病毒beng6 duk6(英文:Virus)係一種可以繁殖嘅物質結構,細到光學顯微鏡都睇唔清楚。佢哋外有蛋白質殼做保護,內有核酸排成遺傳基因,用以繁殖。之但係佢一定要靠感染入侵宿主細胞,先之可以繁殖。科學家一般都唔歸佢入生物,因為佢缺乏一啲生物基本要素,佢無細胞結構,亦無新陳代謝,離開宿主細胞同死物無分別。
流行性感冒、愛滋病、伊波拉出血熱、沙士同 COVID-19 等都係病毒。病毒嘅構造簡單得好交關:只係一細塊由蛋白質外殼包住嘅遺傳物質。有啲教科書描述病毒係種要靠宿主細胞嘅寄生「微生物」,但實際上佢哋係介乎死物與生物之間,「半生勾勾」嘅嘢。因為佢冇能力齋靠自己做自我複製,生命週期內每個階段都完全依賴宿主,借助宿主細胞來繁殖,順帶對之造成傷害。
大多數病毒並非純粹係病原體,地球上大約有 1031 種病毒,已知淨係得大約 1,000 種病毒會搞到人類病。因為搞到寄主病對病毒嚟講都冇著數-如果宿主喺接觸第啲潛在宿主之前就死咗,病毒就可能冇得及時複製同傳播。
病毒喺自然環境當中無處不在,好多時都同宿主互利共生:絕大多數嘅病毒都唔會引起疾病,有啲仲可能會對宿主有益;佢哋存在喺地球上每隻生命體裏面-動物、植物、細菌,好多時寄主都唔知佢哋存在,有唔少病毒有份調節腸道微生物嘅生態,以至超級細菌;佢哋遍佈喺土壤、海洋、空氣,甚至太空。如果當佢哋係生物嘅話,佢哋可以話係地球上最成功嘅生物之一。
就算到咗廿一世紀初,「生命」呢個詞要點定義依然係一條有相當爭議嘅問題:傳統嚟講,生物學家會用 7 個特質去判斷一樣嘢係咪生物-組織、穩態、新陳代謝、生長、反應、繁殖同埋適應。
傳統定義其中一個最大嘅問題係唔能夠清楚噉將病毒分類:病毒同細菌、植物以及動物等明顯係生物嘅嘢一樣,有遺傳基因,所以可以透過物競天擇嘅方式進化;病毒曉自我複製,但佢哋淨係當身處喺一個生勾勾嘅寄主細胞入面嗰陣先至會識得噉做,而且佢哋又唔會做新陳代謝;換句話講,病毒有一啲生命應有嘅特徵,但又唔係有齊嗮呢啲特徵。因為呢個緣故,有好多生物學家都認為病毒只能夠算係「曉自我複製嘅嘢」,而唔係生物,亦都有廿世紀尾嘅生物學家將病毒形容做「處於生命邊緣嘅生物」(organisms at the edge of life)。
雖然病毒唔完全係生物,生物學家依然好有興趣研究佢哋:噉係因為病毒能夠喺寄主細胞體內自我複製,而研究呢個過程得出嘅數據可能會撐「能夠砌自己出嚟嘅有機分子係生命其中一個可能嘅源頭」(睇埋無生源論)呢個假說。
生物分類學 |
---|
分類階級 |
域 | 界 | 門 | 綱 目 | 科 | 屬 | 種 |
二名法 |
三域系統 |
非細胞生物 |
細胞生物 |
This article uses material from the Wikipedia 粵語 article 病毒, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.