The Signpost
The Signpost (նախկինում The Wikipedia Signpost), Անգլերեն Վիքիպեդիայի լրագիր։ Կառավարում է Վիքիպեդիայի համայնքը, այն հրատարակվում է երկու շաբաթը մեկ՝ Վիքիպեդիայի խմբագիրների ներդրումներով։ Լրագիրը հրապարակում է Վիքիմեդիայի հանրության և Վիքիպեդիային առնչվող նորություններ, ներառյալ Արբիտրաժային հանձնաժողովի վճիռների, Վիքիմեդիա հիմնադրամի խնդիրների և Վիքիպեդիայի այլ քույր նախագծերի վերաբերյալ։
 | |
 The Signpost-ի շապիկը (փետրվար 24, 2016) | |
| Տեսակ | երկու շաբաթը մեկ |
|---|---|
| Ձևաչափ | օնլայն |
| Սեփականատեր | Վիքիպեդիայի համայնք |
| Հիմնադիր | Մայքլ Սնոու |
| Հրատարակիչ | Անգլերեն Վիքիպեդիա |
| Գլխավոր խմբագիր | Jayen466 և Pete Forsyth |
| Հիմնադրվել է | հունվար 10, 2005 |
| Լեզու | անգլերեն |
| Կայք | en.wikipedia.org/wiki/Wiki:Wikipedia_Signpost |
| Ազատ օնլայն արխիվ | Free online archives |
Ստեղծել է Վիքիպեդիացի Մայքլ Սնոուն 2005 թվականի հունվարին։ Սկզբնապես կոչվում էր The Wikipedia Signpost, սակայն հետագայում այս անվանումը կրճատվել և դարձել է The Signpost։ Սնոուն մինչև 2008 թվականի փետրվարը եղել է խմբագիր, երբ նշանակվել է Վիքիմեդիա հիմնադրամի հոգաբարձուների խորհրդի անդամ։
Նախկին գլխավոր խմբագիր The ed17-ը նշել է, որ իր պաշտոնավարման ընթացքում՝ 2012 թվականից մինչև 2015 թվական, հրապարակումների շրջանակը ընդլայնվել է՝ Վիքիպեդիայից և իր համայնքից բացի ներառելով ամբողջ Վիքիմեդիա շարժումը։ 2015 թվականի հունվարին Վիքիպեդիայի խմբագիրներ Gamaliel-ը և Go Phightins!-ը փոխարինեցին The ed17-ին գլխավոր խմբագրի պաշտոնում։ Համայնապատկերի ազատության մասին օրենքի 2015 թվականի հունիսի փոփոխությունների վերաբերյալ The Signpost-ի հրապարակումը մի շարք հրատարակությունների համար հավելյալ տեղեկության աղբյուր է եղել։
The Signpost-ը «Սոցիոլոգիական ֆորում»-ի, Interface հանդեսի և New Review of Academic Librarianship–ի համար ակադեմիական հետազոտությունների առարկա է եղել։ Լոս Ալամոսի ազգային լաբարատորիայի և Դարթմութի քոլեջի հետազոտողների համար հանդիսացել է Վիքիպեդիայի մասին տվյալների աղբյուր։ Այն լուսաբանվել է Նյու Յորք Թայմսում, The Register-ում, Nonprofit Quarterly-ում ևHeise Online-ում։
Պատմություն
Առաջին անգամ հրատարակվել է 2005 թվականի հունվարին The Wikipedia Signpost անվամբ, սակայն հետագայում անվանափոխվել է The Signpost։ Ստեղծել է Վիքիպեդիայի խմբագիր, հետագայում Վիքիմեդիա հիմնադրամի հոգաբարձուների խորհրդի անդամ Մայքլ Սնոուն։ Նմանատիպ նախագծի օրինակներ են Wikipedia:Announcements-ը Անգլերեն Վիքիպեդիայում, որը ստեղծվել է 2001 թվականի նոյեմբերի 20-ին, Wiki News-ը Մետա-Վիքիում (2002 թվականի նոյեմբերի 14) և Wiki-Kurier-ը Գերմաներեն Վիքիպեդիայում (2003 թվականի դեկտեմբերի 10)։
Սնոունը առաջին թողարկման մեջ գրում է՝ «Հույս ունեմ՝ սա նորությունների արժանի աղբյուր կլինի այն մարդկանց համար, որոնք հետաքրքրված են Վիքիպեդիայի հանրության անցուդարձով» և նշել է, որ The Signpost անվանումը կապված է քննարկման էջերում մասնակիցների ստորագրելու հետ։ Սնոուն 2005 թվականի օգոստոսից մինչև 2008 թվականի փետրվարը եղել է The Signpost-ի խմբագիր։ Ral315-ը փոխարինել է Սնոուին որպես խմբագիր՝ իր առաջին հրապարակման մեջ գրելով՝ «Ես անձամբ ուզում եմ շնորհակալություն հայտնել Մայքլին Signpost-ում իր աշխատանքի համար։ Սա հիանալի միտք էր, և Վիքիպեդիացիներին իրոք օգնեց տեղեկանալ, թե ինչ է կատարվում Վիքիպեդիայում»։ 2007 թվականին նա անցկացրել է հարցում The Signpost-ի վերաբերյալ, ըստ այդ հարցման՝ The Signpost-ը շաբաթական մոտավորապես 2,800 ընթերցող ունի։
2008 թվականի հուլիսի 7-ին Ral315-ը The Signpost-ի մի հրապարակման մեջ ընդունում է, որ Վիքիմեդիա հիմնադրամի խնդրանքով կամ պահանջով, լրագիրը որոշել է չհրապարակել հիմնադրամի դեմ գործող դատավարության վերաբերյալ պատմությունը։ Ըստ խմբագրի՝ «Ես զգում եմ, որ սա ցավալի, բայց անհրաժեշտ քայլ էր», լրագրի և Վիքիմեդիա հիմնադրամի կապի պատճառով դատավարության մասին հոդվածը «Կարող էր գործի վրա ծանր ազդեցություն ունենալ»։ Ral315-ը որոշման հետագա ազդեցության մասին մտահոգություն է հայտնում․ «Ես դեռ բավականին անհանգիստ եմ այս իրավիճակի պատճառով, քանի որ սա առաջին դեպքն էր, երբ ես ճնշում եմ զգացել Վիքիմեդիա հիմնադրամից որևէ նյութ չհրապարակելու համար։ Սա նաև վտանգավոր նախադեպ կարող է լինել, հույս ունեմ, որ այն միայն առավել լուրջ դեպքերում կկրկնվի»։
The Signpost-ի 200-րդ թողարկումը եղել է 2008 թվականի նոյեմբերին։ Ընդհանուր առմամբ 181 մասնակիցների կողմից գրվել է 1,731 հոդված։ 2009 թվականի փետրվարին Ragesoss մասնակիցը դարձավ խմբագիր։ Ragesoss-ը 2010 թվականին հրաժարական է տվել՝ պաշտոնը թողնելով HaeB-ին։ Նույն թվականին ձևավորվել են քույր պարբերականներ, ներառյալ The Wikipedia Weekly-ը և The Wikizine-ը։
HaeB-ը հրաժարակն է տվել 2011 թվականի հուլիսին՝ Վիքիմեդիա հիմնադրամում աշխատանքի անցնելուց հետո։ Երեք ժամանակավոր գլխավոր խմբագիրներից հետո՝ 2012 թվականի մայիսին, The ed17 մասնակիցը դարձավ The Signpost-ի ութերորդ գլխավոր խմբագիրը։ The International Business Times-ը 2013 թվականի մի հոդվածում նշում է, որ The Signpost-ի հետախուզական լրագրությունը բացահայտել է Wiki-PR ընկերության և Վիքիպեդիայում հետաքրքրությունների բախման միջև կապ։
The Signpost-ի 2015 թվականի՝ Եվրոպայում համայնապատկերի ազատության հեղինակային իրավունքի սահմանփակումների փոփոխության մասին հրապարակումը մի քանի լեզվով հրատարակություններ օգտագործել են որպես տեղեկության աղբյուր (անգլերեն, գերմաներեն, իտալերեն, լեհերեն և ռուսերեն):
Gamaliel և Go Phightins! մասնակիցները 2015 թվականի հունվարին դարձել են The Signpost–ի գլխավոր խմբագիրներ։ The ed17–ը նշել է, որ իր պաշտոնավարման ընթացքում լրագիրը ընդլայնել է իր շրջանակները՝ Անգլերեն Վիքիպեդիայից բացի լուսաբանելով նաև ամբողջ Վիքիմեդիա շարժումը։ 10-ամյակին նվիրված 2015 թվականի հետահայաց հրապարակման մեջ Gamaliel-ը ընդգծում է, որ լրագրի հետագա բարելավումները կախված են Վիքիպեդիայի համայնքի մասնակցությունից և համագործակցությունից, և օգտատերերին հրավիրում է խմբագիրների թիմին միանալ։ Go Phightins!-ը և Gamaliel-ը, որպես գլխավոր խմբագիր, իրենց առաջին գրառման մեջ խոսում են The Signpost-ի եզակի դերի մասին, և նշում, որ կշարունակեն Վիքիմեդիա հիմնադրամից անկախ մարմին լինել։
Վիքիմեդիա հիմնադրամի հոգաբարձուների խորհրդի անդամ Արննոն Գերշուրիի դեմ անվստահության քվեի մասին հրապարակման մեջ Fortune պարբերականը հիմնվում է The Signpost-ի վրա։
Բովանդակություն
The Signpost–ը անվճար հրատարակում է Վիքիպեդիայի համայնքի, Վիքիմեդիա հիմնադրամի և Վիքիպեդիայի քույր նախագծերի վերաբերյալ նորություններ։ Վիքիպեդիայի հանրությունը ղեկավարում է լրագիրը, որը 2016 թվականի հուլիսից հրատարակվում է երկու շաբաթը մեկ՝ խմբագիրների սակավության պատճառով։ Նորությունների մասին ընթերցողները կարող են տեղեկանալ էլեկտրոնային նամակով կամ Վիքիպեդիայի իրենց մասնակցային էջում։
Լրագիրը Վիքիպեդիայի խմբագիրներին տեղեկացնում է հանրագիտարանի հոդվածների բարելավմանն ուղված ընթացիկ համատեղ նախագծերի և Վիքիպեդիայի վերաբերյալ վերջին գիտական հետազոտությունների մասին։ The Signpost-ը նաև մանրամասնում է Անգլերեն Վիքիպեդիայի արբիտրաժային հանձնաժողովի գործողությունները։
The Signpost-ի արխիվները հասանելի են հանրությանը, ինչը հեշտացնում է Վիքիպեդիայի պատմության ուսումնասիրությունը։
Վերլուծություններ
2009 թվականին «Սոցիոլոգիական ֆորում» գիտական հանդեսում Պիոտր Կոնիեչնին The Signpost-ը ներկայացնում է որպես Վիքիպեդիայի համայնքի մեջ գտնվող ենթահամայնքի օրինակ։ Նույն թվականին Կոնիեչնին նշում է The Signpost-ը որպես «այս կազմակերպությունների հարստության և կոմպլեքսության մաս», որտեղ անհատները կարող են կամավորությամբ աշխատել կայքի համար։
Լոս Ալամոսի Ազգային լաբորատորիայի և Դարթմութի քոլեջի հետազոտողները հիմնվել են Signpost–ի արխիվների վրա՝ 2001 թվականի IEEE/WIC/ACM միջազգային կոնֆերանսի ժամանակ Վիքիպեդիայի խմբագրման վերաբերյալ իրենց եզրակացությունները ներկայացնելիս։ New Review of Academic Librarianship հանդեսում 2013 թվականին՝ Վիքիպեդիայի և բարձրագույն կրթության մեջ իր հռչակի վերաբերյալ հետազոտությունում Ջեմա Բեյլիսը ստուգել է Signpost–ի Թվիթթերյան լրահոսը իր հետազոտության ժամանակին արված լինելը հաստատելու համար։
Ընդունում
Եթե դու կարծում ես, որ շարունակելու ես խմբագրել Վիքիպեդիայում... բաժանորդագրվիր... The Wikipedia Signpost-ին։
2017 թվականին The New York Times-ը The Signpost-ին անվանում է «մակետված լրագիր», Վիքիպեդիայի ռետրո ոճի առանձնահատկությամբ։ 2008 թվականին իր «Վիքիպեդիա. պակասող ձեռնարկը» գրքում Ջոն Բրոուտնը խորհուրդ է տալիս The Signpost-ը Վիքիպեդիայի ձգտող խմբագիրների համար կարևոր ընթերցանություն. «Եթե դուք նախատեսում եք ցանկացած երկարությամբ շարունակել խմբագրել Վիքիպեդիայում, բոլոր միջոցներով բաժանորդագրվեք... The Wikipedia Signpost-ին»։
«Fortune» ամսագիրը The Signpost-ն անվանել է «Վիքիպեդիայի իրազեկ ամսագիր»։ 2016 թվականի The Register-ի հոդվածում գործադիր խմբագիր Էնդրյու Օրլովսկին The Signpost-ը նկարագրում է որպես «Վիքիպեդիայի սեփական անվախ լրաթերթ»։ Ըստ «Ars Technica»-ի տեխնիկական քաղաքականության խմբագիր Ջո Մուլինի՝ 2016 թվականի փետրվարին Վիքիմեդիա Հիմնադրամի որոնողական համակարգի համար Նայթ հիմնադրամի «Գիտության շարժիչ» գրանտի մասին փաստաթղթերը արտահոսել և տպագրվել են The Signpost-ում։ «Գիտելիքի շարժիչ»-ի մասին գրելիս Nonprofit Quarterly-ի գլխավոր խմբագիր Ռուֆ ՄաքՔեմբրիջը ընթերցողներին խորհուրդ է տվել կարդալ The Signpost-ի հոդվածը՝ «ավելի լավ հասկանալու համար, թե ինչ էր պլանվորվում»։ Heinz Heise ամսագրում իր հոդվածում Թորսթեն Քլեյսը գրում է՝ «Երբ կապի պաշտոնական հիմքերը սպառվում են, The Signpost-ը ... անհայտ տվյալների վրա լույս է սփռում և տեղեկացված քննարկում է նախաձեռնում»։
Ծանոթագրություններ
Գրականություն
Արտաքին հղումներ
 | Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել The Signpost կատեգորիայում։ |
This article uses material from the Wikipedia Հայերեն article The Signpost, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Բովանդակությունը թողարկված է CC BY-SA 4.0 թույլատրագրով, եթե այլ բան նշված չէ։ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Հայերեն (DUHOCTRUNGQUOC.VN) is an independent company and has no affiliation with Wiki Foundation.