Tambov Oblast

Tambovskaja oblast
   

Flagg Våpen
Hovudstad	Tambov
Areal	Rangering: 63. 34 462 km² 0,2
Innbyggjartal - totalt - folketettleik	Rangering: 46. ca. 1 092 000 (2010) ca. 31,7/km²
Føderalt distrikt	Sentrale
Økonomisk region	Sentrale Svartjord
Regionsnummer	68
Offisielt språk	Russisk
Guvernør	Oleg Ivanovitsj Betin
Nasjonalsong	Prosjtsjanije slavjanki
Tidssone	UTC +0300

Tambov oblast (russisk Тамбовская область) er ein provins i Russland og eit av føderasjonssubjekta i den russiske føderasjonen. Hovudstaden er Tambov, arealet er 34 462 km² og innbyggjartalet er 1 092 100 (2010).

 

Tambov oblast ligg sentralt på den aust-europeiske sletta, søraust for Moskva. Landskapet er hovudsakleg flatt, høgste punktet ligg 214 meter over havet. Om lag 10 % av området er skogkledd. Middeltemperaturen er -10 grader celsius i januar og 20 grader celsius i juli. Det finst ikkje nemneverdige naturressursar i provinsen. Elvene Tsna, Vorona og Lesnoj Voronezj renn gjennom området.

Det store fleirtalet av folket i provinsen er etniske russarar. Ved folketeljinga i 2010 var den etniske fordelinga:

• Russarar: 95,0 %
• Ukrainarar: 0,7 %

Som i Russland som heilskap går folketalet i Tambov oblast òg nedover, og har minka med 17,0 % frå 1989 til 2010:

• 1989: 1 315 300
• 2002: 1 178 443
• 2010: 1 092 000

58,7 % av folket bur i byar. Den einaste større byen er Tambov, med 280 200 ibuarar. ⁽²⁰¹⁰⁾

Dei første folkeslaga som er kjent i området som no er Tambov oblast var tyrkiske folkeslag og mordvinar. På 1200-talet vart området underlagt det mongolske riket, og vart etter kvart del av riket til Den gylne horden. På 1500-talet byrja russarar å slå seg ned i området. På 1600-talet vart det bygd festningar her, Kozlov i 1635 og Tambov i 1636, for å verna storfyrstedømet Moskva mot åtak frå krimtatarane og nogaiane i sør. Dette gjorde at folkesetjinga av området med russiske nybyggjarar auka på. Frå 1779 var byen Tambov senter for ein eigen provins.

Under den russiske revolusjonen kom området under Sovjetmakta i januar 1918. I 1920-21 vart alvorlege bondeopprør i provinsen slått ned av Den raude arméen.

Tambov oblast vart oppretta som eigen provins den 27. september 1937.

Oleg Betin har vore guvernør i Tambov oblast sidan 1999, då han slo den sitjande kommunistiske guvernøren Aleksandr Rjabov. Ved valet til provinsforsamlinga i 2005 kom tre parti over sperregrensa på 7 %:

• Sameint Russland: 40,5 %
• Den russiske føderasjonens kommunistiske parti: 20,0 %
• Russlands liberaldemokratiske parti: 9,7 %

Guvernøren, Oleg Betin, er medlem i Sameint Russland.

• Tambov oblast sine nettsider Arkivert 2016-08-02 ved Wayback Machine. (ru)
• Artikkel frå NUPI (en)
• Artikkel frå Kommersant Arkivert 2008-01-23 ved Wayback Machine. (en)

  Denne geografiartikkelen er ei spire. Du kan hjelpe Nynorsk Wikipedia gjennom å utvide han.