Anila Sulstarova

Anila ka studiuar në Fakultetin e Shkencave Sociale dhe në 2011-n mori doktoratën me disertacionin “Maksimalizimi i funksioneve të hemisferës së djathtë të trurit, përmes ndërhyrjes diadike, tek foshnjat 0-10-muajshe në institucion”, ndërsa punimi i saj shkencor në nivelin master ka qenë “Etika në këshillim”. Ajo ka kryer specializime të ndryshme brenda dhe jashtë vendit, ku veçohet specializimi në Universitetin e Nebraskas (SHBA), me fokus depistimin e sjelljeve prosociale tek adoleshentët dhe psikoterapi individuale.

Që prej vitit 2001, Sulstarova punon si psikologe klinike dhe prej 2005-s e është pedagoge në departamentin e pedagogjisë dhe psikologjisë të Universitetit të Tiranës. Është titullare e disa lëndëve, si “Terapia familjare: parimet dhe metodat klinike”,“Praktikum në terapi arti dhe loje”, “Këshillimi i familjes”, “Psikologji e zhvillimit të adoleshencës”, “Kuptimi i dhunës dhe i agresivitetit” në programet e studimit “Bachelor në psikologji”, “Master i shkencave në psikologji klinike”, “Master i shkencave në psikologji shkollore”, “Master profesional në këshillim”. Anila është edhe lektore në Shkollën e Magjistraturës të Republikës së Shqipërisë si dhe ka përvoja mësimdhënieje jashtë Shqipërisë, si në SHBA, Portugali etj.

Anila është aktive në media, kryesisht në emisione radiofonike që lidhen me mirërritjen e fëmijëve dhe sfidat e prindërimit. Është aktiviste për mbrojtjen e të drejtave të njeriut, fëmijëve, grave dhe komunitetit LGBTQI+.

• Milika Dhamo dhe Anila Sulstarova, “Etika në këshillim”, Ideart, ISBN 99943-679-4-3; ISBN 9789994367948, shkurt 2006, ribotuar në 2008
• Anila Sulstarova (dhe bashkautorë), “Fokusi te gjinia për analizën e përmbajtjes së teksteve shkollore elementare”, shtator 2005, Aleanca Femërore
• Anila Sulstarova, Gerda Sula, “Doracak prindërimi. Nga lindja deri përpara se të hyjnë në shkollë”, fondacioni “Shqipëria e hapur për Shqipërinë”, Tiranë, 2015