Sinuratan A Siriliko: Alpabetiko a sistema ti panagsurat

Daytoy ket naibatay iti Nasapa a Siriliko, a naparang-ay idi Umuna nga Imperio ti Bulgaria idi las-ud ti maika-10 a siglo AD idiay Literario nga Eskuela ti Preslav. Daytoy ket batayan dagiti alpabeto nga inus-usar kadagiti nadumaduma a pagsasaos, iti napalabas ken agdama, kadagiti paset ti Balkano ken Akin-amianan a Eurasia, a naipangpangruna kadagiti Eslabo a taudan, ken dagiti saan a pagsasao nga Eslabo a naimpluensiaan babaen ti Ruso. Manipud idi 2011 adda dagiti agarup a 252 a riwriw a tattao idiay Eurasia nga agus-usar iti daytoy a kas ti opisial nga alpabeto para kadagiti nailian a pagsasao. Agarup a kagudua dagitoy ket adda idiay Rusia. Ti Siriliko ket maysa kadagiti kaaduan a naus-usar a sistema ti panagsurat iti lubong.

Siriliko
Kita	Alpabeto
Sasao	Nailian a sinuratan ti:  Bielorusia  Bosnia ken Herzegovina  Bulgaria  Kazakhstan  Kirgistan  Amianan a Macedonia  Mongolia  Montenegro  Rusia  Serbia  Tayikistan  Ukrania (kitaen ti Sassao nga agus-usar ti Siriliko)
Panawen	Kasapaan a kaykaruay ket adda idi circa 940
Sistema ti nagannak	Hieroglipiko ti Ehipsio Sinuratan a Proto-Sinaitiko Alpabeto a Penisio Alpabeto a Griego Siriliko
Sistema ti kabsat	Alpabeto a Latin Alpabeto a Koptiko Alpabeto nga Armenio Alpabeto a Georgiano Alpabeto a Glagolitiko
ISO 15924	Cyrl, 220Cyrs (Karuay ti Daan a Simbaan nga Eslabo)
Turong	Agpakanawan
Alias ti Unicode	Cyrillic
Sakop ti Unicode	U+0400–U+04FF Cyrillic U+0500–U+052F Cyrillic Supplement U+2DE0–U+2DFF Cyrillic Extended-A U+A640–U+A69F Cyrillic Extended-B
Aglaon daytoy nga artikulo kadagiti simbolo ti ponetiko ti IPA. No awan ti maitunos a suporta ti panangipaay, mabalin a makitam dagiti marka-ti-saludsod, kahon, wenno sabali pay a simbolo imbes a dagiti karakter ti Unicode.

Ti Siriliko ket naibatay manipud iti sinuratan nga uncial a Griego, a natiponan babaen kadagiti ligatura ken dagiti konsonante manipud iti naduduog a alpabeto a Glagolitiko ken Daan a Simbaan nga Eslabo para kadagiti uni a saan a mabirukan iti Griego. Daytoy ket nanaganan a kas pamamdayaw kadagiti dua a Bisantino a Griego nga agkabsat a lalaki, ni Santo Cirilo ken Metodio, nga isuda ti kasapaan a nagpartuat ti alpabeto a Glagolitiko. Dagiti moderno nga eskolar ket namatmatida a ti Siriliko ket naparang-ay idi ken naikeddeng babaen dagiti nasapa a disipulo ni Cirilo ken ni Metodio.