老虎機

老虎機係幾乎間間賭場都有嘅賭錢機器,玩家入銀仔,然後拉搖桿(或者撳掣),部機會碌出一堆圖案,若果係某啲特定組合,就為之中獎。純機械構造嘅舊款機器,爾家已經好少見。新款嗰啲就冚唪唥係電子嘢,重會收用咭、銀紙同券等等嘅落注。

老虎機
老虎機

因為老虎機嘅彩池會一直累積,直至有人中大獎,所以吸引到唔少人想「刀仔鋸大樹」,一下子發達。由於入咗嘅銀仔多數都一去無回頭,好似入咗落老虎個口咁,於是就叫「老虎機」。

喺澳門,呢樣嘢被官商雅稱做角子機;喺台灣,多數叫做吃角子老虎(機)或者拉霸(機)

光明面

總論

老虎機係賭場嘅關鍵生財工具,喺某啲地方,嚟自佢哋嘅交易額同收入,佔總數高達八成。

台灣

响台灣,有公司發明同製造老虎機等賭博用機器,生意規模頗大。

陰暗面

總論

有異於多數其他賭博遊戲,老虎機完全黑箱作業(,即使係喺機器主人唔作弊嘅正常情況之下),賭客(都)無辦法知道賠率等諸多緊要訊息,除非當地法例規定要標明。學者莊志達以「十賭九輸」來形容玩老虎機,解釋運作原理——(喺絶對公正同埋隨機嘅模型當中,)以有3條轉軸,每條有256種變化嘅老虎機嚟推算,喺每次投注,中大獎嘅機率只有1/16,777,216。相比之下,中六合彩頭獎更加容易;機率為1/13,983,816。

澳門

來自賭場老虎機嘅糾紛多籮籮;根據官方統計,响2012年1月1號至2014年5月22號期間,喺當地由老虎機被指故障,而引起嘅賠償糾紛有133單,攤匀每月有5單到,當中靠博彩監察協調局解決咗嘅總共得3單;唔少人投訴,話正常噉玩老虎機中咗獎之後,賭場會以壞機同賭客唔合資格等理由,以及各種手段來拖延時間兼討價還價,唔派足甚至完全唔派彩;然而被指故障嗰啲機器呑咗嘅錢,卻唔會發還;莊家被批評輸打贏要以及懷疑出千。

亦有輸咗好多錢嘅賭客,覺得機器賠率過低,懷疑莊家設定犯規,要求攞數據查核,卻只得到對賭場有利嘅非關鍵資料。

機器被指故障時,往往由賭場自己揀公司驗機寫報告,用嚟做派彩與否之決定嘅依據;佢哋經常會被質疑偏幫賭場;當定論係某機器故障,賭場既唔使派出所顯示贏到嘅獎金,亦唔需要退返賭客輸咗嘅投注,更唔會受政府懲罰;呢套制度飽受批評;而按澳洲及美國規則,賭客遇着同類糾紛時,可以叫政府派人調查同裁決。

六個賭場經營者之中嘅威尼斯人、永利、銀娛同美高梅,都試過由於老虎機被指故障,或設置得有問題,出現巨額紛爭,同賭客吵大鑊,而被多地傳媒報道。

香港

雖然法例唔准私人開賭,但係都有商人以此弁利;喺某啲有牌機舖同無牌賭檔入面,擺咗計分唔計錢嘅老虎機,而又有兑分仔負責將遊戲積分換成真銀,令客人可以間接賭錢;呢種係偏門生意。

新加坡

响2011年10月18號,食店觀音齋東主,58歲嘅朱雲萍喺濱海灣金沙玩老虎機時,部嘢顯示佢中咗個新元$416,742.11嘅獎。然而,賭場經理話畀佢知,部機壞咗,佢應得嘅係新元$50,000加架跑車,賭場願意畀新元$258,962買返嗰部車。朱女士堅持要收足筆數,附近顧客圍咗埋嚟,大聲鼓燥,撑朱女士;有部分主動幫手站崗,防止職員將獎勵洗走;有新加坡女人話朱女士冇本錢同賭場鬥,勸朱女士攞錢走人算數;有男人行埋去用手機影相,留低證據,不過賭場職員刪除咗,再踢佢出街;職員亦叫朱女士向賭場管制局求助之後就走人,然而由於唔准影相,朱女士唔敢離開,驚一行開,就冇哂證據,於是繼續僵持;卒之有五—六個大馬人,主動留低電話號碼畀朱女士,同應承做證,朱女士先至敢走;當時已經過咗三個鐘頭。朱女士向賭場監管局同警察部隊報案,又委託朱時生律師代為索償;有關律師樓寄律師信,叫賭場賠足$416,742.11。响2011年11月4號,濱海灣金沙指決定畀齊嗰筆錢,重响2011年11月9號發聲明,話對引起咗先前嘅誤會表示遺憾。過咗冇幾耐,朱女士收到兩張支票——一張數額如上,另外嗰張之銀碼為新元$688.25,即係佢當時用嗰張儲值咭入面嘅獎金。响2012年8月22號,賭場監管局發表文告,話佢哋調查得知,濱海灣金沙並冇呃朱女士或者特登令部機器出錯,當時個獎的確如賭場職員所述,不過遣責後者冇確保機器顯示啱嘅信息。朱女士將嗰筆錢散哂出去——多個慈善團體、幫佢追討獎金嘅證人、賭場職員、食店伙記……

美國

响2016年8月23號,單親阿媽卡特里娜布克曼喺紐約市雲頂世界賭場玩老虎機,螢光幕顯示佢中咗個美元$42,949,672.76嘅獎。佢即刻貼塊面埋去,由拍檔影咗張相作證,報告咗中獎之後,賭場好快就沸揚起嚟,職員同其他顧客都圍哂埋嚟。職員跟住送走咗布克曼,叫佢聽日返嚟了解派彩決定。响第二日,佢再嚟到賭場,職員話畀佢知,根本冇贏錢,佢以為中咗獎,係機器故障所致,唔算數,不過會畀佢攞返部機入面嘅美元$2.25結餘,重願意送份肉扒晚餐做補償。布克曼嘅法律受權人阿倫里普卡話對方做法唔公平;至少應該派美元$6,500,即係嗰部機嘅最高獎金畀佢。响2017年6月14號,呢單嘢告咗上皇后縣最高法院。

澳洲

响2017年3月同4月,維州賭博及酒類監管委員會發現,墨爾本皇冠賭場响遊戲機試運行期間,老虎機有17個掣被封咗,得返最細同最大嘅投注選項可以用。同年年底,有人舉報,話係上級指示員工做嘅手腳。該委員會响2018年4月宣布此舉違規,向該賭場罰款澳元$300,000,並發出書面警告信。

加拿大

响2017年2月,82歲老翁約翰馬蘭杜喺Mohawk Racetrack玩老虎機,中咗個加元$10,002嘅大獎;佢去領獎時,職員帶咗佢入間房道,話因為佢响17年前簽咗張表,加入用嚟幫人戒賭嘅OLG自我隔離計劃,所以無錢收,隨即趕埋佢出賭場。擁有該賭場嘅安省博彩局指,响2016年9月,加咗條新規例,唔准自我隔離者贏到錢,而每單超過加元$10,000嘅彩金派發之前,都要檢查過;截至2017年2月,已經有29個人由於相同原因,收唔到大獎彩金。官方網站宣稱啲賭場裝咗帶有面容辨識技術嘅監視系統,會揾出自我隔離人士,提示職員踢佢哋走。馬蘭杜表示,記唔起有簽過嗰份文件;自己個腦受過傷,會影響記憶,亦响大概8年之前受過腦手術。佢重補充,自己之前輸錢同贏細錢時都無異常,偏偏等到贏呢筆大錢時,至冇得攞,顯示對方根本就係唔想畀錢;已經聯絡咗律師,唔打算畀對方走數。

參考

睇埋

Tags:

老虎機 光明面老虎機 陰暗面老虎機 參考老虎機 睇埋老虎機賭場賭錢銀仔銀紙電子

🔥 Trending searches on Wiki 粵語:

明治天皇龐統虐待李穎琳謝雨橋三角函數404 886流量密碼經濟用語拿破崙無綫新聞部主要人員名單腦電圖鮮奶咖啡綫蟲動物第二次世界大戰陳潔玲Feeling Good老虎機游嘉欣香港太空館出pool廣州地鐵香港政區陳嘉莉亞氏保加症彝族坂井泉水劉鑾雄港鐵陰蒂善衡書院冷戰國立聯合大學鹹濕法比加斯適者生存 (電視節目)斑蘭越南話聲韻準時開飯水銀明太子楊洋慶餘年維基百科一覽蔡卓妍洋蔥 (歌)林家熙王籽到此為止李知恩樹熊漢朝皇帝一覽林慧美耶穌受難節水魚張學友WikiLeaks牛角包李炳憲李賢 (香港)張津瑜泥鯭CCD-ROM (網絡用語)次方普洱海納百川,有容乃大冒號蟯蟲安曼Touch woodBLACKPINK王昊被虐待致死案維基百科🡆 More