ബിപൻ ചന്ദ്ര: ബിപൻ chandra
ഇന്ത്യൻ സ്വാതന്ത്ര്യസമരകാലഘട്ടത്തെകുറിച്ചും രാഷ്ട്രീയത്തെകുറിച്ചും നിരവധി പുസ്തകങ്ങൾ രചിച്ച ചരിത്രകാരനാണ് ബിപൻ ചന്ദ്ര (27 മേയ് 1928 - 30 ഓഗസ്റ്റ് 2014).
പദ്മഭൂഷൺ ലഭിച്ചിട്ടുണ്ട്.
ബിപൻ ചന്ദ്ര | |
|---|---|
 ബിപൻ ചന്ദ്ര | |
| ജനനം | മേയ് 27, 1928 |
| മരണം | 2014 ഓഗസ്റ്റ് 30 |
| ദേശീയത | ഇന്ത്യൻ |
| തൊഴിൽ | ചരിത്രകാരൻ |
ജീവിതരേഖ
പഴയ പഞ്ചാബിൽ ഇപ്പോൾ ഹിമാചൽ പ്രദേശിന്റെ ഭാഗമായ കാംഗ്ര വാലിയിൽ 1928ലായിരുന്നു ബിപിൻ ചന്ദ്രയുടെ ജനനം. ലാഹോറിലെ ഫോർമാൻ ക്രിസ്റ്റ്യൻ കോളേജിൽ നിന്ന് ബിരുദം നേടിയ ശേഷം കാലിഫോർണിയയിലെ സ്‌റ്റാൻഫോർഡ്‌ യൂണിവേഴ്‌സിറ്റിയിലും ഡൽഹി യൂണിവേഴ്സിറ്റിയിലുമായി ഉപരിപഠനം നടത്തി.
എൻക്വയറി എന്ന പ്രസിദ്ധീകരണത്തിന്റെ പത്രാധിപ സമിതി അംഗമായി പ്രവർത്തിച്ചു. ഇന്ത്യൻ ഹിസ്റ്ററി കോൺഗ്രസിന്റെ മേഖലാ പ്രസിഡന്റും പിന്നീട്‌ ജനറൽ പ്രസിഡന്റുമായി. ജെഎൻയു വിൽ സെന്റർ ഫോർ ഹിസ്റ്റോറിക്കൽ സ്‌റ്റഡീസിന്റെ അധ്യക്ഷനും യൂണിവേഴ്‌സിറ്റി ഗ്രാന്റ്‌സ്‌ കമ്മിഷൻ അംഗവുമായിരുന്നിട്ടുണ്ട്‌. നാഷനൽ ബുക്ക്‌ ട്രസ്‌റ്റ്‌ ചെയർമാനായി എട്ടു വർഷം പ്രവർത്തിച്ചു.1985ലെ ഇന്ത്യൻ ചരിത്ര കോൺഗ്രസിന്റെ അധ്യക്ഷനായിരുന്നു.
ഇടതുപക്ഷ പ്രസ്ഥാനങ്ങളുമായി അടുത്ത ബന്ധം പുലർത്തിയിരുന്ന ബിപിൻ ചന്ദ്ര, ചരിത്രമേഖല കാവിവൽക്കരിക്കാനുള്ള ശ്രമങ്ങൾക്കെതിരെ നിരന്തര ചെറുത്തു നിൽപ്പു നടത്തി. മാർക്സിസ്റ്റ് ചരിത്ര വിശകലനരീതി ഉപയോഗിച്ച്, റൊമില ഥാപ്പർ, കെ.എൻ. പണിക്കർ, ആർ.എസ്. ശർമ്മ, ഇർഫാൻ ഹബീബ്, സതീഷ് ചന്ദ്ര എന്നിവർക്കൊപ്പം ആധുനിക ഇന്ത്യയുടെ ചരിത്രം രേഖപ്പെടുത്തുന്നതിൽ വിലപ്പെട്ട സംഭാവനകൾ നൽകി. ഇന്ത്യാ സ്ട്രഗിൾ ഫോർ ഇൻഡിപെൻഡന്റ്സ് എന്ന ബിപൻ ചന്ദ്രയുടെ ഗ്രന്ഥത്തിൽ കയ്യൂർ, മടിക്കൈ, കരിവെള്ളൂർ, ഉദിനൂർ, കൊടക്കാട് തുടങ്ങി വടക്കൻ കേരളത്തിലെ ഗ്രാമീണപോരാട്ടങ്ങളുടെ ചരിത്രം വിശകലനം ചെയ്യുന്നുണ്ട്.
കൃതികൾ
- 'ദ റൈസ് ആൻഡ് ഗ്രോത്ത് ഒഫ് ഇക്കണോമിക് നാഷണലിസം '
- 'ജനാധിപത്യത്തിന്റെ നാമത്തിൽ'
- 'ഇന്ത്യ സ്വാതന്ത്ര്യത്തിന് ശേഷം'
- 'ഇന്ത്യയിലെ ഇടതുപക്ഷം ഒരു വിമർശനം'
- 'ഇന്ത്യയുടെ സ്വാതന്ത്ര്യസമരം'
- 'ദ ജെ.പി മൂവ്മെൻറ് ആൻഡ് ദ എമർജൻസി’
- ‘നാഷനലിസം ആൻഡ് കൊളോണിയലിസം ഇൻ മോഡേൺ ഇന്ത്യ’
- ‘ദ മേക്കിങ് ഓഫ് മോഡേൺ ഇന്ത്യ: ഫ്രം മാർക്സ് ടു ഗാന്ധി’
വിമർശനങ്ങൾ
സ്വാതന്ത്ര്യത്തിനു ശേഷമുള്ള ഇന്ത്യ, സ്വാതന്ത്ര്യത്തിനുവേണ്ടിയുള്ള ഇന്ത്യയുടെ സമരം എന്നീ പുസ്‌തകങ്ങളിൽ സ്വീകരിച്ച കോൺഗ്രസ്‌ വിരുദ്ധ നിലപാടുകളുടെ പേരിൽ വിമർശനത്തിനിരയായി.
പുരസ്കാരങ്ങൾ
- പദ്മ ഭൂഷൺ
- ഏഷ്യാറ്റിക് സൊസൈറ്റി ഓഫ് ബിഹാറിൻെറ ഇതിഹാസ് രത്ന പുരസ്കാരം
അവലംബം
This article uses material from the Wikipedia മലയാളം article ബിപൻ ചന്ദ്ര, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). പ്രത്യേകം പറയാത്ത പക്ഷം ഉള്ളടക്കം CC BY-SA 4.0 പ്രകാരം ലഭ്യം. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki മലയാളം (DUHOCTRUNGQUOC.VN) is an independent company and has no affiliation with Wiki Foundation.