William Shakespeare

Al nassè a Stratford-upon-Avon e al è considerât il plui grant scritôr di lenghe inglese e un dai plui grancj dramaturcs dal mont. Il so cognon si lu cjate ancje intes formis Shakspere, Shaksper, Shaxper, e Shake-speare, par vie dal fat che l'inglês no veve ancjemò une grafie standardizade in chê volte.

I siei gjenitôrs, John Shakespeare e Mary Arden a vevin vot fîs, che Shakespeare al jere il tierç, e il prin mascli. John Shakespeare al jere un comerciant di lanis, coreans e guants, in po ancje conseîr comunâl (alderman).

William al le par sîs mês inte scuele elementâr e, di cuant che al veve dîs agns, a la scuele secondarie, dulà che i forin insegnâts i autôrs latins. Plui tart, lis condizions economichis de so famee a declinarin e nol podè frecuentâ i studis universitaris. Tal 1582, a disevot agns, al sposà Anne Hathaway di 26 agns, e cun jê al ve tres fiis, Susannah, Hamnet e Judith.

Tal 1587 Shakespeare al scomence a lavorâ a Londre come atôr di teatri. La sô prime opare leterarie e fo un poeme erotic dal titul "Venus e Adonis", scrit tal 1593. Daurman e rivà la peste, par cui i teatris a scugnirin sierâ par cirche doi agns. Al è in chê volte che il cont di Southampton, Henry Wriothesly al deventà il so protetôr. Cuant che i teatris a tornarin a vierzi, tal 1594, Shakespeare si associà cun la companie dal Lord Chamberlain, cusin de regjine. Di chest moment, Shakespeare al otignarà dute une schirie di sucès, che a saran refudâts e criticâts dai siei contemporanis di plui alt nivel culturâl, e che a consideravin lis sôs oparis e dut il teatri un intrateniment volgâr.

Ai 20 di Otubar dal 1596 al comprà un titul nobiliâr pal pari e ai 4 di Mai 1597 une cjase a Stratford. So mari, Mary Arden, e murì ai 9 di Novembar di chel an. Daspò vê scrit La Tampieste, Shakespeare al vivè ritirât a Stratford cun la sô famee, volint dome integrâsi cu la piçule borghesie locâl. Tal so testament, fat ai 25 di Març 1616, al lassà dutis lis sôs propietâts ai siei dissendents, e cualchi robe par trê atôrs (Richard Burbage, John Heminges e Henry Condell) e pe so femine. Al murì ai 23 di Avrîl dal 1616, a cincuantedoi agns.

Al fo soterât ai 25 di Avrîl tal presbiteri de glesie di Stratford. I siei compagns, siet agns plui tart, i daran il miôr omaç, publicant dutis lis sôs oparis intun libri, che al sarà la base di dutis lis edizions sucessivis e ancje de fame imortâl dal poete inglês.

Tragjediis

• Romeu e Juliete (Romeo and Juliet)
• Macbeth
• Il re Lear (King Lear)
• Amlet (Hamlet)
• Otel (Othello)
• Tît Andronic (Titus Andronicus)
• Juli Cesar (Julius Caesar)
• Antoni e Cleopatre (Antony and Cleopatra)
• Coriolan (Coriolanus)
• Troilus e Cressida (Coriolanus)
• Timon di Aten (Timon of Athens)

Comediis

• Dut al è ben chel che finis ben (All's Well That Ends Well)
• Cemût che us plâs (As You Like It)
• Insium di une gnot di mieç Istât (A Midsummer Night's Dream)
• Tant rumôr par nuie (Much Ado About Nothing)
• Misure par misure (Measure for Measure)
• La ruspiose domade (The Taming of the Shrew)
• La decime seconde gnot (Twelfth Night, or What You Will)
• Il marcjadant di Vignesie (The Merchant of Venice)
• Lis legris comaris Windsor (The Merry Wives of Windsor)
• Lis fadiis dal amôr perdût (Love's Labour's Lost)
• I doi zentiloms di Verone (The Two Gentlemen of Verona)
• La comedie dai erôrs (The Comedy of Errors)

Oparis storichis

• Indrì III
• Indrì II
• Indrì VI
• Indrì V
• Indrì IV
• Indrì VIII
• Il re Zuan
• Eduart III

Oparis tardis

• Pericli, princip di Tir (Pericles, Prince of Tyre)
• Cimbelin (Cymbeline)
• La conte di Invier (The Winter's Tale)
• La tampieste (The Tempest)

Opare atribuide a Shakespeare

• I doi nobii cavalîrs (The Two Noble Kinsmen)