Llyfr Y Tadau Methodistaidd

Cyhoeddwyd y gyfrol gyntaf ym 1895 a'r ail gyfrol ym 1897 gan wasg Lewis Evans, Abertawe.

Prif gynnwys y llyfr yw bywgraffiadau am y Cymry bu'n fwyaf dylanwadol wrth sefydlu enwad Y Methodistiaid Calfinaidd yng Nghymru. Mae hefyd yn cynnwys penodau am gefndir a phrif ddigwyddiadau yn hanes cynnar yr enwad. Mae copi digidol o'r llyfr ar gael i'w darllen yn di dal ar wefan Internet Archive.

Cyfrol I

Mae'r gyfrol gyntaf yn agor gyda phennod am sefyllfa foesol Cymru adeg cychwyn Methodistiaeth. Mae'r ail bennod yn rhoi bywgraffiad o Griffith Jones, Llanddowror a'i waith pwysig gyda'r ysgolion cylchynol ac argraffu Beiblau a llyfrau crefyddol fforddiadwy i'r werin. Mae'r drydedd bennod yn sôn am Y Diwygiad Methodistaidd yn Lloegr, gan nodi mae nid rhywbeth a ddeilliodd yn uniongyrchol o Loegr yw Methodistiaeth Cymru. Mae'r bennod yn nodi bod Howell Harris a Daniel Rowland, Llangeitho wedi bod yn efengylu yng Nghymru dwy flynedd cyn sefydlu'r Clwb Sanctaidd yn Rhydychen gan Charles Wesley, George Whitefìeld a'r Cymro John Gambold.

Wedi pennod yn rhoi bywgraffiad Daniel Rowlands ddaw nifer o benodau yn ymdrin â bywyd a gwaith Howell Harris. Mae'r penodau hyn yn dibynnu yn drwm ar ddyddiaduron Harris a chanfuwyd gan John Morgan Jones yng Ngholeg Trefeca wedi iddynt fod ar goll neu'n anghofiedig am ddegawdau. Yng nghanol y penodau am Harris ceir hefyd penodau yn trafod twf yr achos yn ystod ei wyth mlynedd gyntaf, sefydlu'r Gymdeithasfa (corff rheoli) a phennod yn trafod cynghorwyr cynnar yr enwad:

 

• Richard Tibbot , Llanbrynmair
• Lewis Evan, Llanllugan
• Herbert Jenkins, Mynyddislwyn
• James Ingram, Trefeca
• James Beaumont, Maesyfed
• Thomas James, Cerigcadarn
• Morgan John Lewis
• David Williams, Llysyfronydd
• Thomas Williams, Bethesda'r Fro
• William Edward, yr Adeiladydd
• William Richard
• Benjamin Thomas
• John Harris, St. Kennox
• John Harry, Treamlod
• William Edward, Rhydygele

Mae penodau eraill yn rhoi bywgraffiadau William Williams, Pantycelyn; Peter Williams; David Jones, Llan-gan; William Davies, Castell-nedd; Dafydd Morris, Twrgwyn a William Llwyd o Gaio. Mae pennod hefyd am yr ymraniad yn yr enwad rhwng cefnogwyr Howell Harris a chefnogwyr Daniel Rowlands

Cyfrol II

 

 

Mae cyfrol dau yn agor gyda hanes cychwyniad Methodistiaeth yng Ngwahanol rannau o Wynedd (h.y. gogledd Cymru). Mae'r gyfrol yn cynnwys penodau bywgraffiadol am:

• John Evans, o'r Bala
• Robert Roberts, Clynnog
• Robert Jones, Rhoslan, a Robert Dafydd, Brynengan
• John Roberts, Llangwm
• Thomas Foulkes, Machynlleth; Dafydd Cadwaladr; John Jones, Bodynolwyn; Evan Evans, Waunfawr a John Griffith Ellis, Llŷn
• William Thomas, Y Pîl a Siencyn Thomas, Penhydd
• Christopher Basset, Thomas Gray, ac Edward Coslet
• John Williams, Pantycelyn (mab William Williams, y pêr ganiedydd); John Evans, Cilycwm a Morgan Rhys

a thair pennod yn trafod bywyd a gwaith Thomas Charles o'r Bala. Fel rhan o'r ymdriniaeth a Thomas Charles ceir pennod yn ymdrin â'r penderfyniad gan y Methodistiaid i dorri ffwrdd o fod yn gymdeithas grefyddol o fewn Eglwys Loegr. Wedyn ddaw tair pennod yn trafod yr offeiriaid Methodistaidd a ymadawodd ag Eglwys Loegr a'r rhai a arhosodd yn eu hen eglwys.

Mae'r llyfr yn dod i ben gyda chwaneg o bennod fywgraffiadol am

• Ebenezer Morris, olynydd Daniel Rowlands yn Llangeitho
• Thomas Jones, Dinbych
• John Elias
• Ebenezer Richard, Tregaron (tad Henry Richard AS, "Yr Apostol Heddwch.")

Yn ogystal â hanes yr enwad a bywgraffiadau ei sylfaenwyr mae'r llyfr yn frith o ddarluniau a ffotograffau. Ceir lluniau o wrthrychau'r erthyglau, lluniau o'u cartrefi a'u capeli a lluniau o'u beddau. Ceir hefyd lluniau o lefydd o bwys yn hanes datblygiad Methodistiaeth Gymreig. Dyma ddetholiad o rai ohonynt.

•  
  Eglwys Llanddowror
•  
  Bedd Robert Roberts, Clynnog
•  
  Methodistiaid Lloegr bu'n weithgar yng Nghymru
•  
  Wynebddalen llyfr emynau cyntaf Pantycelyn
•  
  Capel Alpha, Llanfair-ym-Muallt
•  
  Robert Dafydd, Brynengan
•  
  Cefn Nannau; cartref John Roberts, Llangwm.
•  
  Bedd Ebenezer Morris ym Mynwent Troedyraur