Virus

Virus
Rotavirus
Klasifikasi virus
Group:	I–VII
Grup

Virus adolah parasit mikroskopik nan mainfeksi sel organisme biologis. Virus basipaik parasit obligat, hal ko ditajadi dek virus hanyo dapek bareproduksi di dalam material iduik jo caro mainvasi jo mamanfaatan sel mukaluak iduik dek virus indak mampunyoi kalangkokan seluler untuak bareproduksi surang. Biasonyo virus manganduang sajumlah kaciak asam nukleat (DNA atau RNA, tapi indak kombinasi kaduonyo) nan tasalubuang samacam bahan palinduang nan tadiri ateh protein, lipid, glikoprotein, atau kombinasi katigonyo. Genom virus ka diekspresikan manjadi baiak protein nan dipakai untuak mamuek bahan genetik maupun protein nan paralu dalam daur iduiknyo.

Istilah virus biasonyo marujuak pado partikel-partikel nan mainfeksi sel-sel eukariota (organisme multisel dan banyak jinih organisme sel tungga), samantaro istilah bakteriofag atau fag dipakai untuak jinih nan manyarang jinih-jinih sel prokariota (bakteri jo organisme lain nan indak barinti sel).

Virus acok dipadebatkan statusnyo sabagai mukaluak iduik dek inyo indak dapek manjalanan fungsi biologisnyo sacaro lapeh kok indak di dalam sel induak. Dek karakteristik khasnyo ko virus taruih takaik jo panyakik tatantu, baiak pado manusia (misanyo virus influenza jo HIV), binatang (misanyo virus flu buruang), atau tanaman (misanyo virus mosaik timbakau/TMV).

Virus salalu badampiangan jo organisme nan mungkin alah ado sajak sel iduik partamo kali baevolusi. Virus indak maningakan fosil sahinggo asa muasa virus ko hanyo bisa dihipotesiskan jo caro-caro takah teknik-teknik biologi molekuler. Salain itu, materi genetik virus kadang-kadang baintegrasi ka dalam garih baniah organisme inangnyo sahinggo inyo indak bisa diturunkan sacaro vertikal ka katurunan inang salamo babarapo generasi. Hal iko maagiah sumber informasi nan indak tanilai ka urang nan ahli paleovirologi untuak malacak baliak virus kuno nan alah ado hinggo jutaan taun nan lalu.

Ado tigo hipotesis utamo tantang asal-usul virus : regresi, kalua dari sel jo koevolusi:

Hipotesis regresi
Virus bisa jadi dulunyo adolah sel-sel ketek nan manjadi parasit dalam sel nan labiah gadang. Kamudian, parasit-parasit iko kahilangan gen-gen nan indak dipagunoan sasudah iduik sabagai parasit. Sahinggo sel-sel itu mangalami regresi/manjadi virus. Teori iko didukuang dek adonyo bakteri takah Rickettsia jo Chlamydia nan hanyo bisa bareproduksi di dalam sel inang (takah virus). Manuruik hipotesis iko, jikok sel-sel ketek takah iko bisa taruih mangandalkan parasitisme untuak tatap iduik, gen-gen lain nan hanyo diparaluan untuak iduik mandiri (iduik di lua sel inang) dapek ilang. Hipotesis iko disabuik lo hipotesis degenerasi, atau 'hipotesis reduksi'.

Hipotesis kaluaa dari sel
Virus mungkin baevolusi dari potongan DNA atau RNA nan kalua dari gen organisme nan labiah gadang. DNA nan kalua ko bisa barasa dari plasmid (potongan-potongan DNA nan bisa bapindah dari ciek sel ka sel lainnyo) atau transposon (molekul DNA nan bareplikasi jo bapindah ka babagai posisi dalam gen sel). Transposons parnah disabuikk sabagai "gen palompek" jo marupoan contoh unsur genetik nan bisa bapindah sacaro mudah jo bisa jadi marupoan asa muasa babarapo virus. Mereka ditamuan di jaguang dek Barbara McClintock pado taun 1950. Hipotesis ko kadang-kadang disabuik 'hipotesis gelandangan', atau 'hipotesis malarian diri'.

Hipotesis koevolusi
Hipotesis ko disabuik lo jo 'hipotesis virus-partamo' nan mangusuakan basonyo virus mungkin alah baevolusi dari molekul kompleks barupo protein jo asam nukleat pado maso nan samo katiko sel partamo kali muncua di bumi nan ka bagantuang ka kahidupan seluler salamo milyaran taun. Viroid marupoan molekul RNA nan indak bisa diklasifikasikan sabagai virus karano indak punyo mantel protein. Mereka indak mampunyoi karakteristik nan samo jo kabanyakan virus jo acok disabuik jo agen subviral. :Viroid marupoan patogen tumbuahan nan pantiang. Mereka indak manyadi protein tapi bainteraksi jo sel inang sarao manggunoan parangkek nan punyo inang jo bereplikasi. Virus hepatitis dekta pado manusia punyo genom RNA nan mirip jo viroid tapi mereka punyo lapisan protein nan barasa dari virus hepatitis B jo indak dapek mahasiakan surang. Dek karano itu, virus ko cacat. Maskipun genom virus hepatitis delta bisa bareplikasi sacaro independen sasudah baradi di sel inang, inyo mambutuahkan bantuan virus hepatitis B untuak manyadiokan mantel protein sahinggo inyo bisa ditulakan ka sel baru. Jo caro nan samo, Virofag Sputnik bagantuang pado Mimivirus, nan manginfeksi protozoa Acanthamoeba castellanii. Jenis virus ko, nan bagantuang kapado adonyo spesies virus lain di dalam sel inang, disabuik satelit jo mungkin marupoan contoh parantaro evolusi antaro viroid jo virus.

Kato virus barasa dari bahaso Latin vīrus nan bararti racun jo cairan babahayo lainnyo, nan labiah jauah barasa dari rumpun bahaso Indo-Eropa lain takah bahasa Sanskerta viṣa, bahasa Avesta vīša, jo bahasa Yunani Kuno ἰός nan kasadonyo bararti racun. Kato sipaik virulen dari bahaso Latin virulentus nan artinyo baracun muncua kiro-kiro tahun 1400. Makna virus sabagai "agen nan mangakibaikkan panyakik inpeksi" partamo kali digunokan pado tahun 1728, jauah sabalun ditamukan virus itu dek Dmitri Ivanovsky pado taun 1892. Samantaro itu, kata sipaik viral nan bararti"dari sipaik virus atau disababkan dek virus" baru muncua pado tahun 1944. Istilah virion nan tacatat sajak 1959 pulo digunokan untuak marujuak pado partikel virus tungga nan kalua dari sel jo bisa mainpeksi sel lainnyo nan sajinih.

Status kahidupan

Ado pabedaan pandapaik ilmiah tantang virus nan digolongkan sabagai makhluk hiduik atau sakadar struktur organik nan bainteraksi jo makhluk iduik. Walaupun baitu, mereka labiah acok diaggap sabagai replikator (zat nan malakuan replikasi DNA) jo indak tamasuak bantuak kahidupan. Virus digambarkan sabagai "organisme di ujuang kahidupan", kareno mereka sarupo jo makhluk hiduik dalam hal kapamilikan gen, barevolusi malalui seleksi alam, jo bareproduksi jo mambuek banyak salinan dari diri mereka surang malalui parakitan diri. Meskipun virus adp punyo gen, mereka indak punyo sel, nan acok dicaliak sabagai unit dasar kahidupan. Virus indak punyo metabolisme surang jo mambutuahkan sel inang untuak mambuek produk baru. Dek karano itu, mereka indak dapek bareproduksi sacaro alami di lua sel inang. Walaupun sajumlah bakteri takah Rickettsia jo Chlamydia mampunyoi katarbatasan nan samo, mereka dianggap sabagai organisme hiduik karano mamiliki sel surang. Parakitan diri virus di dalam sel inang barimplikasi pado studi asal mulo kahidupan karano mandukuang hipotesis bahasonyo kahidupan dapek dimulai dari molekul organik nan dapek marakit diri.

• Mikrobiologi
• Prion
• Virologi

• (Inggirih) Pustaka Online tantang virus Archived 2008-02-25 di Wayback Machine.
• (Inggirih) Wong's Virology
• (Inggirih) Apa itu virus?