Imagine Dragons

Imagine Dragons
Հիմնական տվյալներ
Երկիր	Լաս Վեգաս
Ժանրեր	ինդի-ռոք
Գործունեություն	2008 թվականից մինչ օրս
Լեյբլ	Interscope Records KIDinaKORNER
Պարգևներ	Ամերիկյան երաժշտական մրցանակաբաշխություն 2013 Billboard Music Awards Swiss Music Awards 2015? և The Center's Honorarium Honorees?
Կայք	imaginedragonsmusic.com
Անդամներ
Դեն Ռեյնոլդս Բեն Մակկի Վեյն Սերմոն Դեն Պլատցման
Նախկին անդամներ
Էնդրյու Տոլման Բրիտաննի Տոլման
Imagine Dragons Վիքիպահեստում

Խմբի երկրորդ ստուդիական ալբոմը՝ Smoke + Mirrors (2015) առաջին հորիզոնականն է զբաղեցրել ԱՄՆ-ում, Կանադայում և Մեծ Բրիտանիայում։ Ալբոմին հաջորդել են թոփ 40-յակում տեղ զբաղեցրած I Bet My Life սինգլը և երկրորդ և երրորդ սինգլները՝ Gold և Shots։ Այնուհետև խումբն իրականցրել է 10-ամսյա համաշխարհային շրջագայություն, որից հետո 2016 թվականին կարճատև ընդմիջում վերցրել՝ հազվադեպ ելույթ ունենալով և տարվա ընթացքում սաունդրեքներ ներկայացնելով։ Խումբը, այնուհետև, թողարկել է իր երրորդ ստուդիական ալբոմը՝ Evolve (2017), որից երեք սինգլներ՝ Believer, Thunder և Whatever It Takes չարթերի թոփում են եղել՝ դարձնելով նրանց Billboard Hot Rock երգերի չարթում ամենաշատ շաբաթներն առաջին հորիզոնական զբաղեցրած խումբը։ Շատ երկրներում ալբոմը եղել է թոփ հնգյակում։ Evolve World Tour-ն ավարտելուց հետո Imagine Dragons-ը թողարկել է իր չորրորդ ստուդիական ալբոմը՝ Origins-ը, 2018 թվականին նոյեմբերի 8-ին։ Ալբոմից առաջինը թողարկվել են Natural և Zero սինգլները, այնուհետև՝ Machine և Bad Liar սինգլները։ Ալբոմի դելյուքս տարբերակում ներառվել է նախկինում թողարկված Born to Be Yours վերնագրով սինգլը։

Imagine Dragons-ը երեք անգամ հաղթել է Ամերիկյան երաժշտական մրցանակաբաշխությունում, ինն անգամ՝ Billboard Music Awards-ում, մեկ անգամ՝ Գրեմմի մրցանակաբաշխությունում, մեկ անգամ՝ MTV երաժշտական տեսահոլովակի մրցանակաբաշխությունում և մեկ անգամ՝ Համաշխարհային երաժշտական մրցանակաբաշխությունում։ 2014 թվականի մայիսին խումբը ներկայացվել է 14 Billboard երաժշտական մրցանակի, այդ թվում՝ Տարվա լավագույն արտիստ և Milestone մրցանակի, որը ճանաչում է արտիստների ստեղծագործականությունն ու նորարարությունը տարբեր ժանրերում։ 2018 թվականի ապրիլին խումբը ևս 11 անգամ առաջադրվել է Billboard երաժշտական մրցանակաբաշխությունում։

Imagine Dragons-ը Ձայնագրող ընկերությունների ամերիկյան ասոցիացիայի կողմից վավերացված 35 միլիոն սինգլ է վաճառել ԱՄՆ-ում և 20 միլիոն ալբոմ աշխարհում։ 2018 թվականին Imagine Dragons-ը եղել է Spotify-ում ամենալսված խումբը և առաջին ռոք խումբը, որի երկու երգերը՝ Believer և Thunder, յուրաքանչյուրն անցել է մեկ միլիարդ սթրիմինգը։ Imagine Dragons-ը Billboard-ի հիթ-շքերթներում ունի 2010-ականների լավագույն երեք ռոք երգերը՝ Believer, Thunder և Radioactive։

Վաղ տարիներ (2008-2011)

2008 թվականին գլխավոր երգիչ Դեն Ռեյնոլդսը Բրիգհեմ Յանգի համալսարանում հանդիպել է հարվածային գործիքների երաժիշտ Էնդրյու Թոլմանին, որտեղ երկուսն էլ սովորում էին։ Ռեյնոլդսը և Թոլմանին են միացել Էնդրյու Բեքը, Դեյվ Լեմկին և Ավրորա Ֆլորենսը՝ համապատասխանաբար նվագելու կիթառ, բաս և դաշնամուր։ Խմբի անունը անագրամա է, որը հայտնի է միայն խմբի անդամներին։ Այս սկզբնական խումբը նույն տարում թողարկել է Speak to Me մինի ալբոմը, սակայն Բեքն ու Ֆլորենսը դուրս են եկել խմբից նույն թվականին։ 2009 թվականին Թոլմանի ավագ դպրոցի ընկեր Վեյն Սերմոնը, ով ավարտել էր Բերքլիի երաժշտության քոլեջը, միացել է խմբին՝ որպես կիթառահար։ Այնուհետև Թոլմանի կինն է միացել խմբին՝ Բրիտանի Թոլմանը՝ ստեղնաշարային գործիքներ նվագելու և որպես բեք վոկալիստ, որից հետո խումբը կրկին սկսել է ելույթ ունենալ։ Ավելի ուշ Լեմկին լքել է խումբը, որից հետո Սերմոնի առաջարկով խմբին է միացել Բերքլիի համալսարանի երաժշտության բաժնի ուսանողներից Բեն Մըքքին՝ որպես բասիստ։ Իրենց հայրենի Պրովո քաղաքում (Յուտա) խումբը բավականին հետևորդներ է հավաքել մինչև Լաս Վեգաս տեղափոխվելը, որը Դեն Ռեյնոլդսի հայրենի քաղաքն էր։ Այստեղ էլ խումբը ձայնագրել և թողարկել է իր առաջին երեք մինի ալբոմները։

Խումբը թողարկել է մինի ալբոմներ՝ Imagine Dragons և Hell and Silence 2010 թվականին՝ երկուսն էլ ձայնագրելով Լաս Վեգասում՝ Battle Born Studios-ում։ 2011 թվականին վերադարձել են ստուդիա, իսկ երրորդ մինի ալբոմը՝ It’s Time, ստեղծվել է մինչև գործարք կնքելը։

Նրանց առաջին մեծ քայլը եղել է 2009 թվականին, երբ Train խմբի գլխավոր երգիչ Փեթ Մոնահանը հիվանդացել է Bite of Las Vegas փառատոնից անմիջապես առաջ։ Imagine Dragons-ը հրավիրվել է նրանց փոխարեն և ելույթ ունեցել ավելի քան 26 000 հանդիսատեսի առաջ։ Տեղական պարգևները, այդ թվում՝ «2011 թվականի լավագույն CD» (Vegas SEVEN), «2010 թվականի տեղական լավագույն ինդի խումբ» (Las Vegas Weekly), «Լաս Վեգասի նոր, պարտադիր դիտելու լայվ ելույթ» (Las Vegas CityLife), 2010 թվականի Վեգասի երաժշտական գագաթնաժողովի գլխագիր և այլն, դրական ազդեցություն են ունեցել խմբի ճանաչման համար։ 2011 թվականի նոյեմբերին Interscope Records-ի հետ պայմանագիր են ստորագրել և սկսել են աշխատել անգլիական Գրեմմիի մրցանակակիր պրոդյուսեր Ալեքս դա Քիդի հետ։ Ի վերջո Թոլմանները լքել են խումբը և Դանիել Պլատցմանը միացել է խմբին 2011 թվականի օգոստոսին՝ Բեն Մըքքիի հրավերով, նախքան 2011 թվականին լեյբլի գործարքի ստորագրումը։

Night Visions (2012-2014)

Խումբն աշխատել է Ալեքս դա Քիդի հետ՝ ձայնագրելով և թողարկելով իրենց առաջին խոշոր լեյբլը Վեսթ Հոլիվուդում՝ Westlake Recording Studios-ում։ Continued Silence վերնագրով մինի ալբոմը թողարկվել է Վալենտինի օրը (2012 թվականի փետրվարի 14-ին) և զբաղեցրել է Billboard 200-ի 40-րդ հորիզոնականը։ 2012 թվականին խումբը թողարկել է Hear Me մինի ալբոմը։

Կարճ ժամանակ անց It’s Time սինգլն է թողարկվել՝ զբաղեցնելով Billboard Hot 100-ի 15-րդ հորիզոնականը։ Սինգլի տեսահոլովակը թողարկվել է 2012 թվականի ապրիլի 17-ին MTV-ով և այնուհետև առաջադրվել MTV երաժշտական տեսահոլովակի մրցանակի՝ «Լավագույն ռոք տեսահոլովակ» անվանակարգում։ It’s Time սինգլը Ձայնագրող ընկերությունների ամերիկյան ասոցիացիայի կողմից ճանաչվել է կրկնակի պլատինե սինգլ։

2012 թվականի ամռանը խումբն ավարտին է հասցրել իրենց դեբյուտային Nights Visions ալբոմի ձայնագրման աշխատանքները Studio X-ում՝ ԱՄՆ-ում թողարկելով ալբոմը 2012 թվականի սեպտեմբերի 4-ին։ Billboard 200-ում ալբոմը զբաղեցրել է 2-րդ հորիզոնականը՝ առաջին շաբաթվա ընթացքում վաճառվելով 83 000 օրինակ՝ 2006 թվականից ի վեր դառնալով ամենաբարձր դիրք զբաղեցրած դեբյուտային ռոք ալբոմը։ Ալբոմն առաջին տեղն է զբաղեցրել Billboard ալտերնատիվ և ռոք ալբոմների չարթերում, ինչպես նաև թոփ տասնյակում է եղել Ավստրալիայի, Ավստրիայի, Կանադայի, Նիդերլանդների, Գերմանիայի, Իռլանդիայի, Նորվեգիայի, Պորտուգալիայի, Շոտլանդիայի, Իսպանիայի և Մեծ Բրիտանիայի ալբոմների չարթերում։ Այն հաղթել է Billboard երաժշտական մրցանակաբաշխությունում՝ որպես Լավագույն ռոք ալբոմ և առաջադրվել է Juno մրցանակ՝ տարվա միջազգային ալբոմի համար։ Ալբոմում երեք սինգլ տեղ է զբաղեցրել Billboard Top 40-ում, 4 սինգլ՝ ARIA Top 40-ում, 5 սինգլ՝ UK Top 40-ում։

 

Ալբոմի երկրորդ սինգլը՝ Radioactive, Billboard ալտերնատիվ երգերի, Billboard ռոք երգերի և շվեդական սինգլների չարթում զբաղեցրել է առաջին տեղը՝ ԱՄՆ-ում վաճառվելով 7 միլիոն օրինակով և ռեկորդային ցուցանիշ գրանցելով Billboard Hot 100-ում մնալով 87 շաբաթ։ Radioactive սինգլը Hot Rock երգերի չարթում ռեկորդային ցուցանիշ է գրանցել՝ մնալով 23 շաբաթ շարունակ և 2013 թվականին դառնալով այդ ժանրի ամենամեծ հիթ։ Այս սինգլը ամենալավ վաճառվող ռոք երգն է եղել Nielsen SoundScan-ի թվային պատմության մեջ։ Մինչև 2013 թվականի վերջը Radioactive սինգլից վաճառվել է 3 միլիոն օրինակ։ Rolling Stone-ն այն կոչել է «տարվա լավագույն ռոք հիթ»։ 2013 թվականին ԱՄՆ-ում Spotify-ով ամենաշատ լսված երգն է։ 56-րդ Գրեմմի մրցանակաբաշխության ժամանակ այն առաջադրվել է Գրեմմի մրցանակների՝ որպես Տարվա ձայնագրություն և Լավագույն ռոք ելույթ՝ հաղթելով վերջին անվանակարգում։ 2015 թվականին Ձայնագրող ընկերությունների ամերիկյան ասոցիացիայի կողմից ճանաչվել է ադամանդե սինգլ՝ ԱՄՆ-ում վաճառվելով ավելի քան 10 մլն օրինակով։ Demons երրորդ սինգլը Billboard փոփ երգերի ցանկում զբաղեցրել է առաջին հորիզոնականը, իսկ Billboard Hot 100-ում՝ 6-րդ՝ մինչ օրս ԱՄՆ-ում վաճառվելով 5 մլն օրինակով։

Billboard-ը ճանաչել է նրանց՝ որպես «2012 թվականի ամենափայլուն նոր աստղեր», իսկ ավելի ուշ՝ որպես «2013 թվականի բեկումնային խումբ»։ 2014 թվականին Imagine Dragons-ը Billboard երաժշտական մրցանակաբաշխության ժամանակ հաղթել է Թոփ դուետ/խումբ, Թոփ հոթ 100 արտիստ և Թոփ ռոք արտիստ անվանակարգերում։ Amazon.com-ը խումբը անվանել է իրենց՝ «2012 թվականի ամենասիրելի ռոք արտիստ»։

2013 թվականին Imagine Dragons-ը վերադարձել է Եվրոպա և Հյուսիսային Ամերիկա Night Visions շրջագայությամբ։ Խումբը հայտարարել է ԱՄՆ-ում 13 հավելյալ ամառային շրջագայությունների օրերը, որոնց համար տոմսերը նույնպես ամբողջությամբ վաճառվել են։ Այնուհետև խումբը հայտարարել է Հյուսիսային Ամերիկայում ամֆիթատրոնային շրջագայության մասին։

Խումբը 2013 թվականի ապրիլին թողարկել է լայվ ալբոմ՝ Live at Independent Records։

Smoke + Mirrors (2014–2016)

 

Նրանց երկրորդ ստուդիական ալբոմի, որը նրանք կոչում են իրեն «Ամանորյա խոստումը», հիմնական գաղափարն էր ստեղծել երաժշտություն և ավարտել այն, երբ խումբը կզգար, որ գործն ավարտվել է։ Night Visions-ի շրջագայությունից սկսած՝ խումբը նոր նյութեր էր գրում հաջորդ ալբոմի համար և նույնիսկ շրջագայության սկզբում ձայնագրում էր ալբոմի դեմոները՝ մինչ ստուդիա մտնելը։ Մինչ ալբոմի վրա աշխատելու համար ստուդիա մտնելը, խումբն արդեն ուներ 50 դեմոներ։

Նախքան ալբոմի թողարկումը, Imagine Dragons-ը թողարկում է մի շարք սինգլներ տարբեր նածագծերի համար, այդ թվում՝ երգ «Տրանսֆորմերներ։ Բնաջնջման դարաշրջանը» ֆիլմի համար՝ Battle Cry (2014 հունիս) և Լեգենդների լիգայի 2014 թվականի աշխարհի առաջնության համար Warriors երգը (2014 սեպտեմբեր)։

Հոկտեմբերի 24-ին խումբը Facebook-ում և Instagram-ում փոքր հատվածներով ներկայացրել է առաջիկա ալբոմի գլխավոր երգը՝ I Bet My Life: Այն թողարկվել է հոկտեմբերի 27-ին։

Աշխատելով Metric-ի հետ, որը ստեղծել էր երեք երգից բաղկացած ակուստիկ հավաքածու, Imagine Dragons-ը նվագել է Լոս Անջելեսի Mayan Theater-ում 2015 թվականի փետրվարի 5-ին։ Կես ժամանոց հավաքածուն ներառում էր Night Visions-ից It's Time և Radioactive երգերը։ Այս ելույթի ընթացքում առաջին անգամ լայվ ներկայացվել են Smoke + Mirrors ալբոմից Summer և I'm So Sorry, ինչպես նաև Gold և I Bet My Life երգերը։ Ալբոմը թողարկվել է 2015 թվականի փետրվարի 17-ին։ 2015 թվականին խմբի հյուսիսամերիկյան շրջագայությունը սկսել է հունիսի 3-ին Պորտլենդում (Օրեգոն)։

Շրջագայության ընթացքում Imagine Dragons-ը թողարկել է երկու սինգլ, որոնք որևէ ալբոմի մեջ ներառված չեն։ Roots սինգլը թողարկվել է 2015 թվականի օգոստոսի 26-ին, իսկ I Was Me-ն՝ 2015 թվականի հոկտեմբերի 12-ին iTunes-ով։ 2015 թվականի դեկտեմբերի 18-ին՝ 2015 թվականի նոյեմբերին Փարիզի ահաբեկչական հարձակման զոհերի որպես աջակցություն՝ խումբը թողարկել է Eagles of Death Metal խմբի I Love You All the Time երգի քավըր տարբերակը։ Smoke + Mirrors շրջագայությունն ավարտվել է 2016 թվականի փետրվարի 5-ին Ամստերդամում։

2016 թվականի մարտի 2-ին խումբը թողարկել է համերգային ֆիլմ (ցուցադրելով մեկ գիշեր միայն)՝ Imagine Dragons In Concert: Smoke + Mirrors, նախապես որոշված թատրոններում։ Ֆիլմ այնուհետև թողարկվել է DVD և Blu-Ray տարբերակով՝ Imagine Dragons: Smoke + Mirrors Live վերնագրով:

Evolve (2016-2018)

 

2016 թվականի սեպտեմբերի 27-ին Imagine Dragons-ը հայտարարել է երրորդ ստուդիական ալբոմի մասին՝ պարզապես թվիթ տեղադրելով ընդամենը մեկ բառ՝ «ստուդիա»։ Խումբը հաջորդ 4 ամիսների ընթացքում շարունակել է Թվիթերում տեղադրել գաղտնի մեսիջներ։ 2017 թվականի հունվարի 28-ին խումբը սկսել է հրապարակել մի շարք տեսահոլովակներ, որոնք ներկայացնում էին ալբոմի առաջին սինգլի թիզերը։ Կարճ տեսահոլովակներում վոկալիստ Դեն Ռեյնոլդսը սյուրռեալիստական պատկերներ է նկարում։ Տեսահոլովակներում թաքնված էր Մորզեի կոդ, որը թարգմանվում էր «նույն գույնի առարկաներ»։

2017 թվականի փետրվարի 1-ին Imagine Dragons-ը թողարկել է ալբոմի գլխավոր սինգլը՝ Believer․ Believer սինգլն օգտագործվել է Nintendo Switch-ի համար՝ որպես Super Bowl-ի գովազդի մաս։ Imagine Dragons-ը եղել է Օրո-Մեդոնտում (Օնտարիո) տեղի ունեցող Wayhome ամառ 2017-ի կազմում։ 2017 թվականի ապրիլի 27-ին Imagine Dragons-ը թողարկել է Thunder սինգլը՝ որպես իրենց երրորդ ալբոմի երկրորդ սինգլ։ 2017 թվականի մայիսի 8-ին Imagine Dragons-ը հայտարարել է ստուդիական երրորդ ալբոմի մասին՝ Evolve, ինչպես նաև նույն օրը թողարկել է նոր երգ՝ Whatever It Takes: Նույն օրվա ընթացքում նաև հայտարարվել է շրջագայության մասին, որը տեղի է ունեցել 2017 թվականի սեպտեմբերից մինչև 2018 թվականի սեպտեմբերը՝ տեղի ունենալով աշխարհի 33 երկրներում։

Evolve ալբոմը թողարկվել է 2017 թվականի հունիսի 23-ին։ Ալբոմն աշխարհի երկրների մեծ մասում թոփ հնգյակում է եղել, սակայն դրա ընդունելությունը շատ խառը քննադատությունների է արժանացել։ Խումբը հուլիսի 8-ին հանդես է եկել Պորտուգալիայում տեղի ունեցող NOS Alive փառատոնին։ Մի քանի ամսի անց՝ 2017 թվականի հոկտեմբերի 6-ին, Whatever It Takes-ը պաշտոնապես թողարկվել է որպես սինգլ նոր ալբոմից։ 2018 թվականին երգը հաղթել է MTV երաժշտական տեսահոլովակի մրցանակաբաշխության Լավագույն ռոք տեսահոլովակ անվանակարգում։ 2018 թվականի փետրվարի 14-ին Imagine Dragons-ը Թվիթերում ներկայացրել է իր նոր սինգլի վերնագիրը՝ Next to Me: 2018 թվականի փետրվարի 21-ին երգը թողարկվել է որպես վերաթողարկված Evolve ալբոմի մաս։

Origins (2018–2020)

2018 թվականի հունիսի 12-ին Imagine Dragons-ը Թվիթերում հայտարարել է Kygo-ի հետ համագործակցությամբ նոր սինգլի մասին՝ Born to Be Yours: Երգը թողարկվել է 2018 թվականի հունիսի 15-ին։ 2018 թվականին Imagine Dragons-ը դարձել է նաև Rogue կիբեռսպորտի թիմի համատեր։

2018 թվականի հուլիսի 12-ին Imagine Dragons-ը Թվիթերում ներկայացրել է մեկ այլ սինգլի վերնագիր՝ Natural: Երգը թողարկվել է 2018 թվականի հուլիսի 17-ին։ Երգն օգտագործվել է որպես 2018 թվականի ESPN College Football-ի հիմն։ 2018 թվականի սեպտեմբերի 18-ին Imagine Dragons-ը ներկայացրել է մի նոր երգի վերնագիր՝ Zero, որը թողարկվել է հաջորդ օրը։ Երգն օգտագործվել է Walt Disney Animation Studios-ի Ռալֆն ընդդեմ ինտերնետի անիմոցիոն ֆիլմի վերջում։

2018 թվականի հոկտեմբերի 3-ին Imagine Dragons-ը հայտարարել է ստուդիական չորրորդ ալբոմի՝ Origins-ի մասին, որը թողարկվել է 2018 թվականի նոյեմբերի 9-ին։ Natural և Zero երգերը, ալբոմի գլխավոր սինգլներն են, մինչդեռ Born to Be Yours-ը տեղ է գտել ալբոմի համաշխարհային դելյուքս տարբերակում։ Խումբն այս ալբոմը ներկայացրել է որպես Evolve-ի քույր ալբոմ։ 2018 թվականի հոկտեմբերի 31-ին Imagine Dragons-ը թողարկել է ալբոմի երրորդ սինգլը՝ Machine: Ի վերջո, 2018 թվականի նոյեմբերի 6-ին Imagine Dragons-ը թողարկել է ալբոմի չորրորդ երգը՝ Bad Liar:

2019 թվականի հունվարի 7-ին Imagine Dragons-ը ելույթ է ունեցել 2019 թվականին College Football Championship-ի խաղին։ Խումբը կատարել է Natural, Bad Liar, Thunder երգերն ու Believer երգի հատուկ տարբերակը Լիլ Վեյնի հետ։ Հաջորդը թողարկվել է երգի այս նոր տարբերակը։

2019 թվականի հունիսին Beat Games-ը թողարկել է վճարելի ներբեռնվող երաժշտական փաթեթ վիրտուալ իրականության երաժշտական խաղի համար՝ Beat Saber, որը կոչվում էր Imagine Dragons-ի երաժշտական փաթեթ և ներառում էր խմբի տասը երգերը։

2019 հունիսի 20-ին Imagine Dragons-ը թողարկել է ալբոմի 5-րդ սինգլը՝ Birds՝ իտալացի երգիչ Էլիզայի հետ միասին։ 2019 թվականի հուլիսի 23-ին երգի բնօրինակ տարբերակի համար թողարկվել է անիմացիոն տեսահոլովակ։

2019 թվականի դեկտեմբերին Ռեյնոլդսը հայտարարել է, որ որոշ ժամանակով դադարեցնում է երգեր գրել և պրոդյուսերություն անել, որպեսզի կենտրոնանա հայրության վրա։

2020 թվականի հունվարի 20-ին խումբը թողարկել է Nothing Left to Say սինգլի տեսահոլովակը․ երգը իրենց դեբյուտային Night Visions ալբոմից է։

Mercury – Act 1 (2021–մինչ օրս)

2021 թվականի մարտի 8-ին Imagine Dragons-ը սոցիալական մեդիայում հայտարարել է երկու նոր սինգլների թողարկման մասին՝ Follow You և Cutthroat, որոնք թողարկվել են մարտի 12-ին։ Դրանք նոր՝ Mercuty – Act 1 ստուդիական 5-րդ ալբոմի գլխավոր երգերն են։ Ալբոմը թողարկվել է 2021 թվականի սեպտեմբերի 3-ին։

2021 թվականի հունիսի 29-ին խումբը ներկայացրել է նոր սինգլի վերնագիրը՝ Wrecked, որը թողարկվել է հուլիսի 2-ին։ Երգը նվիրված է Դեն Ռեյնոլդսի հանգուցյալ հարսին, ով մահացել է՝ պայքարելով քաղցկեղի դեմ։

Imagine Dragons-ի երաժշտական ոճը նկարագրվում է որպես էլեկտրոփոփ, փոփ ռոք, փոփ, ինդի փոփ, արենա ռոք, EDM, R&B, ալտերնատիվ ռոք, ինդի ռոք, սինթ փոփ, դանս փոփ, թրիփ հոփ և սոֆթ ռոք։ Նրանց երաժշտություն ունի նաև ֆոլքի, ֆոլք փոփի, դաբսթեփի, սոուլի և հիփ-հոփի ազդեցություն։

Դեն Ռեյնոլդսը նշել է, որ իր և իր խմբի վրա արտիստիկ ազդեցություն են ունեցել Arcade Fire, Nirvana, Muse, The Beatles, Coldplay, Linkin Park, U2 խմբերը և Պոլ Սայմոնն ու Հարի Նիլսոնը։ Ռեյնոլդսը ալտերնատիվ փոփ երաժշտությունը առևտրային հաջողության նոր մակարդակի հասցնելու գործում գնահատում է այնպիսի խմբերի դերակատարումը, ինչպիսիք են Foster the People-ը և Mumford & Sons-ը։

Հեռուստասերիալներ և ֆիլմեր

Խումբը ելույթ է ունեցել Live from the Artists Den (2013) հեռուստասերիալի 6-րդ սեզոնի եզրափակիչ սերիայում։ 2013 թվականի հոկտեմբերի 24-ին Imagine Dragons հյուրընկալվել է truTV-ի Impractical Jokers-ի մեկ էպիզոդի, որտեղ պարտված Ջոն և Սալը պետք է կատարեին Señora Lanza-ի բացման գործողությունը Jones Beach Theater-ում։ Խմբի անդամները միացել են Մուրին (Murr) և Q-ին։ Imagine Dragons-ը հայտնվել է 2015 թվականի The Muppets-ի առաջին էպիզոդում՝ կատարելով Roots երգի մի հատված։

Խումբը ձայնագրել է Battle Cry սինգլը Տրանսֆորմերներ։ Բնաջնջման դարաշրջանը ֆիլմի համար, որը ֆիլմաշարի 4-րդ ֆիլմն է։ Սինգլն ավելի ուշ ներառվել է խմբի ստուդիական երկրորդ ալբոմի՝ Smoke + Mirrors-ի (2015) սուպեր դելյուքոս տարբերակում։

2016 թվականի ապրիլի 28-ին խումբը գրել է Not Today երգը՝ որպես Ես՝ քեզնից առաջ ֆիլմի սաունդթրեք։ Խումբը նաև Ինքնասպանների ջոկատը ֆիլմի սաունդթրեքում է հայտնվել Լիլ Վեյնի, Վիզ Խալիֆայի, Logic-ի, Ty Dolla Sign-ի և X Ambassadors-ի հետ․ երգը կոչվում է Sucker for Pain։

Խումբը նաև ձայնագրել է Levitate երգը գիտաֆանտաստիկ Ուղևորները ֆիլմի համար։

Zero երգը խումբը ձայնագրել է Ռալֆն ընդդեմ ինտերնետի անիմացիոն ֆիլմի համար։ Երգը հնչում է ֆիլմի վերջում։ Խումբը նաև էպիզոդիկ հայտնվել է ֆիլմի մի դրվագում, որտեղ դիտում է Ռալֆի առցանց հրապարակած մի տեսանյութ։

Սինգլների խթանում

Imagine Dragons-ը կատարել է It's Time երգը մի շարք հեռուստաշոուների ժամանակ՝ The Tonight Show with Jay Leno (2012), Jimmy Kimmel Live! (2012), Late Night with Jimmy Fallon (2012), և Conan (2013): Նրանք կատարել են Radioactive երգը Jimmy Kimmel Live! (2012), The Late Show with David Letterman (2013), The Tonight Show with Jay Leno (2013), Late Night with Jimmy Fallon (2013) հեռուստաշոուների և MTV Europe Music Awards-ի (2013) ժամանակ։ Խումբը I Bet My Life երգը կատարել է Ամերիկյան երաժշտական մրցանակաբաշխության (2014), Էլեն ԴեՋեներեսի շոուի (2015) ժամանակ։ Imagine Dragons-ը կատարել է Revolution երգի իրենց տարբերակը The Night That Changed America: A Grammy Salute to The Beatles (2014) հեռուստածրագրի ժամանակ։ Նրանք նաև կատարել են Shots երգը The Tonight Show Starring Jimmy Fallon (2015), Jimmy Kimmel Live! (2015), և Էլեն ԴեՋեներեսի շոուի (2015) ժամանակ։ 2017 թվականին նրանք երկու անգամ եղել են Էլեն ԴեՋեներեսի շոուի հյուր՝ առաջին այցի ժամանակ կատարելով Believer, իսկ երկրորդի ժամանակ՝ Thunder երգերը։ Այս երգը նրանք կատարել են նաև The Tonight Show Starring Jimmy Fallon հեռուստաշոուի ժամանակ։ 2018 թվականին Նյու Օրելանում Ամանորյա երեկույթի ժամանակ կատարել են Believer և Thunder երգերը, որը ուղիղ եթերով ցուցադրվել է Dick Clark's New Year's Rockin' Eve հեռուստատեսային հատուկ հեռարձակմամբ։ 2018 թվականի հուլիսին խումբը վերադարձել է Jimmy Kimmel Live! շոու՝ կատարելով Natural երգը։ Նրանք կատարել են Zero երգը Jimmy Kimmel Live!-ում Ռալֆն ընդդեմ ինտերնետի անիմացիոն ֆիլմի պրեմիերայի ժամանակ։

Ներկայիս անդամներ

• Դեն Ռեյնոլդս՝ վոկալ, կիթառ, դաշնամուր, ստեղնաշարային գործիքներ, բաս, հարվածային գործիքներ (2008–մինչ օրս)
• Վեյն Սերմոն՝ կիթառ, բեք վոկալ, մանդոլին, հարվածային գործիքներ, դաշնամուր, սինթեզատոր (2009–մինչ օրս)
• Բեն Մըքքի՝ բաս, դաշնամուր, ստեղնաշարային գործիքներ, սինթեզատոր, բեք վոկալ, հարվածային գործիքներ (2009–մինչ օրս)
• Դանիել Պլատցման՝ հարվածային գործիքներ, բեք վոկալ, կիթառ, ալտ, ստեղնաշարային գործիքներ (2011–մինչ օրս)

Նախկին անդամներ

• Էնդրյու Բեք՝ կիթառ, բեք վոկալ (2008)
• Ավրորա Ֆլորենս՝ դաշնամուր, ստեղնաշարային գործիքներ, բեք վոկալ, ջութակ (2008)
• Դեյվ Լեմկի՝ բաս, բեք վոկալ (2008–2009)
• Էնդրյու Թոլման՝ հարվածային գործիքներ, բեք վոկալ, կիթառ (2008–2011)
• Բրիթանի Թոլման՝ դաշնամուր, ստեղնաշարային գործիքներ, բեք վոկալ, կիթառ (2009–2011)
• Թերեզա Ֆլամինիո՝ դաշնամուր, ստեղնաշարային գործիքներ, բեք վոկալ (2011)

Ժամանակացույց

Մինի ալբոմներ

• Imagine Dragons՝ 2009 թվականի սեպտեմբերի 1
• Hell and Silence՝ 2010 թվականի հունիսի 1
• It’s Time՝ 2011 թվականի մարտի 12
• Continued Silence՝ 2012 թվականի փետրվարի 14
• Hear Me՝ 2012 թվականի նոյեմբերի 25

Ստուդիական ալբոմներ

• Night Visions՝ 2012 թվական
• Smoke + Mirrors՝ 2015 թվական
• Evolve՝ 2017 թվական
• Origins՝ 2018 թվական
• Mercury – Act 1՝ 2021 թվական
• Mercury – Acts 1 & 2՝ 2022 թվական
• Loom՝ 2021 թվական

• Աշնանային շրջագայություն՝ 2012 թվական
• Night Visions շրջագայություն՝ 2013–2014 թվականներ
• Smoke + Mirrors շրջագայություն՝ 2015–2016 թվականներ
• Evolve համաշխարհային շրջագայություն՝ 2017–2018 թվականներ