Leucocito: Células sanguíneas que defenden o organismo contra substancias estrañas ou axentes infecciosos

Interveñen na defensa do organismo contra substancias estrañas ou axentes infecciosos (antíxenos). Orixínanse na medula ósea e no tecido linfático.

Os leucocitos son células móbiles que se atopan no sangue transitoriamente. Forman a fracción celular dos elementos figurados do sangue. A diferenza dos eritrocitos (ou glóbulos vermellos), non conteñen pigmento, polo que se coñecen como glóbulos brancos.

Son células con núcleo, mitocondrias e outros orgánulos celulares. Son capaces de se mover libremente mediante pseudópodos. O seu tamaño oscila entre os 8 e 20 microns. O seu tempo de vida varía dende algunhas horas, meses e ata anos. Estas células poden saír dos vasos sanguíneos a través dun mecanismo chamado diapédese (prolongan o seu contido citoplasmático), o que lles permite desprazarse fóra do vaso sanguíneo e poder ter contacto cos tecidos do interior do corpo.

Segundo a forma do núcleo clasifícanse en:

• Polimorfonucleares: o seu núcleo adoita estar lobulado (xeralmente en tres segmentos).
• Monomorfonucleares: presentan un núcleo compacto e individualizado.

A observación a través do microscopio permitiu clasificalos segundo as súas características en:

• Granulocitos: presentan gránulos no citoplasma, con núcleo arredondado e lobulado, formados nas células nai da medula ósea: eosinófilos, basófilos e neutrófilos.

•  
  Neutrófilo
•  
  Eosinófilo
•  
  Basófilo.

• Agranulocitos: non presentan gránulos no seu citoplasma: linfocitos, monocitos e macrófagos. No caso dos linfocitos, algúns subtipos poden presentar granulacións.

•  
  Linfocito

A pesar destas clasificacións e diferenzas entre os leucocitos, todos se relacionan cos mecanismos defensivos do organismo.

Outros artigos

• Leucocitose
• Leucopenia
• Leucemia

Ligazóns externas

• Sangue, células do sangue e coagulación (en portugués)