finalen e Ligës së Kampioneve. Marrëveshja u bë në fshehtësi të plotë; agjenti i Hernández u mbajt në errësirë, siç ishte edhe gjyshi Tomás Balcázar, të cilët mendonin se Hernández kishte shkuar në një udhëtim në Atlanta të Shteteve të Bashkuara. Si pjesë e marrëveshjes, United luajti një ndeshje miqësore kundër Guadalajara në stadiumin e tyre të ri Estadio Omnilife më 30 korrik. Më 27 maj, leja e transferimit u dha, duke i hapur rrugë zyrtarizimit të transferimit më 1 korrik 2010.

Sezoni 2010–11

 

Më 28 korrik 2010, Hernández bëri debutimin e tij me Manchester United në ndeshjen MLS All-Star Game 2010, duke u aktivizuar si zëvëndësues në minutën e 63të në vend të Nanit; ai shënoi golin e parë me klubin 18 minuta më vonë, duke mposhtur portierin Nick Rimando me një parabël nga jashtë zone pas një topi të gjatë nga Darren Fletcher. Dy ditë më vonë, Hernández shënoi ndaj Manchester United duke luajtur me klubin e tij të vjetër Chivas; ai e nisi ndeshjen me fanellën e Chivas dhe shënoi në minutën e tetë. Ai ndërroi ekip në pjesën e dytë, por nuk mundi dot të ndalojë humbjen 3–2 për Manchester United. Ai shënoi në ndeshjen e tretë miqësore rresht në fitoren 7–1 kundër League of Ireland XI në stadiumin e rindërtuar Aviva Stadium më 4 gusht.

Hernández bëri debutimin e tij zyrtar me klubin më 8 gusht në FA Community Shield 2010 kundër Çelsit, duke shënuar golin e dytë të fitores 3–1 në Wembley Stadium. Ai u aktivizua në fillim të pjesës së dytë dhe shënoi në minutën e 76të me fytyrë pas një topi të Antonio Valencias në zonë. Më 16 gusht, Hernández debutoi në Premier Ligë, duke zëvëndësuar Wayne Rooneyn në minutën e 63të të fitores 3–0 në shtëpi ndaj Newcastle United. Ai shënoi golin e parë në Ligën e Kampioneve më 29 shtator në fitoren minimale në transfertë ndaj Valencias, duke u aktivizuar sërisht si zëvëndësues. Më 16 tetor, Hernández shënoi golin e parë në kampionat për ekipin në barazimin 2–2 në shtëpi kundër West Bromwich Albion. Tetë ditë më vonë, Hernández regjistroi dopietën e parë me klubin, dhe golat e tij të parë në transfertë, në një fitore 2–1 kundër Stoke City. Dy ditë pas kësaj, ai shënoi për herë të parë edhe në Kupës e Ligës, një gol në minutën e fundit në fitoren 3–2 ndaj Wolves pasi u aktivizua si zëvëndësues; kjo fitore e dërgoi ekipin në çerek-finale, ku u eliminuan nga West Ham United. Më 1 janar 2011, ai u aktivizua sërisht si zëvëndësues në takimin ndaj West Bromwich Albion, duke shënuar me kokë golin e fitores 2–1 në transfertë. Tre ditë më vonë, ai u bë meksikani me më shumë gola në historinë e Premier Ligës pas golit të shënuar në fitoren 2–1 në shtëpi ndaj Stoke City.

 

Më 25 janar, Hernández shënoi golin e barazimit të përkohshëm në përmbysjen 3–2 të United kundër Blackpool. Katër ditë më vonë, ai shënoi golin e parë në Kupën FA në fitoren 2–1 në transfertë ndaj Southampton. Hernández më pas shënoi një dopietë në fitoren 4–0 kundër Wigan më 26 shkurt. Tetë ditë më vonë, ai shënoi golin e ngushëllimit në humbjen 3–1 në derbi ndaj Liverpool. Më 15 mars, Hernández shënoi dy gola në fitoren 2–1 kundër Marseille, duke i dhënë ekipit fitoren 2–1 dhe një vend në çerek-finalen e Ligë së Kampioneve. Dy javë më vonë, ai shënoi golin e katërt të fitores 4–2 me përmbysje ndaj West Ham pasi fillimisht United kishte qënë në disavantazh të dy golave. Më 8 prill, Hernández ishte një nga kanditatët e nominuar për çmimin PFA Lojtari i Ri i Vitit sëbashku me shokun e skuadrës Nani. Katër ditë më vonë, ai shënoi golin e parë në fitoren 2–1 në çerek-finalen e Ligës së Kampioneve ndaj Çelsit; United fitoi me rezultatin e përgjithshëm 3–1, duke përparuar në gjysëm-finale. Ai vazhdoi me formën e tij të shkëlqyer duke shënuar një tjetër gol me kokë në fitoren 1–0 ndaj Everton më 23 prill.

Më 8 maj, Hernández shënoi golin e parë të fitores 2–1 ndaj Çelsit pas vetëm 36 sekondash; kjo fitore do të thoshte se United i duhej vetëm një pikë për të fituar titullin e Premier Ligës. Goli ndaj Çelsit ishte i 20ti i tij në të gjitha kompeticionet, duke u bërë lojtari i parë që nga Ruud van Nistelrooy në sezonin 2001–02 që e arrin këtë në sezonin debutues. Hernández vulosi sezonin debutues me Manchester United duke fituar çmimin Sir Matt Busby Lojtari i Vitit më 18 maj pasi u votua nga tifozët e klubit. Më 28 maj, Hernández luajti 90 minuta të plota në distatën 3–1 kundër Barcelonës në finalen e Ligës së Kampioneve. Më 5 korrik 2011, Federata Ndërkombëtare e Futbollit për Histori dhe Statistika e emëroi Hernándezin si "World Goalgetter 2011", me 13 gola, para lojtarëve të tjerë si Cristiano Ronaldo, Giuseppe Rossi dhe Lionel Messi.

Sezoni 2011–12

Pas mori pjesë në CONCACAF Kupën Gold 2011 me Meksikën, Hernández u rikthye te Manchester United për të filluar stërvitjen para-sezonale në New York para ndeshjes miqësore kundër MLS All-Star. Më 26 korrik 2011, ai u dërgua në spital me pësoi një tronditje të vogël në kokë pasi u godit me topë gjatë një seance stëvitore; ai ishte ftuar për ndeshjen kundër MSL All-Star, por nuk mori pjesë në ndeshje.

Më 28 korrik 2011, u raportua se Rafael Ortega, doktori te Chivas, informoi Manchester United se Hernández po vuante nga një gjëndje para-ekzistuese neurologjike. Ortega gjithashtu shpjegoi se Hernández ka vuajtur nga "migrena akute dhe nga dhimbja e kokës" kur ishte adoleshent. Ai i humbi të gjitha ndeshjet miqësore të ekipit, FA Community Shield 2011, dhe ndeshjen e parë të kampionatit kundër West Bromwich Albion.

Hernández zhvilloi paraqitjen e parë për sezonin 2011–12 në fitoren 3–0 në shtëpi kundër Tottenham Hotspur më 22 gusht, duke zëvëndësuar Danny Welbeck në minutën e 79të. Ai u rikthye në formacion më 10 shtator kundër Bolton Wanderers, duke shënuar dy gola në një fitore 5–0 në transfertë. Më 15 tetor, Hernández hyri nga stoli për të shënuar një gol vendimtar në barazimin 1–1 ndaj Liverpoolit në Anfield. Në minutën e 81të, ai vjedhurazi hyri në zonë dhe shënoi me kokë pas krosimit të Danny Welbeck.

Hernández firmosi një kontratë të re pesë-vjeçare me Manchester United më 24 tetor që do të thoshte se ai do të qëndronte në Old Trafford deri në 2016. Goli i tij i katërt në kampionat erdhi në fitoren minimale 1–0 kundër Everton në Goodison Park. Pas kësaj, në ndeshjen e rradhës, ai shënoi një tjetër gol fitoreje, këtë herë në transfertë ndaj Swansea City. Hernández shënoi në ndeshjen e rradhës të United në shtëpi ndaj Newcastle United, kjo pasi gjuajtja e Wayne Rooney u ndal nga një mbrojtës dhe u përplas te meksikani, duke përfunduar në rrjetë. Në ndeshjen e rradhës në transfertë ndaj Aston Villës, ai u nxorr nga fusha e lojës me barrelë në pasi ndrydhi kyçin e këmbës pas një dueli me një lojtar kundërshtar. Pas ndeshjes, trajneri Ferguson deklaroi se Hernández kishte dëmtuar ligamentin e kyçit të këmbës dhe se do të qëndronte jashtë për rreth katër javë. Më 18 dhjetor, Hernández bëri një rikthim surprizë më herët nga se ishte parashikuar në takimin ndaj Queens Park Rangers; ai u aktivizua si zëvëndësues në minutën e 63të në vend të Danny Welbeck në fitoren 2–0 të United në Loftus Road.

Më 31 janar 2012, Hernández shënoi golin e parë që nga muaji nëntor në fitoren 2–0 kundër Stoke City në Old Trafford, duke shënuar një nga dy penalltitë e ndeshjes. Ai vazhdoi me formën e tij pozitive edhe në ndeshjen e 5 shkurtit ndaj Çelsit në Stamford Bridge, duke shënuar golin e barazimit 3–3 pasi fillisht United ishte në disavantazh të trefishtë; ai shënoi me kokë pas krosimit të Ryan Giggs. Më 16 shkurt, Hernández shënoi golin e parë në UEFA Ligën e Evropës në fitoren 2–0 jashtë fushe ndaj Ajax në raundin e 32-tave. Ai shënoi edhe në ndeshjen e kthimit në Old Trafford më 23 shkurt, por këtë herë Manchester United u mposht. Megjithatë, ata u kualifikuan me rezultatin e përgjithshëm 3–2. Më 18 mars, Hernández shënoi një dopietë në fitoren 5–0 kundër Wolverhampton Wanderers.

Sezoni 2012–13

 

Hernández filloi sezonin e tretë me Manchester United më 2 shtator 2012, duke luajtur si zëvëndësues në minutën e 72të të fitores 3–2 ndaj Southampton. Më 15 shtator, ai luajti 90 minuta të plota kundër Wigan Athletic, duke regjistruar ndeshjen e parë si titullar; pavarësisht se Ali Al-Habsi i priti një penallti në minutën e pestë, Hernández arriti më pas të shënojë golin e parë sezonal, e cila u pasua nga një asist për golin e Nick Powell në një fitore 4–0. Më 23 tetor, Hernández shënoi një dopietë në fitoren 3–2 me përmbysje kundër Bragës në ndeshjen e tretë të fazës së grupeve të Ligës së Kampioneve, me ekipin që e kishte mbyllur pjesën e parë në disavantazh të dy golave. Pesë ditë më vonë, ai shënoi golin e fitores në sfidën kundër Çelsit (e cila po luante me nëntë lojtarë), e cila u mbyll 3–2; goli shkaktoi polemika të shumta pasi Hernández u konsiderua se ishte në pozicion të parregullt në momentin e shënimit të golit.

Më 10 nëntor 2012, Hernández hyri në pjesën e dytë si zëvëndësues dhe shënoi dy gola me Manchester United që fitoi 3–2 me përmbysje ndaj Aston Villës në Villa Park. Në fund të ndeshjes, Hernández pretendoi se kishte shënuar tregolësh, por përsëritjet treguan se goli i dytë i United ishte autogol i mbrojtësit Ron Vlaar, i cili kishte devijuar në portë gjuajtjen e gabuar të Hernández. Dy javë më pas, ai shënoi golin e pestë në kampionat në fitoren 3–1 në shtëpi kundër Queens Park Rangers. Më 26 dhjetor, Hernández shënoi golin e katërt të Manchester United në kohën shtesë të fitores 4–3 kundër Newcastle United në Old Trafford. Ai më pas e nisi vitin e ri 2013 me një dopietë kundër Wigan më 1 janar, duke udhëhequr ekipin drejt një fitore 4–0. Më 26 janar, Hernández shënoi një tjetër dopietë, këtë herë në suksesin 4–1 kundër Fulham në një ndeshje të Kupës FA.

Në një tjetër ndeshje të Kupës FA kundër Reading më 18 shkurt, Hernández shënoi në minutën e 72të, duke i dhënë United avantazhin 2–0. Goli i tij në fund ishte vendimtar dhe në fund ekipi fitoi 2–1. Hernández më pas priti deri më 10 mars për të shënuar golin e tij të rradhës, të cilëne gjeti në një tjetër ndeshje të Kupës FA, kundër Çelsit në një barazim 2–2. Më 12 maj, Hernández shënoi golin e parë të ndeshjes ndaj Swansea City e cila ishte e fundit e trajnerit Sir Alex Ferguson në Old Trafford. Pasi mbrojtësit kundërshtar nuk larguan topin pas ekzekutimit të një goditje dënimit, meksikani shënoi në brëndësi të zonës në pjesën e parë, duke i dhënë ekipit avantazhin 1–0, në një fitore 2–1. Në ndeshjen e fundit të sezonit, Hernández shënoi golin e fundit të sezonit dhe të fundit të epokës Ferguson, kur ai shënoi në brëndësi të zonës pas një krosimi në barazimin 5–5 kundër West Bromwich Albion.

Sezoni 2013–14

Hernández e nisi sezonin e katërt duke humbur FA Community Shield 2013 për shkak të një dëmtimi në gju. Ai u rikthye dhe luajti ndeshjen e parë më 1 shtator kundër Liverpoolit në Anfield, kurse goli i parë erdhi më 25 shtator sërisht kundër të njëjtin ekip, këtë herë në Kupën e Ligës. Më 26 tetor, me golin e tij të parë në kampionat, Hernández ndihmoi ekipin të fitonte 3–2 me përmbysje ndaj Stoke Cityt në Old Trafford. Tre ditë më vonë, ai regjistroi një dopietë – e cila nisi me një penallti – në fitoren 4–0 kundër Norwich City në raundin e rradhës të Kupës së Ligës. Në gjysëm-finalen e kompeticionit, goli i tij pas krosimit të Adnan Januzaj në minutën e fundit të kohës shtesë e dërgoi ndeshjen ndaj Sunderland në gjuajtjet e penalltive, ku United humbi 2–1.

Huazim te Real Madrid

Më 1 shtator 2014, Hernández firmosi me klubin spanjoll Real Madrid me huazim deri në fund të sezonit, me mundësi blerje në fund të sezonit.

Ai bëri debutimin e tij zyrtar më 13 shtator në derbin e Madridit, duke zëvëndësuar Karim Benzeman në 27 minutat e fundit me ekipin që u mposht me rezultatin 2–1 në shtëpi nga Atlético Madrid. Një javë më pas, në ndeshjen e tij të dytë, Hernández u aktivizua në minutën e 77të në vend të Gareth Bale dhe shënoi dy golat e para për klubin në fitoren rekord 8–2 jashtë fushe ndaj Deportivo de La Coruña.

Ai shënoi golin e fitores më 22 prill 2015 në ndeshjen e dytë çerek-finale të Ligës së Kampioneve ndaj Atlético Madrid, duke dërguar Realin në gjysëm-finalen e kompeticionit. Katër ditë më vonë, Hernández shënoi dy gola në fitoren 4–2 në transfertë ndaj Celta de Vigo.

Më 26 maj, u njoftua se Hernández do të rikthehej te Manchester United pas përfundimit të sezonit pasi Real Madridi nuk vendosi që t'a bënte transferimin përfundimtar.

Largimi përfundimtar nga Manchester United

Më 29 gusht 2015, u raportua se trajneri i ekipit Louis Van Gaal i kishte thënë Hernándezit se ai mund të largohej nga klubi para përfundimit të merkatos verore. Edhe pse atij i kishte mbetur edhe një vit nga kontrata, shuma që do të kërkonte United për të ishte ende e paqartë.

Hernández luajti në atë që do të ishte ndeshja e tij e fundit për klubit më 22 gusht në barazimin pa gola ndaj Newcastle United në Old Trafford. Ai hyri në fushën e lojës në minutën e 67të, duke zëvëndësuar Adnan Januzajn. Për shkak se ai kishte luajtur si zëvëndësues në shumicën e ndeshjeve të tij me Manchester United, mesatarja e tij e golave për minuta ishte një nga më të lartat në historinë e Premier Ligës.

Bayer Leverkusen

Sezoni 2015–16

Më 31 gusht 2015, u njoftua se Hernández kishte firmosur një kontratë tre-vjeçare me Bayer Leverkusen në Bundesligë për një shifër të pazbuluar, e cila u raportua të ishte 7.3 milion £. Ai debutoi në Bundesligë më 12 shtator si një zëvëndësues në minutën e 56të në humbjen 1–0 ndaj Darmstadt 98. Goli i tij i parë për klubin erdhi katër ditë më vonë në një ndeshje të fazës së grupeve të Ligës së Kampioneve kundër BATE Borisov, duke realizuar të parin e fitores 4–1. Më 23 shtator, Hernández shënoi golin e parë në Bundesligë në fitoren minimale 1–0 kundër FSV Mainz, duke u shpallur edhe lojtari i ndeshjes. Rreth një muaj më vonë, më 20 tetor, Hernández regjistroi dopietën e parë për Leverkusenin në barazimin 4–4 kundër Romës në Ligën e Kampioneve. Ai e mbylli fazën e grupeve të Ligës së Kampioneve me pesë gola në gjashtë ndeshje; pavarësisht paraqitjeve të tij pozitive, Bayer nuk e kaloi dot grupin, duke u rrëzuar në Ligën e Evropës.

Hernández u shpall lojtari i muajit i Bundesligës për muajin nëntor; në atë muaj, ai shënoi në humbjen 2–1 në shtëpi ndaj 1. FC Köln dhe një dygolësh në fitoren 3–1 kundër Eintracht Frankfurt. Më 12 dhjetor, Hernández shënoi tripletën e tij të parë në Gjermani në fitoren 5–0 të Leverkusenit kundër Borussia Mönchengladbach, duke arritur në shifrën e 15 golave në 12 ndeshjet e fundit, dhe duke arritur gjithsej 17 gola në 20 ndeshje. Ai u zgjodh sërisht lojtari i muajit i Bundesligës.

Më 30 janar 2016, në ndeshjen e dytë të ekipit pas pushimeve dimërore, Hernández shënoi dy gola në fitoren 3–0 kundër Hannover 96, duke regjistruar golat e 20të dhe 21të të sezonit. Dy ditë më vonë, ai u emërua lojtari i muajit i Bundesligës për të tretën herë rresht.

Sezoni 2016–17

 

Hernández e nisi sezonin e dytë në Gjermani me një gol dhe asist në fitoren 2–1 të Leverkusenit kundër SC Hauenstein në raundin e parë të DFB-Pokal më 21 gusht 2016. Dy ditë më vonë, u raportua se ai do të humbiste ndeshjen e parë të kampionatit kundër Borussia Mönchengladbach pasi theu dorën. Hernández më pas u rikthye dhe shënoi golin e parë në Bundesligë më 17 shtator kundër Eintracht Frankfurt; megjithatë, gjatë ndeshjes, ai humbi një penallti, me Leverkusenin që u mposht 2–1 në transfertë. Një javë më vonë, në ndeshjen ndaj FSV Mainz 05, Hernández shënoi një tregolësh të përkryer, duke përfshirë edhe golin e fitores në kohën shtesë; kjo ishte tripleta e tij e dytë në Bundesligë. Performancat e tij për muajin shtator u shpërblyen, duke bërë që ai të shpallej sërisht lojtari i muajit në Bundesligë.

Më 28 janar 2017, Hernández shënoi golin e dytë të ekipit të tij në disfatën 2–3 kundër Borussia Mönchengladbach, duke i dhënë fund një serie prej 11 ndeshjesh pa shënuar. Më 21 shkurt, pas përfundit të ndeshjes ndaj Atlético Madrid, Hernández regjitroi paraqitjen e tij të 47të në Ligën e Kampioneve, duke u bërë lojtari meksikan me më shumë ndeshje në këtë kompeticion, duke kaluar mbrojtësin Rafael Márquez (46).

West Ham United

Sezoni 2017–18

 

Më 24 korrik 2017, Hernández u bë pjesë e klubit anglez West Ham United për një shifër e cila u raportua të ishte rreth 16 milion £, duke nënshkruar një marrëveshje tre-vjeçare. Debutimi i tij për klubin ndodhi më 13 gusht në distafën 4–0 kundër ish klubit të tij Manchester United në Old Trafford, duke luajtur 90 minuta të plota. Në javën e ardhshme, Hernández shënoi dy golat e parë për West Hamin në një humbje 2–3 kundër Southampton.

Në nëntor, Hernández pësoi një dëmtim në tendinën e gjurit gjatë kohës që ishte i grrumbulluar me Meksikën, dhe u raportua se do të qëndronte jashtë për rreth dy javë. Pas shkarkimit të Slaven Bilić dhe vendosjes së David Moyes si trajneri i ri i ekipit, kishte raportime se Hernández do të përjashtohej nga ekipi ashtu siç ndodhi te Manchester United. Si kundërpërgjigje, Moyes deklaroi se meksikani ishte një "golashënues i mirë" dhe një "finalizues gjenial". Gjatë merkatos së dimrit, kishte raportime të tjera se Hernández do të largohej nga klubi pas vetëm gjashtë muajsh; ai ishte i lidhur me një kalim te klubi turk Beşiktaş dhe një rikthim te Manchester United. Më 20 janar 2018, ai hyri si zëvëndësues dhe shënoi golin e barazimit 1–1 ndaj Bournemouth, duke regjistruar golin e parë që nga muaji tetor. Pas përfundimit të ndeshjes, performanca e tij mori lëvdata nga Moyes, i cili tha "kishim nevojë për të sot". Më 8 prill, në një ndeshje në kampionat ndaj Çelsit, ai shënoi në minutën e 73të për t'a bërë rezultatin 1–1, duke regjistruar golin e tij të nëntë ndaj klubit londinez.

Sezoni 2018–19

Më 28 gusht 2018, Hernández shënoi golin e barazimit të përkohshëm kundër AFC Wimbledon në një fitore 3–1 në ndeshjen e raundit të dytë të Kupës EFL. Në shtator, trajneri i ekipit Manuel Pellegrini deklaroi se sulmuesi po vuante nga ethet, duke bërë që të humbiste disa ndeshje. Ai u rikuperua dhe j'u rikthye stërvitjes në tetor. Më 3 nëntor, Hernández shënoi golin e parë në Premier Ligë për sezonin 2018–19 në fitoren 4–2 të West Hamit ndaj Burnley.

Më 22 shkurt 2019, Hernández shënoi golin e barazimit të përkohshëm për ekipin e tij në fitoren 3–1 kundër Fulhamit; në pamje të parë, u duk sikur sulmuesi e kishte goditur topin me kokë për t'a dërguar në rrjetë, megjithatë, përsëritja tregoi se topi ishte përplasur në krahun e tij dhe kishte përfunduar në rrjetë. Ky ishte goli i tij i 50të në Premier Ligë, duke u bërë meksikani i parë që e arrin këtë gjë. Ai do të ishte në listën e shënuesve edhe në ndeshjen ndaj Huddersfield më 16 mars, ku fillimisht u aktivizua si zëvëndësues në pjesën e dytë dhe më pas shënoi një dygolësh, përfshirë edhe një gol në kohën shtesë, duke i dhënë ekipit fitoren 4–3.

Sezoni 2019–20

Hernández shënoi golin e parë në Premier Ligë për sezonin 2019–20 më 17 gusht 2019 në barazimin 1–1 të West Ham ndaj Brighton në Falmer Stadium. Më 30 gusht, Hernández i kërkoi klubit të largohej me qëllim për të udhëtuar në Spanjë për të kryer një transferim 8 milion € me Seviljen.

Sevilla

Më 2 shtator 2019, Hernández u bë pjesë e Seviljes në La Liga për një shifër të pazbuluar, e cila u raportua të ishte 7.3 milion £, duke firmosur një kontratë tre-vjeçare.

2007–2008: Të rinjtë

Hernández ishte një nga 21 lojtarët e thirrur në ekipin kombëtar nën-20 për të luajtur në FIFA Kupën e Botës nën-20 2007 që u zhvillua në Kanada; në fitoren 3–0 kundër Gambias, ai u aktivizua në minutat e fundit dhe shënoi golin e tretë të ndeshjes. Meksika u eliminua në çerek-finale nga Argjentina, e cila në fitoi turnamentin.

2009–2010: Debutimi me ekipin e parë dhe Kupa e Botës

 

Më 30 shtator 2009, Hernández bëri debutimin e tij për Meksikën kundër Kolumbisë, duke asistuar golin e vetëm të ekipit të tij në 2–1. Më 24 shkurt 2010, Hernández shënoi dy gola kundër Bolivisë dhe asistoi golin e Braulio Lunas në fitoren 5–0. Më 3 mars, Hernández shënoi një gol me kokë duke udhëhequr kombëtaren e tij në suksesin 2–0 kundër Zelandës së Re. Më 17 mars, Hernández shënoi golin e katërt me kombëtaren për t'i dhënë Meksikës fitoren 2–1 kundër Koresë së Veriut. Më 26 maj, Hernández shënoi një gol ngushëllues me kokë në humbjen 2–1 kundër Holandës. Katër ditë më vonë, ai shënoi sërisht, këtë herë një tjetër dopietë në fitoren 5–1 kundër Gambisë.

Më 11 qershor, Hernández bëri debutimin e tij në FIFA Kupën e Botës në ndeshjen hapëse të turnamentit 2010 kundër Afrikës së Jugut në barazimin 1–1; ai hyri në fushën e lojës në minutën e 73të në vend të veteranit Guillermo Franco. Gjashtë ditë më vonë, në ndeshjen e dytë të grupit kundër Francës, ai hyri sërisht si zëvëndësues dhe shënoi golin e dytë të takimit dhe të parin personal, duke dribluar portierin kundërshtar Hugo Lloris pas një pasimi nga Rafael Márquez. Me këtë gol ai imitoi gjyshin e tij, Tomás Balcázar, i cili kishte shënuar kundër Francës në Kupën e Botës 1954. Hernández gjithashtu u shpall lojtari i ndeshjes. Më 27 qershor, në ndeshjen e parë si titullar, Hernández shënoi sërisht, por në disfatën 3–1 kundër Argjentinës në raundin e 16-tave, gjë që solli edhe eliminimin e Meksikës nga kompeticioni. Goli i tij erdhi në minutën e 71të me një gjuajtje të fuqishme me të majtën që përfundoi në trekëndësh, kjo pasi kaloi mbrojtësin Martín Demichelis në hyrje të zonës. Statistikat e FIFA-s tregonin se Hernández ishte lojtari më i shpejtë në këtë turnament, duke arritur shpejtësinë 32.15 km/h.

Hernández shënoi një tjetër gol në ndeshjen e parë të Meksikës pas Kupës së Botës, në një ndeshje miqësore kundër kampionëve të botës Spanjës më 11 gusht 2010. Ai shënoi në minutën e 12të me ndeshjen që u mbyll në barazim 1–1, kjo për shkak të finalizimit të David Silvës në minutën e 92të.

2011–2013: Triumfi në Kupën Gold dhe Kupa e Konfederatave

Hernández shënoi golin e parë me kombëtaren për vitin 2011 në një tjetër miqësore, kësaj rradhe kundër Bosnje dhe Hezegovinës më 9 shkurt. Më 26 mars, ai shënoi dy gola të tjerë në një miqësore tjetër kundër Paraguajit. Goli i parë erdhi në minutën e 6të pas një pasimi nga Pablo Barrera, kurse i dyti personal erdhi në minutën e 29të pas një krosimi të ulët në zonë, tre minuta pasi Andrés Guardado kishte dërguar rezultatin 2–0 për Paraguajin. Ai u duartrokit nga tifozët në minutën e 65të në momentin e zëvëndësimit.

Më 5 qershor 2011, Hernández shënoi një tregolësh, i pari në karrierën e tij, në fitoren 5–0 kundër El Salvador. Më 9 qershor 2011, ai shënoi dy gola, në minutat 26të dhe 76të në fitoren kundër Kubës. Më 18 qershor 2011, Hernández shënoi golin e dytë që rezultoi goli i fitores në suksesin 2–1 kundër Guatemalës për të dërguar Meksikën në gjysmë-finale. Më 22 qershor 2011, ai ndihmoi Meksikën të arrinte në finale pas fitores 2–0 kundër Hondurasit në kohën shtesë; ai e shënoi golin në minutën e 99të. Hernández u shpall golashënuesi më i mirë në Kupën Gold me shtatë gola dhe u shpall lojtari më i mirë i turnamentit. Në finale, ai ndihmoi kombëtaren e tij që të fitonte finalen me rezultatin 4–2 kundër Shteteve të Bashkuara.

Më 15 qershor 2013, në ndeshjen e parë të grupit kundër Italisë, Hernández shënoi golin e vetëm të skuadrës së tij me penallti në humbjen 1–2 në Estádio do Maracanã. Në ndeshjen e tretë të grupit, ai shënoi të dy golat e fitores 2–1 kundër Japonisë; gjatë ndeshjes, ai fitoi edhe një penallti që e goditi vetë, por tentativa e tij u prit nga portieri Eiji Kawashima dhe u kthye sërisht te Hernández i cili goditi traversën. Meksika e mbylli grupin në vendin e tretë me vetëm tre pikë, duke u eliminuar nga kompeticioni; Hernández shënoi të tre golat e ekipit të tij.

2014–2015: Fitorja e Kupës CONCACAF

Hernández shënoi pesë herë në fushatën kualifikuese të Meksikës për Kupën e Botës 2014. Më 23 qershor 2014, ai shënoi golin e tretë të Meksikës në fitoren 3–1 kundër Kroacisë në Arena Pernambuco, duke i siguruar ekipin një vend në fazën me eliminim direkt.

Më 1 korrik 2015, Hernández theu klavikulën gjatë një ndeshje miqësore kundër Hondurasit, duke humbur mundësinë të merrte pjesë në CONCACAF Kupën Gold 2015. Tre muaj më vonë, ai u thirr për të luajtur në Kupën CONCACAF, një turnament me një ndeshje të vetme ndërmjet Meksikës dhe Shteteve të Bashkuara që do të vendoste se kush ekip i konfederatës CONCACAF do të merrte pjesë në Kupën e Konfederatave 2017.

2016–2017: Golashënuesi më i mirë i të gjitha kohërave

 

Hernández u përfshi në skuadrën e Meksikës që do të merrte pjesë në turnamentin e Copa América Centenario. Më 5 qershor, ai luajti 83 minuta në fitoren 2–1 ndaj Uruguajit, dhe shënoi golin e parë në fitoren 2–0 kundër Xhamajkës. Ai arriti në kuotën e 45 golave me kombëtaren, vetëm një larg Jared Borgettit, lojtari me më shumë gola në historinë e Meksikës.

Më 27 maj 2017, Hernández u bë golashënuesi më i mirë i të gjitha kohërave i Meksikës me 47 gola pas golit të shënuar në një ndeshje miqësore ndaj Kroacisë. Në muajin e ardhshëm, Hernández përfaqsoi Meksikën në Kupën e Konfederatave 2017, e zhvilluar në Rusi. Më 18 qershor, ai shënoi golin e parë në barazimin 2–2 kundër Portugalisë, duke realizuar me kokë pas një krosimi nga Carlos Vela.

2018–vazhdon: Kupa e Botës e tretë dhe goli i 50të

Hernández shënoi tre herë në fushatën kualifikuese të Meksikës për Kupën e Botës 2018. Ai ishte një nga 23 lojtarët e thirrur nga trajneri Juan Carlos Osorio për të luajtur në turnamentin final. Ai luajti si titullar në ndeshjen e parë të Meksikës në grup kundër Gjermanisë në Stadiumin Luzhniki në Moskë, duke asistuar golin e vetëm të takimit të shënuar nga Hirving Lozano. Në ndeshjen e dytë, Hernández shënoi në fitoren 2–1 ndaj Koresë së Jugut, duke regjistruar golin e tij të 50të me kombëtaren. Ai u shpall lojtari i ndeshjes nga FIFA, u bë lojtari meksikan me më shumë gola në Kupën e Botës, sëbashku me Luis Hernández si dhe lojtari i parë meksikan që shënon në tre edicione të Kupës së Botës. Pas kësaj, Hernández luajti si titullar në ndeshjen e fundit në grup ndaj Suedisë si dhe në ndeshjen e raundit të 16-tave kundër Brazilit, ku Meksika u eliminua.

Një shënues vrastar, Hernández është përshkuar si një "gjahtar goli" për shkak të golave të tij të shumtë nga afër. Lëvizjet e tij pa top, shpejtësia dhe aftësia për të gjetur hapsira në zonë janë disa nga tiparet që janë vlerësuar. Ai është konsideruar si një nga lojtarët e pakët i aftë për të dalë mbrapa shpinës së mbrojtësit dhe më pas të shënojë nga dy metra, duke bërë që stili i tij i lojës të krahasohet me atë të legjendës gjermane Miroslav Klose.

Rudi Völler, drejtori sportiv i Bayer Leverkusen, ka vlerësuar lojtarin për pozicionimin e tij para portës, duke thënë: "ai qartësisht nuk fiton çdo ndërhyrje por ka një ndjesi të jashtëzakonshme se ku do të përfundojë topi". Ish trajneri i Manchester United Sir Alex Ferguson e ka përshkruar sulmuesin si një "golashënues natyral, shumë të shpejtë dhe të aftë të luajë me të dyja këmbët." Ai gjithashtu shtoi se stili i lojës i Hernándezit i kujtonte ish sulmuesin e Unitedit Ole Gunnar Solskjær – i ashtuquajturi "vrasësi me fytyrë fëmijë" i cili shënoi golin e fitores në kohës shtesë ndaj Bayern München në suksesin e United në finalen e Ligës së Kampioneve të vitit 1999. Ish shoku i tij i skuadrës Jesús Padilla tha se Hernández është "i mrekullueshëm në ajër" pavarësisht gjatësisë së tij.

Në në një intervistë për Sports Illustrated në maj 2016, Hernández foli rreth aftësive të tij në brëndësi të zonës, duke e përshkruar intuitën që ai ka për të ditur se ku do të përfundojë një kros ose t'ja hedhi mbrojtësve kundërshtar.

Ish trajneri i ekipit kombëtar Juan Carlos Osorio e përshkroi Hernándezin si një lojtar i cili ka "një zakon për të shënuar. Ndonjëherë duket sikur çdo rebound ose çdo devijim shkon në rrugën e tij. Një tjetër gjë është që ai nuk mërzitet për ndonjë mundësi të humbur. Ai gjithmonë duket gati për tjetrën. Ai ka aftësi të mira në ajër. Ka shpejtësi të mirë, dhe ai i bën ato vrapime diagonale duke u nisur nga mbrojtësi i parë dhe mbrapa mbrojtësit të dytë. Ai gjithashtu ka vullnet për të punuar në mbrojtje."

 

Hernández është djali i Javier Hernández Gutiérrez, i cili ka luatjur me tre klube të ndryshme në Meksikë dhe ka qënë pjesë e ekipit kombëtar në Kupën e Botës 1986. Hernández Gutiérrez hoqi dorë nga puna si trajneri i rezervave të C.D. Guadalajara vetëm për të parë djalin e tij të luante në në Kupën e Botës 2010 në Afrikën e Jugut. Hernández është nipi i Tomás Balcázar, i cili gjithashtu ka luajtur me Guadalajarën si dhe ka qënë pjesë e kombëtares Kupën e Botës 1954.

Më 26 maj 2012, Hernández u bë ambasadori meksikan për UNICEF, duke u bërë meksikani i tretë që shërben në këtë pozicion, pas César Costa dhe Julieta Venegas respektivisht në vitet 2004 dhe 2009. Si ambasador, ai do të merrte pjesë në disa aktivitete për të inkurajuar fëmijët dhe adoleshëntët që të mos braktisin shkollimin e tyre. Në një konferencë për shtyp, ai tha se ndihej "krenar dhe i përkushtuar".

Hernández është një i krishter i devotshëm. Ai njihet për ritualin e tij të zakonshëm para ndeshjeve, ku ai ulet në gjunjë dhe falet, një ritual të cilën e kryen në shumicën e ndeshjeve. Më 27 qershor 2013, EA Sports njoftoi se Hernández do të shfaqej në në kopertinën e videolojës FIFA 2014 të versionit të Amerikës së Veriut, sëbashku me yllin global Lionel Messi.

Pseudonimi

Hernández njihet zakonisht me pseudonimin Chicharito, që në shqip do të thotë bizelja e vogël, sepse babai i tij Javier Hernández Gutiérrez, kishte pseudonimin Chicharito (Bizelja) për shkak të syve të tij jeshile.

Klube

Redaktuar më 30 mars 2019

Kombëtarja

Redaktuar më 27 mars 2019

Klube

Guadalajara

• Primera División de México: Apertura 2006
• InterLiga: 2009

Manchester United

• Premier League: 2010–11, 2012–13
• FA Community Shield: 2010

Real Madrid

• FIFA Kupa e Botës për Klube: 2014

Kombëtarja

Meksika

• CONCACAF Kupa Gold: 2011
• Kupa CONCACAF: 2015

Personale

Çmime

• Balón de Oro – Sulmuesi më i mirë: Torneo Bicentenario 2010
• Sir Matt Busby Lojtari i Vitit: 2010–11
• Lojtari më i mirë i CONCACAF Kupa Gold: 2011
• IFFHS Lojtari më popullor i CONCACAF: 2011
• Lojtari i muajit në Bundesligë: nëntor 2015, dhjetor 2015, janar 2016, shtator 2016, shkurt 2017
• Idhulli i Bundesligës: 2015
• Ekipi i Sezonit i Bundesligës: 2015–16

Performanca

• Golashënuesi më i mirë në Primera División de México: Bicentenario 2010
• Golashënuesi më i mirë në CONCACAF Kupën Gold: 2011

• Profili zyrtar në Twitter
• Profili te ManUtd.com
• Profili te MedioTiempo.com
• Profili te National-Football-Teams.com
• Profili Arkivuar 20 dhjetor 2010 tek Wayback Machine te SoccerBase.com
• Profili te SoccerWay.com
• Profili te Goal.com
• Profili te TransferMarket.com
• Profili te ESPN.FC