ଅନେକ ଶରତ

ପାଶ୍ଚାତ୍ୟ ସାହିତ୍ୟ ଓ ସଂସ୍କୃତି ସହ ଗଭୀର ଭାବେ ପରିଚିତ ସୀତାକାନ୍ତ ମହାପାତ୍ର କବିର ଆଖି ନେଇ ଏଇ ତିନୋଟି ପୂର୍ବ ୟୁରୋପୀୟ ଦେଶର ସମାଜ, ଚଳଣି, ସଂସ୍କୃତି, କବିତା ଇତ୍ୟାଦିକୁ ଦେଖିଛନ୍ତି । ତାଙ୍କର ଗଭୀର ବିଶ୍ଲେଷଣାତ୍ମକ ଦୃଷ୍ଟିଭଙ୍ଗୀ, ସୃଜନଶୀଳ ଆଭିମୁଖ୍ୟ ଓ କବି ସୁଲଭ ଆତ୍ମ-ନିରୀକ୍ଷଣ ବହିଟିର ପ୍ରତିଟି ପୃଷ୍ଠାରେ ପ୍ରତିଫଳିତ । ଏଥିରେ ଆମେ ଭେଟୁ ରେନେସାଁର ପ୍ରଥମ ଅଭ୍ୟାସ ରୂପେ ମାସିଡୋନିଆର ପାନ୍ତଲେଜମନ୍‌ର ଚମତ୍କାର ଫ୍ରେସ୍କୋଙ୍କୁ; ରୋମନିଆର ରାଜଧାନୀ, ପୂର୍ବ ଇଉରୋପର ପ୍ୟାରିସ ଭାବେ ଖ୍ୟାତ ବୁକୁରେସ୍ତିକୁ ତଥା ରୋମାନିଆର ରିଭିଏରାକୁ । ଆମେ ଭେଟୁ କକେସସ୍ ପର୍ବତମାଳା ଓ ସାଇବେରିଆର ଅନ୍ତହୀନ ବିସ୍ତୃତିରେ ପୃଥିବୀର ଗଭୀରତମ ବୈକାଲ ହ୍ରଦକୁ ଓ ଇରକୁଟ୍‌ସ୍କ ସହରକୁ । ଭେଟୁ ସଂସ୍କୃତିର ପ୍ରାଣକେନ୍ଦ୍ର ଲେନିନ୍‌ଗ୍ରାଡ଼ରେ ଜାରଙ୍କ କାରାଗାରରେ ବନ୍ଦୀ ଦସ୍ତାଭିକଙ୍କ ପାଦର ଶିକୁଳୀକୁ; ତରବାରୀ ସଙ୍ଘାତରେ ମରିଶୋଇଥିବା ପୁସ୍‌କିନ୍ ଓ ଲେର୍‌ମାଣ୍ଟୋଭଙ୍କୁ ।