曼哈頓計劃

戰爭期間，美軍研發出兩種類型嘅原子彈，一個係設計上比較簡單、用鈾235整成「槍式（英文：Gun-type fission weapon）」，由於鈾235喺天然鈾中只係得0.7%，其他絕大部分都係質量相同、難以分離嘅同位素鈾238，所以美方用咗三種分離方式嚟提高鈾-235嘅濃度——電磁（「卡留管（英文：Calutron）」）、氣體（「氣體擴散法」）同熱（「索瑞特效應」），大部分工作都喺田納西州橡樹嶺進行。

1941年12月7號，日本偷襲美國珍珠港，美國對日宣戰，自此開始，美國正式捲入二戰。同時，納粹德國已經開始咗德國核武器開發計劃「鈾計劃」（德文：Uranprojekt），目的係整到核武器，用喺二戰之中。一啲美國科學家提出，要喺納粹德國之前研發出原子彈。

1942年12月2號，喺費米嘅指導下，世界上第一個實驗性原子反應堆喺芝加哥起好，成功實現咗可控嘅鏈式反應。1943年春天，奥本海默領導科研人員開始整原子彈嘅工作；1944年，美國橡樹嶺工廠生產出第一批濃縮鈾原材料；1945年7月12號，第一粒實驗性原子彈開始做最後嘅裝配。7月16號，美國第一粒原子彈喺新墨西哥州嘅沙漠中試爆成功，爆炸當量大約21,000噸TNT炸彈。8月6號，美國向廣島投放咗Little Boy原子彈；3日之後（8月9號），向長崎投放咗胖佬原子彈。8月15號，日本宣告無條件投降，第二次世界大戰完。