英國國會

英國國會行兩院制，分上議院同下議院，另外君主亦係國會嘅成員。上議院議員分兩類：靈職議員係英倫聖公會嘅主教，代表國教；世俗議員大部分係往屆政府委任嘅終身貴族，另外仲有92個世襲貴族。下議院則由民主普選産生，每屆任期唔超過五年。西敏宮又叫國會大樓，兩院喺大樓裡面各有架步。憲制慣例，政府內閣包括英國首相一定要係下議院嘅議員；其他政府官員都一定要係國會議員，但係上下議院都得。故此所有政治任命嘅官員都需要向國會負責。

今時今日嘅英國國會源自1707年，英格蘭同蘇格蘭合併，成立嘅「大不列顛國會」。後來，愛爾蘭歸併入英國，國會擴張成「大不列顛及愛爾蘭聯合王國國會」。1922年，愛爾蘭脫離英國成為愛爾蘭自由邦，英國國會亦喺1927年正名「大不列顛及北愛爾蘭聯合王國國會」。英國嘅國會同埋憲政制度係世界唔少民主國家嘅模範，所以英國國會又稱「咁多國會嘅阿媽」(the mother of parliaments)。

理論上，英國嘅立法權威係君臨國會，權力其實喺君主手上，但君主一般會按首相嘅建議做事。而上議院嘅權力亦只限於暫緩立法或者將具爭議嘅法案發還下議院重審，無權推翻下議院嘅決定。所以民選産生嘅下議院實際上係英國最高權力機關。