ಜ್ಯಾಕ್ಸನ್ವಿಲ್ - ಅಮೆರಿಕ ಸಂಯುಕ್ತ ಸಂಸ್ಥಾನಗಳಲ್ಲಿ ಫ್ಲಾರಿಡ ರಾಜ್ಯದ ಪ್ರಮುಖ ಬಂದರುನಗರ.
ಡೂವಲ್ ಕೌಂಟಿಯ ಆಡಳಿತ ಕೇಂದ್ರ.
ಸೇಂಟ್ಸ್ ಜಾನ್ಸ್ ನದಿಯ ದಂಡೆಯ ಮೇಲಿರುವ ಈ ಬಂದರು ಅಟ್ಲಾಂಟಿಕ್ ಸಾಗರದಿಂದ ಸು. 18 ಮೈ. ಒಳಗಿದೆ. ಇಲ್ಲಿಯ ಹಡಗುಕಟ್ಟಗಳ ಉದ್ದ ಸು. 80 ಮೈ. ಗೂ ಹೆಚ್ಚು. ಸಂಯುಕ್ತ ಸಂಸ್ಥಾನಗಳ ಆಗ್ನೇಯ ತುದಿಯಲ್ಲಿರುವ ಈ ಬಂದರಿಗೆ ದೇಶದ ಪ್ರಮುಖ ರೈಲು ಮತ್ತು ರಸ್ತೆಗಳ ಸಂಪರ್ಕವಿದೆ. ಮರದ ದಿಮ್ಮಿ ಮತ್ತು ಇತರ ಒಳನಾಡ ಉತ್ಪನ್ನಗಳನ್ನು ಈ ಬಂದರಿನ ಮೂಲಕ ರಫ್ತು ಮಾಡುತ್ತಾರೆ. ಪೆಟ್ರೊಲಿಯಂ, ರಾಸಾಯನಿಕಗಳು, ಕಚ್ಚಾ ಎಣ್ಣೆ, ಕಾಫಿ ಮುಂತಾದವನ್ನು ಇಲ್ಲಿಂದಲೇ ಆಮದಿಸುತ್ತಾರೆ. ಈ ಬಂದರು ಪ್ರಧಾನವಾಗಿ ನೌಕಾಸೈನ್ಯ ವಸ್ತುಗಳ ಉಗ್ರಾಣವಾಗಿದೆ. ನೌಕಾ ಪಡೆಗೆ ಬೇಕಾಗುವ ಬಹುಪಾಲು ಪದಾರ್ಥಗಳನ್ನು ಈ ಬಂದರಿನ ಮೂಲಕವೇ ಸಾಗಿಸಲಾಗುತ್ತದೆ. ಫ್ಲಾರಿಡದ ಸೈನಿಕ ಜಿಲ್ಲಾ ಕಚೇರಿಯಲ್ಲದೆ ಇಲ್ಲಿ ಸೈನಿಕ ವಿಮಾನ ನಿಲ್ದಾಣ ಮತ್ತು ಆಸ್ಪತ್ರೆಗಳಿವೆ. ಫ್ಲಾರಿಡ ರಾಜ್ಯದ ಪ್ರಮುಖ ಕೈಗಾರಿಕಾ ನಗರಗಳಲ್ಲಿ ಇದೂ ಒಂದು. ಅಣಿಕಟ್ಟು, ರಾಸಾಯನಿಕ ಗೊಬ್ಬರ - ಇಲ್ಲಿಯ ಪ್ರಮುಖ ಉತ್ಪನ್ನಗಳು. ಅನೇಕ ಮಾಂಸ ಸಂವೇಷ್ಟನ ಕಾರ್ಖಾನೆಗಳು ಇಲ್ಲಿವೆ. ಇಲ್ಲಿ ನೌಕಾ ನಿರ್ಮಾಣ ಮತ್ತು ದುರಸ್ತಿ ಕೆಲಸವೂ ನಡೆಯುತ್ತದೆ. ಎಡ್ವರ್ಡ್ ವಾಟರ್ಸ್ ಕಾಲೇಜು (1966), ಜೋನ್ಸ್ ಕಾಲೇಜು (1918), ಜ್ಯಾಕ್ಸನ್ವಿಲ್ ವಿಶ್ವವಿದ್ಯಾಲಯ (1934), ಜ್ಯಾಕ್ಸನ್ವಿಲ್ ಕಾಲೇಜ್ ಆಫ್ ಮ್ಯೂಸಿಕ್ - ಇವು ಇಲ್ಲಿಯ ಕೆಲವು ಮುಖ್ಯ ಶಿಕ್ಷಣ ಸಂಸ್ಥೆಗಳು. ಇದೇ ಹೆಸರಿನ ಅನೇಕ ನಗರಗಳು ಸಂಯುಕ್ತ ಸಂಸ್ಥಾನಗಳ ಬೇರೆಬೇರೆ ರಾಜ್ಯಗಳಲ್ಲೂ ಇವೆ.
16ನೆಯ ಶತಮಾನದ ಉತ್ತರಾರ್ಧದಲ್ಲಿ ಫ್ರೆಂಚ್ ಮತ್ತು ಸ್ಟ್ಯಾನಿಷ್ ವಲಸೆಗಾರರು ಈ ಪ್ರದೇಶದಲ್ಲಿ ವಸಾಹತುಗಳನ್ನು ಸ್ಥಾಪಿಸಿದರು. 1763ರಲ್ಲಿ ಇದನ್ನು ಬ್ರಿಟಿಷರು ವಶಪಡಿಸಿಕೊಂಡರು. 1816ರಲ್ಲಿ ಲೀವಿಸ್ ಹೊಗ್ಯಾನ್ಸ್ ಎಂಬಾತ ಇಲ್ಲಿಗೆ ಬಂದ (1816) ಮೊದಲ ವಲಸೆಗಾರ. ಕೌ ಫೋರ್ಡ್ ಎಂದು ಕರೆಯಲಾಗುತ್ತಿದ್ದ ಇದರ ಹೆಸರನ್ನು ಆಂಡ್ರ್ಯೂ ಜ್ಯಾಕ್ಸನನ ಗೌರವಾರ್ಥವಾಗಿ 1822ರಲ್ಲಿ ಬದಲಾಯಿಸಲಾಯಿತು.
This article uses material from the Wikipedia ಕನ್ನಡ article ಜ್ಯಾಕ್ಸನ್ವಿಲ್, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ವಿಶೇಷವಾಗಿ ಟಿಪ್ಪಣಿ ಮಾಡದಿದ್ದ ಹೊರತು ಪಠ್ಯ "CC BY-SA 4.0" ರಡಿ ಲಭ್ಯವಿದೆ. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ಕನ್ನಡ (DUHOCTRUNGQUOC.VN) is an independent company and has no affiliation with Wiki Foundation.