Sjepseskare: Egiptiese farao

Sommige kenners glo hy het van omstreeks 2455 tot 2448 v.C. regeer. Sy troonnaam beteken "Edel is die siel van Ra".

Sjepseskare
Sjepseskare Isi, Sisires
Farao van die 5de Dinastie
Periode	Omstreeks 2463-2445 v.C.
Voorganger	Neferirkare (?)
Opvolger	Neferefre (?)
Sjepseskare in Egiptiese hiërogliewe
Praenomen of troonnaam Nomen of geboortenaam
Portaal    Antieke Egipte

Hy is een van die farao's met die kortste bewind en sommige Egiptoloë soos die Tsjeg Miroslav Verner glo hy het net ’n paar maande lank regeer na aanleiding van sy onvoltooide piramide by Aboesir, waarvan die basis skaars voltooi was voor werk gestaak is, asook vanweë die min artikels wat die koning noem. Tog dui sowel die Turynse Koningslys as Manetho sy bewind as sewe jaar aan.

Die enigste bekende artefakte uit Sjepseskare se bewind is ’n paar kleiseels van Aboesir, waar die koning moontlik begrawe is, en twee silinderseels volgens Verner. Verner glo ook Sjepseskare het Neferefre opgevolg en was nie sy voorganger nie, na aanleiding van die ontdekking in 1982 van verskeie nuwe kleiseels met Sjepseskare se naam Horus Sechemkaoe in die oudste deel van Neferere se dodetempel by Aboesir wat nie gebou was voor Neferefre se dood nie. Dit dui daarop dat Sjepseskare ná Neferefre moes regeer het. Hy meen die feit dat Sjepseskare in die Egiptiese koningslys as Neferefre se voorganger aangedui word, kan wees vanweë die politieke wanorde en dinastiese dispute van dié tyd.

Sjepseskare kon die seun van Sahoere gewees het wat vir ’n kort ruk die mag oorgeneem het ná Neferefre se voortydige dood. Verner lê klem daarop dat werk aan Sjepseskare se piramide, tussen die Piramide van Sahoere en die sontempel van Oeserkaf, onderbreek is baie kort nadat dit begin het, ná ’n paar weke of hoogstens ’n maand of twee. Hy glo die koning wou met die ligging van die piramide sy verwantskap aan óf Sahoere óf Oeserkaf wys.

• Egiptiese konings
•   Hierdie artikel is vertaal uit die Engelse Wiki