約翰遜

約翰遜喺紐約市出世，父母係英國人，所以佢同時有英國同美國國籍。佢父親史丹利．莊臣（英文：Stanley Johnson (writer)）亦做過英國國會議員。佢有個細佬叫祖瑟夫。

後生嘅時候，佢讀過伊頓公學同牛津大學，之後去咗做記者。

2001年大選，佢接替諗住退休嘅夏舜霆，參選牛津郡 Henley 選區，成功當選，入咗國會。2005年連任成功。

2008年5月1號，佢擊敗英國工黨候選人Ken Livingstone當選大倫敦市長，做咗大倫敦市長之後辭任國會議員。2012年再擊敗Ken Livingstone連任。2016年，佢決定轉戰英國國會議員，經補選上任國會議員，同年卸任大倫敦市長。

2016年英國脫離歐盟公投之後，本身支持脫歐嘅佢有打算爭做下任黨魁兼首相，但最後冇去選。同年7月，接任首相嘅文翠珊委任佢做外相，到2018年7月辭職。

2019年，文翠珊辭任保守黨黨魁，佢再參選黨魁，7月23號佢攞到黨內六成六選票當選，第二日上任首相。

2020年，約翰遜喺3月尾證實確診武漢肺炎（COVID-19），4月5號病情轉趨嚴重，入咗聖湯馬斯醫院（St Thomas' Hospital）深切治療部，後嚟病情好轉，喺9號轉普通病房，之後喺12號康復出院到鄉郊官邸休養。

2022年7月7號宣佈會喺保守黨選出新黨魁之後離任首相。到9月6號，佢將首相個位交畀新黨魁卓慧思。

根據英國駐香港總領事館公佈嘅正式漢化譯名，係少數沿用稍為偏向北方話嘅譯名「約翰遜」（粵拼：joek3 hon6 seon3）。但係無論如何，「約翰遜」三個字，就係佢成個名嘅漢化專譯，並唔應該夾硬塞個「鮑里斯」落去變成「鮑里斯·約翰遜」，等於Ed Miliband係「文立彬」而唔係「愛德·文立彬」，David Miliband係「文禮彬」而唔係「大衛·文禮彬」，Tony Blair係「貝理雅」而唔係「東尼·貝理雅」。

有英國華文報紙使用「莊漢生」，但根據領事館資料為前內政大臣 Alan Johnson 嘅正式漢化譯名。

另一方面，中國大陸譯鮑里斯·約翰遜，臺灣譯鮑里斯·強森，都係冇跟官方譯名、無視名從主人嘅譯法。