ಅನ್ನಾಮಣಿ

ಇಂಬೆರೆನ ಇಡಿ ಪುದರ್ ಅನ್ನಾ ಮುದಲಾಯಿ ಮಣಿ ಪಂಡ್ದ್.

ಇಂಬೆರ್ ೧೯೧೮ನೇ ಇಸವಿದ ಆಗಸ್ಟ್ ೨೩ನೇ ತಾರೀಕ್ ಕೇರಳ ರಾಜ್ಯೊದ ಪೀರುಮೇಡು ಪನ್ಪಿನ ಊರುಡ್ ಪುಟ್ಟಿಯೆರ್. ಇಂಬೆರ್ ಪಿರಾಕ್ದ ಸಿರಿಯನ್ ಕ್ರಿಶ್ಚಿಯನ್ ಕುಟುಂಬೊಗ್ ಸೇರ್ದಿನಾರ್. ಇಂಬೆರೆನ ಅಮ್ಮೆರ್ ಒರಿ ಸಿವಿಲ್ ಇಂಜಿನಿಯರ್ ಆದಿತ್ತೆರ್. ಎನ್ಮ ಜನ ಜೋಕುಲೆಡ್ ಮೇರ್ ಏಲನೆ ಬಾಲೆ ಆದ್ ಪುಟ್ಟಿಯೆರ್. ಎಲ್ಯ ಪ್ರಾಯೊಡೇ ಮೆರೆಗ್ ಎಡ್ಡೆ ಪುಸ್ತಕೊಲೆನ್ ಓದುನ ಅಭ್ಯಾಸ ಇತ್ತ್ಂಡ್. ಇಂಬೆರೆಗ್ ಮಹಾತ್ಮಾಗಾಂಧಿನ ತತ್ವೊಲು ಪಂಡ ಮಸ್ತ್ ಇಷ್ಟ. ಅಂಚಾದ್ ಆರ್ ಎಲ್ಯೊಡೆ ಖಾದಿ ಕುಂಟುಲೆನ್ ತುತ್ತೊಂದಿತ್ತೆರ್.

ಎಲ್ಯ ಪ್ರಾಯೊಡೇ ಇಂಬೆರ್ ಕಲ್ಪುನೆಟ್ ಬುದ್ಧಿವಂತೆರಾದಿತ್ತೆರ್. ರಾಮನ್ ಇನ್ಸ್ಟಿಟ್ಯೂಟ್ಡ್ ಪದವಿ ದೆತೊನ್ಯೆರ್. ೧೯೪೦ನೇ ಇಸವಿಡ್ ಬೆಂಗಳೂರುದ ಇನ್ಸ್ಟಿಟ್ಯೂಟ್ ಆಫ಼್ ಸೈಯನ್ಸ್ಡ್ ಭೌತ ಶಾಸ್ತ್ರದ ಸಂಶೋಧನೆ ಮಲ್ಪೆರೆ ಸ್ಕಾಲರ್ಶಿಪ್ ತಿಕ್ಕ್ಂಡ್. ೧೯೪೨ನೇ ಇಸವಿಡ್ ಮದ್ರಾಸ್ ಯೂನಿವರ್ಸಿಟಿಗ್ ತನ್ನ ಪಿ.ಹೆಚ್.ಡಿ. ಪ್ರಬಂದೊನ್ ಒಪ್ಪಿಸಾದ್ ಇಂಗ್ಲಂಡ್ ದೇಸೊಡು ಇಂಟರ್ನ್‌ಶಿಪ್ ಮಲ್ಪೆರೆ ಸ್ಕಾಲರ್ ಶಿಪ್ ದೆತೊನ್ಯೆರ್. ಇಂಪೀರಿಯಲ್ ಕಾಲೇಜ್ ಲಂಡನ್ಡ್ ಪವನಶಾಸ್ತ್ರದ ಬಗೆಟ್ ವಿಶೇಷ ಅಧ್ಯಯನ ಮಲ್ತೆರ್.

೧೯೪೮ನೇ ಇಸವಿಡ್ ಭಾರತೊಗ್ ಪಿರ ಬತ್ತ್ದ್ ಪೂನಾಡ್ ಉಪ್ಪುನ ಪವನ ಶಾಸ್ತ್ರ ಇಲಾಖೆಡ್ ವಿಕಿರಣ ನಿರ್ಮಾಣದ ಉಸ್ತುವಾರಿ ವಯಿಸೊಂದು ಸೇವೆ ಸಂದಾಯೆರ್. ವಾವುಲು ವಜ್ರ ಬೊಕ್ಕ ಮಾಣಿಕ್ಯೊದ ರೋಹಿತ ದರ್ಶಕೊಡುಲಾ ಬೇಲೆ ಬೆಂದೆರ್. ೧೯೭೬ನೇ ಇಸವಿಡ್ ಐತ ಉಪ್ಪನಿರ್ದೇಶೆಕೆರಾದ್ ನಿವ್ರತ್ತರಾಯೆರ್. ಐರ್ದ್ ಬೊಕ್ಕ ರಾಮನ್ ರಿಸರ್ಚ್ ಸೆಂಟರ್ಡ್ ಮೂಜಿ ವರ್ಸ ಮುಟ್ಟ ಅತಿಥಿ ಪ್ರಾದ್ಯಾಪಕೆರಾದ್ ಬೇಲೆ ಮಾಲ್ತೆರ್. ೧೯೯೪ನೇ ಇಸವಿಡ್ ಆರ್ ಸೀಕ್ಡ್ ಬೂರ್ಯೆರ್. ೨೦೦೧ನೇ ಇಸವಿ ಆಗಸ್ಟ್ ೧೬ನೇ ತಾರೀಕ್ದಾನಿ ತಿರುವನಂತರಪುರೊಡ್ ತೀರ್ ಪೋಯೆರ್.

ಓಝೋನ್ ಉಪಕರಣೊ ನಾಡ್ ಪತ್ತೆರೆ ಪೊನೆಯೆರ್. ಆರ್ನ ಈ ಸಾಧನೆನ್ ಗುರ್ತ ಮಲ್ತಿನ WMO ಸಂಸ್ಥೆ (ವಿಶ್ವ ಪವನಶಾಸ್ತ್ರ ಸಂಸ್ಥೆ) ಆರೆನ್ ಅಂತರಾಷ್ಟ್ರೀಯ ಪವನಶಾಸ್ತ್ರ ಆಯೋಗದ ಸದಸ್ಯೆರಾದ್ ಆಯ್ಕೆ ಮಲ್ತೆರ್.

ಆರ್ ಮಲ್ದಿನ ವಾತಾವರಣೊದ ಓಝೋನ್ ದ ಮಿತ್ತ್ದ ಸಂಶೋಧನೆಗ್ ೧೯೮೭ಡ್ ಆರೆಗ್ 'ರಾಮನಾಥನ್ ಮೆಡಲ್' ಪುರಸ್ಕಾರ ತಿಕ್ಕ್ಂಡ್.

• ೧೯೮೦ - 'ದಿ ಹ್ಯಾಂಡ್ ಬುಕ್ ಫ಼ಾರ್ ಸೋಲಾರ್ ರೇಡಿಯೇಷನ್ ಇನ್ ಇಂಡಿಯ'
• ೧೯೮೧- 'ಸೋಲಾರ್ ರೇಡಿಯೇಷನ್ ಓವರ್ ಇಂಡಿಯ'
• ೧೯೮೩- 'ವಿಂಡ್ ಎನರ್ಜಿ ಡೇಟಾ ಫ಼ಾರ್ ಇಂಡಿಯ'