1. Fc Eintracht Bamberg

1. FC Eintracht Bamberg

Volledige naam	1. Fußball-Club Eintracht Bamberg e.V.
Stigtingsdatum	3 Maart 1901
Tuisveld	Hauptkampfbahn im Volkspark, Bamberg
Kapasiteit	15 000
Kompetisie	Oberliga Beiere

FC Eintracht Bamberg is 'n sportklub uit Bamberg in die deelstaat Beiere in Duitsland, veral bekend vir sy sokkerafdeling. Benewens sokker bied die klub ook tennis, karate, tafeltennis, vlugbal, gimnastiek en kegelbal.

Die klub is op 3 Maart 1901 gestig as 1. Fußball-Club Bamberg. As een van die eerste sportklubs in die Oberfranken-distrik, het die klub vanaf die begin van georganiseerde sokker in die Gau Noord-Beiere (1905) meegeding. Die eerste selfstandige ligasisteem (Oos-Kreisliga) is eers hier gevestig in 1910 en aan die einde van die 1911/12-seisoen is Bamberg gerelegeer toe die liga tot 8 spanne verminder is. Tot op daardie stadium het Bamberg dus op die hoogste vlak meegeding.

In 1942 het die klub teruggekeer na die eerste vlak toe dit die Gauliga Noord-Beiere gehaal het. Die klub is op daardie stadium versterk deur spelers van ander stede wat by die Bamberg Pantserregiment gestasioneer was. Dit is later heringedeel by die Gauliga Bayreuth-Noord, maar die liga het ineengestort as gevolg van die Tweede Wêreldoorlog.

Na die Tweede Wêreldoorlog het die klub een seisoen (1946/47) in die Oberliga Suid deurgebring, die laaste keer wat die klub op die hoogste vlak was.

Op 1 April 2006 het die klub met TSV Eintracht Bamberg saamgesmelt en die huidige naam aangeneem. TSV was een van die jonger sportklubs in Bamberg en is gestig op 17 Maart 1951.

• Amptelike klubblad