瓦特

呢度講梗發明家，國際單位請睇瓦 (單位)。

瓦特喺1736年1月19號出世喺蘇格蘭嘅格里諾克（Greenock），佢爸爸係一個造船商同執政官。瓦特細個身體潺弱，喺屋企由媽媽教導，之後喺文法學校學習拉丁文、希臘文同數學。佢喺父親嘅工作坊度學到好多船隻用嘅儀器，佢自己亦都製作模型同埋熟悉船隻儀器。

1759年，瓦特嘅朋友約翰·羅比遜（John Robison）同佢提到使用蒸汽作為動力嘅方法。當時嘅紐科門蒸汽機已經喺礦井度用嚟抽水差唔多有50年，但係設計上幾乎冇咩改變。雖然瓦特從未見過一部運作緊嘅蒸汽機，但係佢開始進行蒸汽實驗。佢試過製作一個模型，但係效果唔好，不過佢仍然堅持實驗同研究呢個領域，並且閱讀有關蒸汽機嘅所有資料。佢開始明白潛熱嘅重要性，潛熱係指喺恆溫過程中釋放或者吸收嘅熱能，呢個概念係佢嘅朋友祖些夫布拉克喺幾年前發現嘅。當時對於蒸汽機嘅理解仍然非常初級，因為熱力學嘅科學知識直到將近100年後先正式建立起來。

1763年，有人要求瓦特修理一部屬於大學嘅紐科門蒸汽機。即使修理完，呢部蒸汽機仍然效果唔理想。經過多次實驗，瓦特發現每個循環中大約有四分之三嘅蒸汽熱能被用嚟加熱汽缸，而呢個過程係浪費熱能嘅。因為喺循環後期，會注入冷水去凝結蒸汽，從而降低壓力。所以，汽缸會反覆加熱同埋冷卻，導致大部分熱能浪費，而唔係轉化為機械能。

瓦特喺1765年5月喺格拉斯哥綠地公園（Glasgow Green Park）度，有個關鍵嘅領悟。佢於是設計咗獨立冷凝器同閥門裝置，避免咗浪費能量，大大提升蒸汽機嘅功率、效率同埋成本效益。之後，佢再將蒸汽機改進，令佢可以產生旋轉運動，大大擴展咗蒸汽機嘅應用範圍，唔止可以用嚟抽水，重可以用喺各種工業機械，甚至火車、輪船都可以有足夠嘅動力驅動。

瓦特嘗試將佢嘅發明商業化，但係唔成功，重一度面臨經濟困難，直到1775年同馬修·保頓（Matthew Boulton）組成合夥公司－Boulton and Watt。呢間新公司最後非常成功，令瓦特成為有錢佬。

瓦特改良嘅蒸汽機大大推動咗工業革命，為咗紀念佢嘅偉大貢獻，功率單位「瓦特」就係用佢嚟命名。

2011年，英倫銀行發行嘅新50鎊銀紙就印咗瓦特同保頓嘅頭象同佢哋嘅金句。