വിട്രൂവിയൻ മാൻ

മനുഷ്യ ശരീരഘടനയിലുള്ള അനുപാതങ്ങളെക്കുറിക്കുന്നത് എന്ന നിലയിലാണ് ഡാവിഞ്ചിയുടെ ഈ രചനയുടെ പ്രശസ്തി. വെനീസിലെ അക്കാഡമിയ ആർട്ട് ഗ്യാലറിയിലാണ് നിലവിൽ ഇത് സൂക്ഷിക്കുന്നത്.

വിട്രൂവിയൻ മാൻ
കലാകാരൻ	ലിയൊനാർഡോ ഡാവിഞ്ചി
അളവുകൾ	34.4 cm × 25.5 cm (13.5 in × 10.0 in)

പേന കൊണ്ട് പേപ്പറിൽ വരച്ചിരിക്കുന്ന ഈ ചിത്രത്തിൽ ഒരു നഗ്നപുരുഷൻ കൈകളും കാലുകളും വിരിച്ചുവെച്ച് ഒരു ചതുരത്തിലും വൃത്തത്തിലും കൃത്യമായി വരത്തക്കവിധം നിൽക്കുന്നു. മനുഷ്യശരീരത്തിന്റെ ഘടനയിലെ അളവുകളിലേക്ക് വെളിച്ചം വീശുന്നവയാണ് ചിത്രത്തിന്റെ മുകളിലും താഴെയും ഉള്ള എഴുത്തുകൾ.

അത് പ്രകാരം:

• ഒരു മനുഷ്യന്റെ വിരിച്ചുവച്ചിരിക്കുന്ന കൈകളുടെ നീളം (ഇടത്തേയറ്റം മുതൽ വലത്തേയറ്റം വരെ) അവന്റെ ഉയരത്തിനോട് തുല്യമായിരിക്കും.
• തലയുടെ മുകളിൽ നിന്നും താടി വരെയുള്ള നീളം ആകെ ഉയരത്തിന്റെ എട്ടിലൊന്നിനോട് തുല്യമായിരിക്കും.
• നെഞ്ചിനുമുകളിൽ നിന്നും തലക്ക് മുകളിൽ വരെ ആകെ ഉയരത്തിന്റെ ആറിലൊന്നിനോട് തുല്യമായിരിക്കും.
• നെഞ്ചിനുമുകളിൽ നിന്നും മുടി വരെ ആകെ ഉയരത്തിന്റെ ഏഴിലൊന്നിനോട് തുല്യമായിരിക്കും.
• തോളിന്റെ വീതി ആകെ ഉയരത്തിന്റെ കാൽ ഭാഗത്തോട് തുല്യമായിരിക്കും.
• നെഞ്ച് മുതൽ തലക്ക് മുകളിൽ വരെ ആകെ ഉയരത്തിന്റെ കാൽ ഭാഗത്തോട് തുല്യമായിരിക്കും.
• കൈമുട്ട് മുതൽ വിരലറ്റം വരെയുള്ള അകലം ആകെ ഉയരത്തിന്റെ കാൽ ഭാഗത്തോട് തുല്യമായിരിക്കും.
• തോൾ മുതൽ കൈമുട്ട് വരെയുള്ള അകലം ആകെ ഉയരത്തിന്റെ എട്ടിലൊന്നിനോട് തുല്യമായിരിക്കും.
• കൈപ്പത്തിയുടെ നീളം ആകെ ഉയരത്തിന്റെ പത്തിലൊന്നിനോട് തുല്യമായിരിക്കും.
• ഒരാളുടെ ലിംഗം സ്ഥിതി ചെയ്യുന്നത് അയാളുടെ ഉയരത്തിന്റെ നേർപകുതിയിലായിരിക്കും.
• ഒരാളുടെ പാദത്തിന്റെ നീളം ആകെ ഉയരത്തിന്റെ ഏഴിലൊന്നിനോട് തുല്യമായിരിക്കും.
• ഒരാളുടെ പാദത്തിനു കീഴെ മുതൽ കാൽമുട്ടിനു കീഴെ വരെയുള്ള നീളം അയാളുടെ ആകെ ഉയരത്തിന്റെ നാലിലൊന്നായിരിക്കും.
• ഒരാളുടെ കാൽമുട്ടിനു കീഴെ മുതൽ ലിംഗം വരെയുള്ള നീളം അയാളുടെ ആകെ ഉയരത്തിന്റെ നാലിലൊന്നായിരിക്കും.