Caitlyn Marie Jenner, nada como William Bruce Jenner en Mount Kisco (Nova York) o 28 de outubro de 1949 é unha personalidade televisiva e decatleta retirada estadounidense.
Jenner foi xogador de fútbol americano universitario cos Graceland Yellowjackets antes de sufrir unha ferida no xeonllo que requiriu cirurxía. Convencido polo adestrador do decatleta Jack Parker, L. D. Weldon, que probase o décatlon, Jenner gañou a proba nos Xogos Olímpicos de Montreal de 1976, establecen tres sucesivos récords mundiais e gañando fama como "heroe de todos os estadounidenses". Tras recibir o título non oficial de "mellor atleta do mundo", Jenner estableceu unha carreira na televisión, no cinema, na escritura, nas carreiras automobilísticas, nos negocios e como modelo de portada de Playgirl.
Jenner ten seis fillos coas súas tres sucesivas esposas (Chrystie Crownover, Linda Thompson e Kris Jenner) e dende 2007 apareceu no reality show Keeping Up with the Kardashians. Asignado como varón ao nacer, Caitlyn Jenner mostrouse publicamente como muller transexual en abril de 2015. O seu novo nome foi anunciado en xullo do mesmo ano, cambiado legalmente, igual que o seu xénero, en setembro. Entre 2015 e 2016, Jenner protagonizou a serie de telerrealidade I Am Cait, que se centrou na súa transición de xénero. En xaneiro de 2017, someteuse a unha operación de reasignación sexual. Jenner foi considerada a muller transexual máis célebre do mundo.
Caitlyn Marie Jenner naceu como William Bruce Jenner en 1949, filla de Esther Ruth (de solteira McGuire) e William Hugh Jenner. O seu pai era arboricultor. Ten ascendencia inglesa, escocesa, irlandesa, neerlandesa e galesa. O seu irmán máis novo, Burt, faleceu nun accidente de coche en Canton, Connecticut, o 30 de novembro de 1976, pouco despois do triunfo de Jenner nos Xogos Olímpicos. De nena, Jenner foi diagnosticada con dislexia.
Jenner asistiu ao Sleepy Hollow High School de Sleepy Hollow, Nova York e ao Newtown High School de Newtown, Connecticut, graduándose en 1968. Jenner obtivo unha bolsa de fútbol americano e estudou no Graceland College en Lamoni, Iowa, mais foi obrigada a deixar o deporte a causa dunha lesión no xeonllo. Recoñecendo o potencial de Jenner, o adestrador L. D. Weldon suxeriu a Jenner que se cambiase ao décatlon. En 1970, Jenner acabou quinto no seu debut no décatlon nos Drake Relays de Des Moines, Iowa. Jenner graduouse de Graceland en 1973 cun grao en educación física.
Jenner foi o campión estadounidense masculino de décatlon en 1974 e aparecu na portada da revita Track & Field News en agosto de 1974. Mentres estaba de xira en 1975, gañou o campionato francés e a medalla de ouro nos Xogos Panamericanos de 1975, logrando o récord do torneo con 8045 puntos. Isto foi seguido por novos récords de 8524 puntos no triangular U.S.A./U.R.S.S./Polonia de Eugene, Oregón, o 9-10 de agosto de 1975, rompendo o récord de Avilov, e 8538 puntos no torneo estadounidense, tamén en Eugene.
Nos Xogos Olímpicos de 1976 en Montreal, Jenner logrou cinco marcas persoais no primeiro día da proba de décatlon, aínda que quedou segundo por detrás de Guido Kratschmer, da República Federal Alemá. Na proba final dos 1500 metros, Jenner tamén estableceu unha nova marca persoal e gañou a medalla de ouro cun novo récord mundial de 8618 puntos.
Tralo éxito olímpico, Jenner considerou que podía capitalizalo cun status de celebridade semellante ao de Johnny Weissmuller e Sonja Henie, que se converteran en estrelas de cinema tralas súas medallas de ouro. O axente de Jenner, George Wallach, indicou que foi considerado para o papel de Superman, que finalmente foi para Christopher Reeve.
Jenner apareceu na portada do 9 de agosto de 1976 da revista Sports Illustrated, o número de febreiro de 1979 de Gentleman's Quarterly, e na portada de Playgirl. Tamén foi seleccionado polos Kansas City Kings co número 139 do draft de 1977 a pesar de que non xogara ao baloncesto dende o instituto. A campaña publicitaria foi organizada polo presidente do equipo Joe Axelson para burlarse das afirmacións dos Kansas City Chiefs de que planeaban seleccionar "o mellor atleta dispoñible" no National Football League Draft. Jenner foi presentado cun xersei co número 8618, o resultado da proba olímpica, mais nunca apareceu como xogador dos Kings.
A comedia Can't Stop the Music (1980) foi a única estrea cinematográfica de Jenner ata 2011. Jenner tivo tamén algún éxito na súa carreira televisiva, protagonizando os telefilmes The Golden Moment: An Olympic Love Story (1980) e Grambling's White Tiger (1981). Durante a tempada 1981-1982, Jenner foi un membro semirregular do elenco da serie policíaca CHiPs como o oficial Steve McLeish, substituíndo a Erik Estrada, que estaba nunha loita contractual con NBC e MGM.
En 2011, Jenner apareceu na comedia de Adam Sandler Jack and Jill nunha escena con Al Pacino. Igual que Can't Stop the Music, o filme gañou o premio Razzie ao peor filme.
En setembro de 2016, Jenner apareceu como ela mesma nunha secuencia onírica da serie Transparent.
Jenner tivo éxito no automobilismo no IMSA Camel GT series (International Motor Sports Association) na década de 1980. A súa primeira vitoria foi nas 12 horas de Sebring de 1986 con Scott Pruett como compañeiro.
Nunha entrevista con Diane Sawyer en 20/20 en abril de 2015, Jenner mostrouse como muller transexual, dicindo que loitara coa disforia de xénero dende a súa mocidade e que "son unha muller". Jenner vestiuse de muller durante moitos anos e tomou terapia hormonal substitutiva, mais parou despois de que a súa relación con Kris Kardashian se volvese máis seria, e acabando en matrimonio en 1991. Jenner conta que tiña permiso para explorar a súa identidade de xénero nas súas viaxes, mais non cando estaba a parella xunta, e que non saber cal era o mellor xeito de falar do asunto contribuíu á deterioración do matrimonio de vinte e tres anos, que acabou formalmente en 2015.
Jenner someteuse a cirurxía estética e completou a cirurxía de reasignación sexual en xaneiro de 2017. Jenner dixo que nunca se sentiu atraída polos varóns, e que tendo en mente a dificultade da xente para entender as diferenzas entre orientación sexual e identidade de xénero, identificarase polo momento como asexual.
Antes da súa transición de xénero, Jenner estivo casada en tres ocasións. En primeiro lugar con Chrystie Scott (de solteira Crownover) entre 1972 e 1981. Teñen un fillo, Burton "Burt" Jenner, e unha filla, Cassandra "Casey" Marino (de solteira Jenner). O proceso de divorcio entre Jenner e Scott finalizou a primeira semana de xaneiro de 1981.
O 5 de xaneiro de 1981, Jenner casou coa actriz Linda Thompson en Hawaii. Teñen dous fillos, Brandon e Brody Jenner. En febreiro de 1986 separáronse e posteriormente divorciáronse. Os seus fillos protagonizaron máis tarde o reality show The Princes of Malibu, e Brody apareceu tamén en The Hills.
O 21 de abril de 1991, Jenner casou con Kris Kardashian (de solteira Houghton) despois dunha relación de cinco meses. Xuntos tiveron dúas fillas, Kendall e Kylie Jenner. A parella anunciou a súa separación en outubro de 2013, aínda que realmente se separaran en xuño. Kris solicitou o divorcio en setembro de 2014 alegando diferenzas irreconciliables. O proceso de divorcio acabou en decembro de 2014 e foi efectivo o 23 de marzo de 2015.
Wiki Commons ten máis contidos multimedia na categoría: Caitlyn Jenner |
This article uses material from the Wikipedia Galego article Caitlyn Jenner, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Todo o contido está dispoñible baixo a licenza CC BY-SA 4.0, agás que se indique o contrario. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Galego (DUHOCTRUNGQUOC.VN) is an independent company and has no affiliation with Wiki Foundation.