Diégo Armando Maradona, (lahir, 30 Oktober 1960 - 25 Nopémber 2020), pangsiunan pamaén bal profésional Argéntina.
Dianggap minangka pamaén bola panghébatna sapanjang mangsa. Manéhna téh salah sahiji tina dua pinunjul réréongan panghargaan Pamaén FIFA Abad 20. Visi, operan, kontrol bal jeung kamampuan dribbling Maradona, dikombinasikan jeung awakna nu pendek (1,65 m at. 5 kaki 5 inc), nu matak énteng, ngaalatankeun manéhna usik leuwih hadé manan réa pamaén séjénna; manéhna mindeng nga-dribble ngaliwatan sababaraha pamaén lawan bari lumpat. Kahadiranna jeung kapamingpinanna di lapangan méré épék anu gedé pikeun pintonan timna sacara umum. Ku bakatna nu calakan, Maradona dilandi "El Pibe de Oro" ("The Golden Boy"), hiji ngaran nu némpél ka dirina salila karirna.
Informasi pribados | |||||||||
---|---|---|---|---|---|---|---|---|---|
Nami lengkep | Diego Armando Maradona | ||||||||
Lahir | 30 Oktober 1960 | ||||||||
Tempat lahir | Lanús, Buenos Aires, Argentina | ||||||||
Pupus | 25 Nopémber 2020 (yuswa 60) | ||||||||
Tempat pupus | Tigre, Buenos Aires, Argentina | ||||||||
Luhur | 1.65 m | ||||||||
Posisi | Attacking midfielder Second striker | ||||||||
Informasi klub | |||||||||
Klub ayeuna | N/A | ||||||||
Karir sénior* | |||||||||
Taun | Tim | Midang | (Gol) | ||||||
1976–1981 | Argentinos Juniors | 167 | (116) | ||||||
1981–1982 | Boca Juniors | 40 | (28) | ||||||
1982–1984 | Barcelona | 36 | (22) | ||||||
1984–1991 | Napoli | 188 | (81) | ||||||
1992–1993 | Sevilla | 26 | (5) | ||||||
1993–1994 | Newell's Old Boys | 5 | (0) | ||||||
1995–1997 | Boca Juniors | 30 | (7) | ||||||
Total | 491 | (259) | |||||||
Tim nasional | |||||||||
1977–1979 | Argentina U20 | 24 | (13) | ||||||
1977–1994 | Argentina | 91 | (34) | ||||||
Kapalatihan | |||||||||
1994 | Mandiyú de Corrientes | ||||||||
1995 | Racing Club | ||||||||
2008–2010 | Argentina | ||||||||
2011–2012 | Al Wasl | ||||||||
2013–2017 | Deportivo Riestra (assistant) | ||||||||
2017–2018 | Fujairah | ||||||||
2018 | Dynamo Brest (chairman) | ||||||||
2018–2019 | Dorados de Sinaloa | ||||||||
Honours Citakan:MedalCitakan:MedalSport
| |||||||||
|
Saurang playmaker hareup nu maké nomer posisi klasik 10, Maradona mangrupa pamaén kahiji dina sajarah ménbal nu mecahkeun rékor bayaran transfer dua kali, mimiti basa pindah ka Barcelona pikeun rékor dunia £5 juta, nu kaduana, basa pindah ka Napoli ku rékor séjénna £6,9 juta. Salila karir klubna, Maradona maén pikeun Argentinos Juniors, Boca Juniors, Barcelona, Napoli, Sevilla jeung Newell's Old Boys, sarta sosohorna mah mangsa di Napoli jeung Barcelona basa meunangkeun sajumlah panghargaan.
Dina karir internasionalna bareng Argéntina, manéhna geus ngahasilkeun 91 caps jeung nyitak 35 gul. Maradona maén di 4 Piala Dunia FIFA, kaasup Piala Dunia 1986 di Méksiko di mana manéhna ngapténan Argéntina jeung mingpin timna meunang ngalawan Jérman Barat di final, sarta meunangkeun Bal Emas minangka pamaén turnamén panghadéna. Di parapat final Piala Dunia 1986, manéhna nyitak dua-duana gul basa meunang 2-1 ngalawan Inggris nu asup kana sajarah ménbal ku dua alésan nu béda. Gul kahiji nyaéta ngalanggar maké leungeun nu lolos tina hukuman nu katelah si "Tangan Tuhan", sarta gul kadua ngagiring bal sapanjang 60 m (66 yd) ngaliwatan lima pamaén Inggris, kapilih minangka "Gul abad Ieu" ku pamilih FIFA.com di taun 2002.
Maradona jadi palaith Argéntina di bulan Nopémber 2008. Ngajabat di Piala Dunia 2010 di Afrika Selatan méméh eureun di akhir turnamén. Manéhna ngalatih klub Al Wasl Dubai di Pro Liga UEA pikeun musim 2011-12. Taun 2017, Maradona jadi palatih Fujairah semet ka tungtung musim. Méi 2018, Maradona jadi pupuhu anyar klub Belarusia, Dynamo Brest. Manéhna datang ka Brest jeung mimiti ditugaskeun ku klubna di bulan Juli. Ti Séptémber 2018 nepi ka Juni 2019, Maradona jadi palatih klub Méksiko, Dorados.
Maradona lahir tanggal 30 Oktober 1960 di Poliklinik Rumah Sakit Évita di Lanus, Provinsi Buenos Aires, tapi digedékeun ku hiji kulawarga miskin pindahan ti Provinsi Corrientes, di Desa Fiorito, hiji kawasan kumuh di beulah wétan saluareun Buenos Aires, Argéntina. Manéhna téh budak lalaki kahiji sangges tilu awéwé. Manéhna boga dua adi lalaki, Hugo (él Turco) jeung Raul (Lalo), duanana ogé pamaén bal profésional. Bapana Diégo Maradona "Chitoro" (maot taun 2015) jeung indungna Dalma Salvadora Franco 'Dona Tota' (1930-2011). Kolot Maradona duanana asal ti Esquina di timur laut Provinsi Corrientes. Imahna masing-masing ngan kapisah 200 m di sisi Bangawan Corriente. Tahun 1950 ninggalkeun Esquina jeung netep di Buenos Aires. Umur dalapan taun Maradona kapanggih ku pamandu bakat waktu keur maén di klub lingkunganna Estrella Roja. Manéhna jadi pamaén penting di Los Cebollitas (Bawang Leutik), tim yunior Argentinos Juniors, Buenos Aires. Salaku pamaén budak umur 12 taun, manéhna ngahibur penonton ku nembongkeun kamonesanna dina ngulinkeun bal dina hiburan tengah babak di partai divisi hiji. Manéhna nyebutkeun playmaker Brazil Rivelino jeung pamaén sayap Manchester United George Best di antara inspirasina pikeun déwasa.
20 Oktober 1976, Maradona nyieun debut profésionalna keur Argéntinos Juniors, 10 poé méméh ulang taunna nu ka-16, basa ngalawan Talleres de Cordoba. Manéhna asup ka lapang maké kaos nomer 16, jeung jadi pamaén pangorana dina sajarah Divisi Priméra Argéntina. Sababaraha menit sanggeus maén, Maradona nyépak bal nembus antara dua suku Juan Domingo Cabréra. Nyieun nutmeg (ngolongkeun bal) nu ngalégénda. Sanggeus permaénan éta, Maradona cumarita, "Poé éta kuring ngarasa langit aya dina geunggeuman kuring," Tilu puluh taun ti harita, Cabréra ingeuteun kénéh kana debut Maradonaː "Kuring keur di sisi katuhu lapang sarta muru pikeun neken manéhna, tapi manéhna teu méré kasempetan. manéhna nyieun nutmeg jeung waktu kuring ngalieuk, manéhna geus jauh ti kuring."
Maradona nyitak gul kahijina di Divisi Priméra ngalawan tim San Lorénzo Marplatense dina tanggal 14 Nopémber 1976, dua minggu ti saprak maén.
Maradona meakkeun lima taun di Argéntinos Juniors, ti 1976 nepi ka 1981, nyitak 115 gul tina 167 kali maén méméh pindah ka Boca Juniors ku AS$ 4 juta. Maradona nampa tawaran ti klub-klub séjén, kaasup River Plate nu nawarkeun gajih panggedéna di klub. Najan kitu, Maradona nyatakeun kahayangna pikeun pindah ka Boca Juniors, tim nu salawasna dipikahayang pikeun maén.
Maradona neken kontrak jeung Boca Junior tanggal 20 Pébruari 1981. Debut kahijina dua poé ti harita ngalawan Talleres de Cordoba, nyitak dua gul dina kaunggulan 4-1 pikeun klubna. Tanggal 10 April, munggaran maén di Superclasico ngalawan River Plate di stadion La Bombonera. Boca ngéléhkeun River 3-0 sarta Maradona nyitak sagul sanggeus ngagiring bal ngaliwatan Alberto Tarantini jeung Fillol. Sanajan hubungan nu teu pati akur antara Maradona jeung manajer Boca Juniors, Silvio Marzolini, Boca mibanda hiji usum nu suksés, meunangkeun juara liga sanggeus ngamankeun poin ngalawan Racing Club. Eta téh minangka hiji-hijina gelar nu kapimilik ku Maradona dina liga doméstik.
Sabada Piala Dunia 1982, bulan Juni, Maradona pindah ka Barcelona di Spanyol pikeun £5 juta (̩$7,6 juta) nu minangka bayaran rékor dunia di taun 1983. Dina cepengan palatih Cesar Luis Menotti, Barcelona katut Maradona meunangkeun Copa del Rey (kompetisi piala nasional taunan Spanyol), ngéléhkeun Réal Madrid, ogé Piala Super Spanyol, ngéléhkeun Athlético Bilbao. Dina 26 Juni 1983, Barcelona ngéléhkeun Réal Madrid dina salah sahiji pertandingan paling gedé antar klub, El Clasico, hiji permaénan di mana Maradona nyitak gul sarta jadi pamaén Barcelona nu mimiti meunang keprokan ti bobotoh Réal Madrid, musuh satruna. Maradona ngagiring bal ngaliwatan kiper Madrid Agustin, sarta pas geus deukeut kana gul nu kosong manéhna ngarandeg pas pisan pamaén tukang Juan Jose datang nyorodot dina usaha nu pinuh ku kaputusasaan pikeun nahan tembakan, terus kebat kadon neunggar tihang méméh Maradona ngajebloskeun bal kana jaring. Cara asupna gul ngaalatankeun panongton di jero stadion méré aplausan. Salaku pamaén Barcelona, ngan Rivaldinho (di Nopémber 2005) jeung Andrés Iniésta (di Nopémber 2015) nu kungsi nampa panghormatan kitu ti bobotoh Madrid di Santiago Bernabeu. Alatan gering jeung cidera katut ogé kajadian kontrovérsial di lapangan, Maradona ngalaman mangsa-mangsa hésé di Barcelona. Mimiti hépatisis énténg, tuluy di pertandingan La Liga di Camp Nou bulan Séptémber pateuh pigeulang suku disababkeun ku tékel nu salah waktu ti Andoni Goikoetxea ti Athletico Bilbao. Kajadian éta matak ngancam kana karirna. Tapi ku diropéaan jeung terapi, sanggeus tilu bulan reureuh dirina bisa balik deui ka lapang. .
Panungtungan usum 1983-84 ditandaan ku paséa rongkah jeung burantakan dina final Copa del Rey 1984 ngalawan Athlético Bilbao di Santiago Bernabeu, Madrid, nu sacara langsung ngalibetkeun Maradona. Sanggeus nampa tékel kasar deui ti Goikoetxea nu natuan sukuna, tur salila tanding dijejeléh ku bobotoh Bilbao ku igelan xenophobic (anti urang luar), poyokan rasis nu mamawa bapana nu turunan pribumi Amérika, sarta sanggeus dipapanas ku pamaén Bilbao Miguel Sola dina akhir babak alatan Barcelona éléh 1-0, Maradona ngadat. Manéhna cengkat, nangtung sawatara inchi ti Sola sarta duanana paréa-réa omong. Hal ieu nyababkeun réaksi émosi nu nerekab ka kadua tim. Bari jeung sesentak, Sola nurutan poyokan panongton maké gerakan xenophobic. Maradona tuluy ngadagor Sola ku sirahna, nyiku pamaén séjénna, sarta ngadagor pamaén séjénna deui ku tuur semet ka pingsan. Méméh pamaén Barcelona nulungan, Maradona digulung ku pamaén-pamaén Bilbao, sarta Goikoetxea ngajejek dadana. Ti dinya, pamaén Barcelona jeung Bilbao garelut di lapangan bari Maradona di tengah-tengah kaributan bukbek neunggeul jeung najongan sing saha waé nu maké kaos Bilbao.
Tarung massal ieu lumangsung di hareupeun Raja Spanyol Juan Carlos jeung 100.000 panongton di stadium sarta leuwih ti satengah Spanyol nongton na tivi. Sanggeus para bobotoh mimiti ngalung-ngalungkeun barang teuas di lapangan ka para pamaén, palatih jeung malahan mah tukang photo ogé, 60 jalma cidera. Ku insidén ieu, dina naon nu disebut tandang pamungkas Maradona maké kaos Barcelona, sacara éféktif geus mastikeun kapindahan Maradona ti klub . Salah sahiji pajabat Barcelona nyarita, "Waktu kuring ningali Maradona gelut tur disusul ku kakacauan, kuring sadar yén urang teu bisa tuluy jeung manéhna." Maradona remen patelak jeung presidén klub Josep Lluis Nunéz, nu ngujung kana tuntutan pikeun kaluar ti Camp Nou di taun 1984. Dina dua usum nu pinuh ku cidera di Barcelona, Maradona nyitak 38 gul tina 58 kali maén. Maradona pindah ka Napoli di Séri A Italia pikeun bayaran rékor dunia lianna, £6,9 juta ($10,48 juta).
Maradona nepi ka Naples jeung dipréséntasikeun ka média minangka pamaén Napoli tanggal 5 Juli 1984, dibagéakeun ku 75.000 bobotoh di Stadion San Paolo. Panulis olahraga ngoméntaran "Maranéhna (bobotoh) yakin yén panyalamet geus datang." Hiji koran lokal nyatakeun yén "kajeun teuing kakurangan pamingpin, imah, sakola, beus, pagawé jeung sanitasi, teu jadi masalah lantaran urang saréréa miboga Maradona." Méméh kadatangan Maradona, sépakbola Italia didominasi ku tim-tim ti kalér jeung tengah negeri éta, saperti AC MIlan, Juventus, Inter Milan jeung Roma, sarta euwueh tim ti Bobodjong Italia nu kungsi meunang gelar.
Di Napoli, Maradona ngahontal puncak karir profésionalnaː teu kungsi lila manéhna geus diwaris bengker kaptén ti pamaén tukang véteran Giuseppe Bruscolotti sarta jadi béntang pujaan di antara bobotoh klub; dina mangsa dirina maén, Maradona geus hasil ngaronjatkeun tim kana posisi pangsuksésna dina sapanjang sajarah. Maradona maén keur Napoli dina hiji mangsa nalika ténsi Kaler-Kidul di Italia keur panas-panasna alatan sababarah perkara, utamana perbédaan ékonomi di antara kaduana. Dipingpin ku Maradona, Napoli meunang Juara Série A Italia pikeun munggaran pisan di taun 1986-87.Goldblatt nulis, "Hahajatanna kacida tohaga. Pésta jalanan dadakan jeung féstival tuluy-tuluyan lumangsung di sakuliah kota dina karnaval berang peuting nu lumangsung leuwih ti saminggu. Dunia geus pabalik. Neapolitans (bobotoh Napoli) nieun poyokan pamakaman pikeun Juventus jeung Milan, ngaduruk peti matina, dina catetan tilar dunyana dibéwarakeun "Mei 1987, Italia béh ditu geus diéléhkeun. Karajaan anyar geus lahir." Mural Maradona dilukis di gedong-gedong kuno kota sarta barudak nu karak lahir dingaranan Maradona minangka panghormatan. Usum hareupna, trio panyerang tim, nu diwangun ku Maradona, Bruno Giordano jeung Caréca, tuluy dilandi garis hareup "Ma-Gi-Ca" (ajaib).
Napoli meunang deui liga kadua kalina di 1989-90, jeung dua kali runner up di 1987-88 jeung 1988-89. Kahormatan séjénna dina mangsa Maradona di Napoli kaasup Piala Italia 1987, posisi kadua Piala Italia 1989, Piala UEFA 1989 sarta Piala Super Itali di 1990. Najan utamana maén dina peran kréatif minangka galandang serang, Maradona jadi top sekor di Série A taun 1987-88 ku 15 gul, sarta jadi pamingpin panyitak gul Napoli sapanjang mangsa ku 115 gul, méméh peupeus ku Marek Hamsik di taun 2017. Nalika ditanya pamaén mana pangbeuratna nu pernah disinghareupan, pamaén batahan tengah AC Milan, Franco Baresi nimbal, "Maradona; nalika keur jagjag, taya jalan pikeun ngeureunkeun manéhna." Hiji pandangan nu sarua jeung batur satimna, Paolo Maldini, nu nyarita, "Panghadé-hadéna pamaén nu pernah dilawan ku kuring, nya Maradona."
Mangsa Maradona keur suksés di lapangan nalika maén di Italia, masalah pribadina nambahan. Pamakéan kokainna katutuluyan, sarta kudu mayar denda AS$70.000 alatan ngileus tina tanding jeung latihan, cenah mah karna seutrés. Manéhna nyanghareupan skandal ngeunaan hiji budak haramna, sarta jadi obyék kacurigaan gara-gara disangka sosobatan jeung Camorra (salah sahiji kelompok mafia Italia). Ku kituna, dina raraga ngaragangan ka Maradona jeung beubeunanganna nalika karir di Napoli, si nomer 10 ti Napoli sacara resmi dieureunkeun.
Sabada teu meunang maén salila 15 bulan alatan gagal dina tés obat jeung kokain, taun 1992 Maradona ninggalkeun Napoli bari ngarasa hina. Najan aya minat ti Réal Madrid jeung Marséille, manéhna neken kontrak jeung Sevilla, di mana manéhna netep salila sataun. Taun 1993, pindah ka Newell's Old Boys sarta taun 1995 balik deui ka Boca Juniors pikeun periode dua taun. Maradona ogé tampil dina pertandingan panghormatan pikeun Osvaldo Ardiles ngalawan Inter Milan, méméh Piala Dunia 1986. Maradona sorangan meunang pertandingan panghormatan di bulan Nopémber 2001, maén di antara para béntang Dunia XI ngalawan tim nasional Argéntina.
Wanci maén di tim nasional Argéntina, Maradona nyitak 34 gul tina 91 kali maén. Mimiti tanding internasional dina umur 16, ngalawan Hongaria tanggal 27 Pebruari 1977. Maradona teu dibawaan kana pasukan Argéntina dina Piala Dunia 1978 ku palatih Cesar Luis Menotti lantaran umur 17 taun dianggap ngora kénéh teuing. Umur 18, Maradona maén di Piala Dunia Junior FIFA 1979 di Jepang sarta mucunghul jadi béntang turnamén, ngagurilap nalika Argéntina meunang 3-1 di final ngalawan Uni Soviet. Tanggal 2 Juni 1979, Maradona munggaran nyitak gol internasional seniorna nalika meunang 3-1 ngalawan Skotlandia di Hampden Park. Manéhna tuluy maén keur Argéntina dina dua partai Piala Amérika 1979, éléh 2-1 ku Brazil, sarta meunang lawan Bolivia 3-0 di mana Maradona nyitak gol katilu.
Maradona jeung pahlawan sanagarana, Lionel Méssi, mangrupa ngan dua-duana pamaén nu meunangkeun Bal Emas boh dina Piala Dunia U-20 FIFA jeung Piala Dunia FIFA. Maradona meunang di taun 1979 jeung 1986, sedeng Méssi nurutan di 2005 jeung 2014.
Maradona maén munggaran di Piala Dunia 1982 di tempat pangdumukan anyarna, Spanyol. Argéntina ngalawanan Bélgia dina tandang bubuka Piala Dunia 1982 di Camp Nou Barcelona. Para bobotoh Katalan sumanget pisan pikeun nempo laga Maradona, panyepeng rékor dunia kontrak maranéhna. Tapi Maradona tandang teu sapagodos jeung pangharepan alatan si juara batahan kasoran 1-0. Najan kitu Argéntina sacara ngayakinkeun ngéléhkeun Hongaria jeung Él Salvador di Alicante pikeun maju ka babak kadua. Aya kaharénghéng internal dina jero tim, di mana nu ngarora, pamaén nu kurang pangalaman aya dina sahandapeun pamaén nu leuwih pangalaman. Dina jero tim ogé ngarilu pamaén-pamaén saperti Mario Kémpés, Osvaldo Ardiles, Ramon Diaz, Daniel Bertoni, Albérto Tarantini, Ubaldo Fillol jeung Daniel Passarélla. Argéntina éléh ku Brazil dina babak kadua jeung ogé ku pijuaraeun Italia. Kacaturkeun dina tanding ngalawan Italia, Maradona ditempel rapet ku Claudio Gentile, nalika Italia ngéléhkeun Argéntina 2-1 di Sarria Stadium Barcelona.
Maradona maén lima kali bari teu kungsi diganti. Dina tanding pamungkas ngalawan Brazil, Maradona dikaluarkeun pilimameniteun deui kana anggeusan lantaran palanggaran serius ka Batista.
Maradona ngapténan tim nasional Argéntina basa meunangkeun Piala Dunia 1986 di Méksiko. Meunang di final ngalawan Jérman Barat di Kota Méksiko. Salila turnamén Maradona nunjukkeun dominasina jeung minangka pamaén paling dinamis dina turnamén éta. Nyitak 5 gul jeung 5 assist, tilu di antarana dina partai bubuka ngalawan Koréa Selatan di Stadion Olimpico Universitario di Kota Méksiko. Gol kahijina datang nalika ngalawan Italia dina tanding kadua grup di Puebla. Argéntina nyingkirkeun Uruguay dina babak panyisihan kahiji di Puebla, nempatkeun Argéntina jadi pilawaneun Inggris di Stadion Aztéca, ogé di Kota Méksiko. Sabada nyitak dua gul kontras nalika meunang 2-1 ngalawan Inggris di parapat final, kalégendarisanna jadi kapatri. Éndahna gul kadua sarta sohorna gul kahijina, ngaalatankeun koran Perancis L'Equipe ngagambarkeun Maradona minangka "satengah malaikat, satengah sétan". Maradona bari semu-semu ngahindar ngagamberkeun éta téh minangka "sawaréh tina leungeunna jeung sawaréh deui tina leungeun Gusti". Gul éta jadi sohor minangka "Tangan Tuhan". Antukna dina 22 Agustus 2005, Maradona ngaku dina hiji acara tv yén manéhna ngahaja ngagebug bal ku leungeunna jeung teu keuna saeutik ogé kana sirahna, sarta manéhna harita kénéh sadar yén gul éta téh teu sah. Ieu téh jadi hiji kakaliruan internasional nu fatal dina sajarah Piala Dunia. Gul ieu tetep tumetep, jadi kakeuheul pamaén-pamaén Inggris.
Gul kadua Maradona, ngan opat menit sabada hand-gulna nu diprotés bébéakan, tuluy kapilih ku FIFA minangka gul pangalusna dina sajarah Piala Dunia. Manéhna nampa bal ti daérahna sorangan, puputeran sarta ku 11 toélan lumpat leuwih ti satengah lapang, ngagiring bal ngaliwatan lima pamaén Inggris (Peter Beardsley, Steve Hodge, Peter Reid, Terry Butcher jeung Terry Fenwick) méméh ninggalkeun kiper Peter Shilton di satukangeunna ku gerakan tipuan, sarta ngagebluskeun bal kana jaring. Gul ieu kapilih jadi "Gul Abad Ieu" hasil pamilihan online taun 2002 nu diayakeun ku FIFA. Pamilihan Channel 4 di Inggris Raya tahun 2002 nunjukkeun pidanganna dina rangking ka genep dina daptar 100 Kajadian Olahraga Pangéndahna.
Maradiona nuluykeun ku dua gol di semifinal ngalawan Bélgia di Aztéca, kaasup pintonan dribbling éndah séjénna dina gul nu kadua. Dina tanding final, Jérman Barat nyoba nahan manéhna ku pangawalan ganda, tapi najan kitu Maradona tetep nimu lolongkrang ngaliwatan Lothar Matthaus pikeun méré operan ka Jorge Burruchaga keur nyitak gul kameunangan. Argéntina ngéléhkeun Jérman Barat 3-2 di hareupeun 115.000 bobotoh di Aztéca sarta minangka kaptén Maradona ngangkat pialana.
Salila turnamén, Maradona nieun leuwih ti satengahna tina peluang Argéntina, 90 kali dribble jeung diganjal 53 kali nu ngabalukarkeun timna meunang tendangan bebas. Maradona nyitak atawa méré assist 10 tina 14 gul Argéntina, kaasup hiji assist panangtuan di final. Dina ahir turnamén, ku suara buleud, Maradona meunangkeun Bal Emas salaku pamaén panghadéna sarta dianggap saolah-olah meunangkeun Piala Dunia ku sorangan, hiji hal nu mana Maradona teu pati panuju. Zinedine Zidane, nu nongton Piala Dunia wanci keur umur 14 taun, nyaritakeun yén Maradona téh "aya dina tingkatan lain". Pikeun ngahargaan manéhna pihak nu nyepeng Stadion Aztéca ngadegkeun patung manéhna keur nyitak "Gul Abad Ieu" di lawang asup stadion.
Maradona ngapténan deui Argéntina dina Piala Dunia 1990 di Italia nepi ka final ogé. Cidera pigeulang suku mangaruhan kasaluruhan pidanganna, sarta dirina kurang dominan di banding opat taun katukang. Sanggeus éléh dina tanding bubuka ku Kamerun di San Siro Milan, Argéntina ampir kasingkirkeun dina puteran kahiji. ngan nempatan poisisi katilu dina grupna. Dina tanding 16 besar ngalawan Brazil di Turin, Claudio Caniggia nyitak hiji-hijina gul sanggeus dipepernah ku Maradona.
Dina parapat final, Argéntina nyanghareupan Yugoslavia di Florence; lekasan 0-0 sanggeus 120 menit, Argéntina laju ku ngadu pinalti najan Maradona gagal ngasupkeun alatan sepakanna laun ka katuhueun kiper. Dina semifinal ngalawan pribumi Italia di Naples, Stadion Sao Paolo ogé ngujung kana ngadu pinalti sabada imbang 1-1. Ayeuna mah Maradona hasil dina usahana nyitak pinalti. Dina final di Roma, Argéntina kasoran 0-1 ti Jérman Barat. Hiji-hjina gul liwat pinalti Andreas Brehme dina menit ka-85 sanggeus palanggaran kontrovérsial ka Rudi Voller.
Dina Piala Dunia 1994 di Amérika Sérikat, Maradona ngan maén dua kali (duanana Stadion Foxboro deukeut Boston), nyitak sagul ngalawan Yunani, méméh tuluy dipulangkeun alatan gagal dina tés obat-obatan doping ephedrine. Sabada nyitak gul ngalawan Yunani, Maradona nyieun salah sahiji sélébrasi gul Piala Dunia pangsohorna ku lumpat ka salah sahiji kaméra sisi ngocéak bari beungeut dijebéwkeun jeung panon molotot. Ieu téh minangka gul internasional panungtungan Maradona dina tanding pamungkas pikeun nagarana.
Dina otobiographina, Maradona nyangkal yén hasil tés téh alatan palatih pribadina mikeun inuman panambah tanaga Rip Fuel. Ngakuna mah vérsi Amérika, nu teu jiga di Argéntina, ngandung bahan kimia obat téa. Alatan dosis Argéntinana beak, palatihna bari teu nelek-nelek miken racikan Amérika. FIFA ngusir dirina di AS 1994 sarta Argéntina tuluy kasingkirkeun dina puteran kadua ku Rumania di Los Angeles. Maradona ogé sacara kapisah ngaku yén manéhna geus nyieun kasupaketan jeung FIFA, najan dibantah ku FIFA, pikeun ngijinan manéhna ngagunakeun obat éta pikeun ngurangan beurat badanna méméh kompétisi sangkan bisa maén. Kagagalanna dina tés obat dina Piala Dunia 1994 nandaan ahir tina karir internasionalna nu geus lumangsung salila 17 taun sarta ngahasilkeun 31 gul tina 91 kali maén, ogé sakali meunang Piala Dunia jeung sakali runners up.
"Diégo mampu ngalakukeun hal-hal nu jalma séjén teu bisa. Hal nu bisa ku kuring dipilampah maké bal, ku manéhna mah bisa dipilampah maké jeruk."
- Michel Paltini, manten galandang Perancis ngeunaan kontrol bal Maradona.
Maradona sohor ku kamampuan dribbling-na, visi, kontrol bal, operan jeung kréatifitasna sarta dianggap salah saurang pamaén olahraga pangmasagina. Mibanda awak nu pepel, sarta ku alatan sukuna nu kuat jeung awakna nu pendék manéhna bisa nadah tekanan pisik lawan bari ngagiring bal. Manten pamaén Walanda Johan Cruyff nempo kasaruan antara Maradona jeun Méssi di mana ngalika ngagiring, bal katempona siga nu nempél waé kana suku. Dirina mangrupa pamaén strategis jeung pamaén tim, ogé mibanda téhnik nu luhung. Manéhna bisa ngatur awakna sacara éféktif dina ruang nu kawates, sarta bakal mancing pamaén tukang lawan ukur pikeun sacara kilat ngaleupaskeun seranganna (jiga gul kadua nalika lawan Inggris di taun 1986), atawa méré assist ka baturna nu dina kaayaan laluasa. Alatan kuat jeung pendék manéhna bisa nahan bal sakitu lilana bari ditutur-tutur ku pamaén tukang lawan pikeun nunggu baturna lalumpat ka hareup atawa pikeun manggihan lolongkrang pikeun tembakan kilat. Dirina nunjukkeun kualitas kapamingpinan di lapangan sarta jadi kaptén Argéntina di tilu Piala Dunia, 1986, 1990 jeung 1994.
Maradona jadi pamingpin di lapang jeung di luar lapang. Kamampuan Maradona salaku pamaén jeung kapribadiaanna nu sok ngawasa méré dampak positif nu gedé pikeun timna. Batur maéna dina Piala Dunia 1986, Jorge Valdano nyarita: "Maradona téh hiji pamingpin téhnis: hiji jalma nu mecahkeun sagala karerepet nu bisa bijil di lapangan. Kahijina, manéhna téh bisa nyieun mukjijat, hiji hal nu méré kayakinan ka batur-bautrna. Kaduana, lingkung sélébritina geus mampu nyedot sagala tekenan pikeun batur-batur satimna. Maksud kuring téh, saurang pamaén bisa saré tibra dina peuting méméh maén lain wungkul karana apal yén manéhna maén jeung Diégo nu bisa milampah hal nu pamaén lain teu bisa, tapi ogé alatan sacara teu nyadar urang ngarasa yén lamun ninggang di éléh mangka Maradona bakal nanggung beban panglobana, bakal paling disalahkeun tibatan urang-urang. Muji kana kharisma Maradona, batur maén séjénna. Kitu tah pangaruh manéhna téh dina jero tim." Striker subur Gabriel Batistuta muji: "Diégo bisa maréntah ka sa-stadion, nyieun unggal jalma lalajo manéhna. Kuring kungsi maén jeung manéhna sarta kuring bisa ngabéjaan ka anjeun kumaha pentingna manéhna pikeun tim."
"Najan kuring maén jutaan taun, kuring moal bisa nandingan Maradona, taya niat ka dinya bari na gé. Manéhna pamaén pangpunjulna nu pernah aya." ——Lionel Méssi, pamaén nu pangpantesna dilandi ku sebutan "Maradona Anyar" |
Salah sahiji ciri khas Maradona nyaéta dribbling ku kacepetan pinuh di sayap katuhu, tuluy nalika nepi kana garis gawang lawan ngaleupaskeun operan nu akurat pikeun baturna. Ciri khas séjénna nyaéta rabona, hiji operan dina gerakan suku ngagunting satukangeun suku séjénna. Manuper ieu ngahasilkeun kana sababaraha assist, contona eupan mumbul pikeun sundulan Ramon Diaz lawan Swiss di taun 1980. Manéhna ogé tukang nyépak tendangan bébas jeung pinalti nu ngabahayakeun. Téhnik tendangan bébasna, di mana mineung katempo manéhna ngangkat tuur dina hiji sudut nu luhur nalika némbakeun bal, balukarna bal melentung ngaliwatan témbok pertahanan. Kukituna manéhna bisa nyitak gul tendangan bébas sanajan jarakna deukeut, dina 22 nepi ka 17 kaki (20 ka 16 méter) tina gawang, atawa malahan pas di saluareun aréa pinalti.
Maradona kawentar ku kapribadiaanna nu licik. Luyu jeung landianna "El Pibe de Oro" (Anak Emas) nu boga kesan jahat, ku "pibe" ngandung harti ogé tukang tipu anti kamapanan, budak jalanan nu cerdas sarta pinuh muslihat. Sawatara kritikan nempo gul "Tangan Tuhan" kontorvérsialna dina Piala Dunia 1986 minangka hiji manuper pinter. Salah saurang pamaén lawan, Glenn Hoddle, nyebutkeun yén Maradona geus nyamurkeun gul éta ku ngagitekkeun sirahna bareng jeung nepak bal. Gol éta dipandang minangka pangwujudan watek ti kawasan kumuh Buénos Aires di mana Maradona digedékeun sarta konsepan kota éta, viveza criolla - "licik bawaan". Sawatara loba kritikan kana gul kahijina nu teu sah, panyerang Inggris, Gary Lineker ngaku, "Nalika Diégo nyitak gul kadua éta ngalawan urang, kuring ngarasa siga ngeprokan. Kuring can pernah ngarasa siga kitu saméméhna, tapi éta téh nyata... sarta lain alatan éta téh hiji pertandingan penting. Ampir teu mungkin pikeun nyitak gul nu sakitu éndahna. Manéhna téh pamaén pangpunjulna salilana. Hiji fénoména asli." Maradona ngagunakeun leungeunna deui dina Piala Dunia 1990, ogé teu meunang hukuman, ayeuna mah dina garis gawangna sorangan, nyegah Uni Soviet pikeun nyitak gul. Sajumlah publikasi geus nyaruakeun Maradona minangka si Artful Dodger, copet bebenyit malarat dina buku Charles Dickens, Oliver Twist.
Maradona téh saurang pamaén nu sacara dominan maké suku kénca, remen maké suku kéncana sanajan bal leuwih ngeunaheun pikeun suku katuhu. Contona dina gul dina Piala Dunia 1986 nalika ngalawan Bélgia di semifinal jeung ngalawan Inggris di parapat final téa.
Taun 1990, Yayasan Konex ti Argéntina ngadeudeul Maradona ku Panghargaan Berlian Konex, salah sahiji panghargaan budaya nu pangpréstisiusna di Argéntina, minangka pribadi pangpentingna dina widang olahraga dina dekade terahir di jero negeri. Taun 2.000, Maradona ngapublikasikeun otobiographina Yo Soy Él Diégo (Kuring si Diégo), nu laris di Argéntina. Dua taun ti harita, Maradona nyumbangkeun royalti bukuna di Kuba ka "Masyarakat Kuba jeung Fidel".
Taun 2.000, Maradona meunang panghargaan pamaén FIFA Abad Ieu nu diputuskeun liwat pamilihan suara dina website, majalah resmina jeung para juri. Maradona meunang dina pamiihan dumasar kana internét, ngumpulkeun 53,6% suara lawan Pélé 18.53%. Tapi sanajan kitu, saméméh upacara panyérénan, FIFA nambahkeun panghargaan kadua sarta nunjuk komisi "Kulawarga Sépakbola" nu dieusi ku jurnalis sépakbola nu ogé ngaanugrahan Pélé minangka pamaén panghadéna dina abad ieu. Maradona ogé nempatan posisi kalima dina pamilihan di IFFHS (International Federation of Football History and Statistics). Taun 2001, Argentine Football Association (AFA) ngajukeun ka FIFA pikeun kawenangan matrikeun nomer kaos 10 ka Maradona. FIFA teu ngaijabah, tapi pajabat Argéntina nyebutkeun yén FIFA geus ngisyaratkeun bakal.
Maradona geus ngunggulan dina sababaraha polling, kaasup polling FIFA taun 2002 nu nempatkeun gul kaduana ka Inggris kapilih jadi gul panghadé-hadéna salila Piala Dunia. Manéhna ge meunang sora pangréana dina polling pamilihan Tim Pamungkas Piala Dunia Sapanjang Waktu. Tanggal 22 Maret 2010, Maradona kapilih jadi nomer 1 dina 10 pamaén Piala Dunia Pangpunjulna nu diayakeun ku surat kabar London, the Times. Argéntinos Junior ngaganti ngaran stadionna jadi Maradona dina tanggal 26 Désémber 2003. Taun 2003, Maradona digawékeun ku pamaén bal Libya Al Saadi Gadafi, anak ka tilu Kolonél Muammar Gadafi, minangka konsultan téhnik.
Tanggal 22 Juni 2005, dibéwarakeun yén Maradona bakal mulang deui ka manten klubna, Boca Juniors, minangka wakil présidén olahraga nu tanggung jawab kana ngatur rancangan Divisi Hiji (sanggeus usum 2004-05 nu nguciwakeun, nu bareng jeung saabadna Boca). Kontrakna dimimitian tanggal 1 Agustus 2005, salah sahiji rekomendasina nu kabuktian éféktif: ngusulkeun klub pikeun nyéwa Alfio Basile salaku palatih anyar. Ku Maradona ngabina hubungan nu raket jeung pamaén, Boca meunang Apertura taun 2005, Clausura 2006, Piala Sudamericana 2005 jeung Recopa Sudamericana 2005.
Tanggal 15 Agustus 2005, Maradona ngamimitian jadi pamawa acara talk show dina tv Argéntina, La Noche del 10 (Peuting si No. 10). Tamu dina peuting kahijina nyaéta Pélé; duanana layeut ngobrol, nunjukkeun taya tanda-tanda pasalia katukang. Najan kitu, dina acara éta nampilkeun hiji kartun tokoh jahat nu sacara fisik rimbag jeung Pélé. Rating acara ngunggulan acara séjén-séjénna, ngan aya hiji nu heunteu téh. Lolobana tamuna dicokot tina dunia ménbal jeung bisnis pintonan, kaasup Ronaldo jeung Zidane. Tapi aya ogé wawancara jeung sobat sarta jalma-jalma penting lianna, contona pamingpin Kuba, Fidel Castro, sarta patinju Roberto Duran jeung Mike Tyson. Maradona mahanan tamu-tamuna ku kaos Argéntina nu ku Tyson dipaké nalika datang ka Brazil, saingan Argéntina panggedéna.
Bulan Méi 2006, Maradona satuju pikeun icikibung dina Bantuan Sepakbola Inggris Raya (hiji program pikeun ngumpulkeun sumbangan keur Unicef). Dina Séptémber 2006, Maradona, ngapténan Argéntina dina turnamén tilu poé Piala Dunia Indoor di Spanyol. Tanggal 26 Agustus 2006, dibéwarakeun yén Maradona geus eureun dina posisina di Boca Juniors alatan pabéntar paham jeung AFA nu mililh Alfio Basile jadi palatih anyar tim nasional Argéntina. Taun 2008, tukang filem Sérbia, Emir Kusturica nyieun filem dokuménter ngeunaan kahirupan Maradona, nu dijudulan Maradona.
Tanggal 1 Séptémber, Maradona jeung réngréngan béntang manten pamaén bal, ilibiung dina "Tanding Pikeun Kadamaian", nu dipaénkeun di Stadio Olimpico Roma, di mana kauntunganna bakal disumbangkeun pikeun amal. Maradona memernah gul Roberto Baggio dina babak kahiji. Teu cara biasana, boh Maradona boh Baggio maraké kaos nomer 10 najan maén dina satim. Tanggal 17 Agustus 2015 Maradona nepungan Ali bin Nasser, wasit urang Tunisia dina tanding parapat final Piala Dunia 1986, Argéntina - Inggris, nalika Maradona nyétak Tangan Tuhanna, sarta méré hadiah ka manéhna ku kaos Argéntina.
Maradona ngamimitian karir manajerialna bareng jeung manten batur maénna di Argéntinos Junior, Carlos Frén. Pasangan éta mingpin Mandiyu ti Corrientes di 1994 sarta Racing Club di 1995, bari teu pati hasil. Mei 2011 Maradona jadi manajer klub Dubai Al Wasi FC di Uni Émirat Arab. Maradona dipecat dina tanggal 10 Juli 2012."India" Agustus 2013, Maradona pindah jeung jadi palatih mentah di klub Argéntina Déportivo Riestra. Maradona ninggalkeun peran éta taun 2017 pikeun jadi kapala palatih di Fujairah, di divisi dua UÉA, méméh indit di ujung usum alatan gagal ngamankeun promosi klubna. Bulan Séptémber 2018 manéhna ditunjuk jadi manajer tim divisi dua Méksiko, Dorados. 13 Juni 2019, sanggeus Dorados gagal promosi ka kelas luhureunna, Pangacara Maradona ngumumkeun yén manéhna eureun jadi palatih alatan alesan kaséhatan.
Sanggeus pangsiunna palatih Alfion Basile ti tim nasional dina taun 2008, Maradona haripeut ngasongkeun dirina pikeun ngeusi kakosongan. Numutkeun sawatara sumber préss, saingan utamana téh kaasup Diégo Simeoné, Carlos Bianchi, Miguél Angél Russo jeung Sérgio Batista. Tanggal 29 Oktober 2008, pimpinan AFA Julio Grondona mastikeun yén Maradona bakal jadi kapala palatih tim nasional. Tanggal 19 Nopémber 2008, Maradona mawa Argéntina kana kameunangan kahijina nalika ngalawan Skotlandia di Hampden Park Galsgow ku 1-0.
Sanggeus meunang tilu tanding awal, Maradona lalajo timna kasoran ti Bolivia 1-6, nyaruaan hasil kaéléhan pangbutut-bututna nu pernah kaalaman ku tim. Ku tinggal dua kali deui sésa maén dina turnamén kualifikasi pikeun Piala Dunia 2010, Argéntina aya dina posisi lima jeung ampir-ampiran kasingkir. Untung wé dua kali meunang dina laga panungtung ngaloloskeun Argéntina ka final. Sanggeus lolos, Maradona ngaluarkeun kekecapan garihal dina konfrénsi préss bada maén, nyarita ka anggota média ku kecap nu kurang leuwih hartina "kasebelan, tuluy wé pikasebeleun". FIFA ngaréspon ku larangan dua bulan dina sagala aktifitas ménbal, semet ka tanggal 15 Januari 2010, ogé denda 25.000 CHF sarta tegoran keur kalakuanna pika hareupeun.
Dina final Piala Dunia 2010, Argéntina ngamimitian ku meunang 1-0 ngalawan Nigeria, tuluy meunang 4-1 ngalawan Koréa Selatan ku hattrick Gonzalo Higuain. di akhir laga grup Argéntina ngéléhkeun Yunani 2-0 sarta jadi juara grup laju tuluy panggih jeung Méksiko. Sanggeus ngéléhkeun Méksiko 3-1, antukna, Argéntina dilindes ku Jérman 4-0 dina parapat final, kasingkir tina kompétisi. Argéntina meunang paringkat ka lima dina turnamén. Sanggeus éléh ku Jérman, Maradona ngaku yén manéhna nimbang-nimbang pika hareupenna minangka palatih, cumarita, "kuring meureun miang isukan." Tanggal 15 Juli 2010, AFA nyatakeun yén Maradona bakal ditawaran deui jadi palatih salila 4 taun ka hareup semet ka Piala Dunia 2014 di Brazil. Tapi, tanggal 27 Juli, AFA ngumumkeun yén anggota déwanna geus mupakat kalayan buleud moal manjangan kontrakna. Bada ti éta, tanggal 29 Juli, Maradona nyebutkeun yén présidén AFA, Julio Grondona jeung diréktur tim nasional (nu mangrupa ogé urut batur maénna di tim nasional sarta palatih Sevilla) Carlos Bilardo geus ngabohong, khianat kalayan sacara nyata mecat manéhna. Manéhna nyarita, "Maranéhna hayang kuring nuluykeun, tapi tujuh tina pagawé kuring kudu eureun, lamun kitu mah, sarua wé jeung nolak kuring tuluy mancén.
Lahir ti kulawarga Katolik Roma, bapana Diégo Maradona Senior sarta indungna Dalma Salvadora Franco. Maradona ngadahup ka tunangan heubeulna, Claudia Villafane dina tanggal 7 Nopémber 1984 di Buenos Aires, sarta boga dua anak, Dalma Nerea (2 April 1987) jeung Cianinna Dinorah (16 Mei 1989) nu ngajadikeun dirina hiji aki dina taun 2009.
Maradona jeung Villafane pepegatan taun 2004. Budakna, Dalma ngajéntrékeun yén pepegatan éta téh solusi panghadéna pikeun saréréa. Kadua kolotna masih tetep nyobat. Maranéhna indit-inditan bareng ka Naples pikeun sarangkaian acara kahormatan dina Juni 2005 sarta katempo bareng dina kasempetan séjénna, kaasup laga-laga Argéntina dina Piala Dunia 2006.
Mangsa urusan cerai keur diprosés, Maradona ngaku yén manéhna téh bapa ti Diégo Sinagra (lahir di Naples tanggal 20 Séptémber 1986). Pangadilan Italia geus mutuskeun kitu taun 1993, sanggeus Maradona nolak tés DNA pikeun pangbuktian. Diégo Junior tepung jeung Maradona mimiti pisan dina bulan Mei 2003 sanggeus nyelendep ka lapangan golep di Italia di mana Maradona keur maén.
Maradona boga hubungan nu raket jeung kulawargana, taun 1990 wawancara jeung Sports Illustrated manéhna nembongkeun tagihan telepon meakkeun 15.000 dolar AS per bulan pikeun nelpon kolot jeung dulur-dulurna. Indung Maradona, Dalma, maot tanggal 19 Nopémber 2011. Harita manéhna keur di Dubai, sarta bari jeung peunggas harepan satekah polah balik muru waktu hayang nempo indungna, tapi telat teuing. Umur Indungna 81 taun. Bapana, "Don" Diégo, maot tanggal 25 Juni dina umur 87.
Incu ti gigir Maradona, Hernan, ogé saurang pamaén bola profésional.
Ti tengah-tengah 1980-an nepi 2005, Maradona kacanduan ku kokain. Manéhna dituduh mimiti maké obat di Barcelona tahun 1983. Mangsa maén di Napoli, manéhna geus kateterusan kacanduan nu jadi matak kana kamampuan na dina maénbal.
Maradona ngabogaan kacondongan kana ngagendutan sarta nandangan masalah obesitas nu tuluy nambah, kungsi ditimbang beuratna 130 kg. Manéhna ngagendutan ti mimiti eureun karir maénna nepi ka nandangan operasi bépas lambung di hiji klinik di Cartagena de Indias, Colombia tanggal 6 Maret 2005. Dokter bedahna nitah sangkan Maradona ngajalankeun diet cairan salila tilu bulan keur malikkeun beurat awakna. Nalika Maradona nembongan hareupeun umum, katempo pangawakanna lumayan rada begang. Tanggal 29 Maret 2007, Maradona asup deui ka hiji rumah sakit di Buénos Aires. Manéhna dirawat alatan hépatisis jeung pangaruh loba teuing alkohol sarta kaluar tanggal 11 April. Tapi dua poé ti harita dirawat deui. Dina poé-poé satuluyna nyebar rumor ngeunaan kaséhatanna, kaasup kana tilu kalina dina sabulan kabéjakeun maot. Sanggeus dipindahkeun ka klinik psychiatrik nu ngahususkeun kana masalah nu pakait jeung alkohol, Maradona kaluar tanggal 7 Méi. Tanggal 8 Méi 2007, Maradona nembongan na tivi sarta ngaku yén manéhna téh geus eureun kana nginum jeng geus teu maké obat-obatan salila dua satengah taun. Januari 2019, Maradona dioperasi deui sanggeus hérniana ngabalukarkeun geutihan di jero dina beuteungna.
Sanggeus saméméhna vokal ngadukung Présidén Argéntina Carlos Menem nu neoliberal sarta palaku ekonomina nu lulusan Harvard, Domingo Cavallo, Maradona nunjukeun simpatina ka ideologi sayap kiri. Manéhna jadi sobat pamingpin Kuba Fidel Castro nalika keur dirawat di kapuloan Kuba, Castro nyarita, "Diégo téh hiji sobat nu hébat tur mulya. Ogé tong ditanyakeun deui lamun manéhna téh hiji atlit nu tanggoh sarta tetep miara sosobatanna jeung Kuba tanpa aya pamrih nanaon." Maradona boga tato potret Castro dina suku kéncana sarta jalma kadua Castro, sarua ti Argéntina, Ché Guévara, lebah leungeun katuhuna. Dina otobiographina, manéhna ngadédikasikeun bukuna ka mangrupa-rupa jalma, kaasup Castro. Manéhna nulis, "Keur Fidel Castro, sarta ngaliwatan dirina, sakabéh rakyat Cuba."
Maradona ogé minangka saurang pangrojong pikeun manten Présidén Venezula, Hugp Chavéz. Taun 2005, manéhna indit ka Vénézuéla nepungan Chavéz nu nampa manéhna di Istana Miraflores. Réngsé patepung, Maradona ngaku yén tadina mah manéhna téh rek nepungan saurang "great man" (jalma gedé, "un grande" dina bahasa Spanyol), tapi malah panggih jeung saurang "gigantic man" (jalma raksasa, "un gigante" dina bahasa Spanyol, maksudna leuwih-leuwih ti jalma gedé). "Kuring mah percaya ka Chavéz, kuring simpatisan Chavéz (Chavista). Naon waé nu dipigawé ku Fidel, naon waé nu dipigawé ku Chavéz, pikeun kuring mah pangalusna." Maradona jadi tamu kahormatan Chavéz dina tanding bubuka Piala Amérika 2007 di Vénézuéla.
Maradona geus nyatakeun panentanganna kana naon nu ku manéhna disebut minangka imperialisme, babakuna nalika Pasamoan Amérika di Mar dél Plata, Argéntina. Di dinya manéhna ngaprotés kahadiran George W Bush di Argéntina, mamaké kaos ditulisan "STOP BUSH" (bari hurup "s" dina "Bush" diganti ku swastika) sarta nyebutkeun Bush minangka "runtah manusa". Dina bulan Agustus 2007, Maradona beuki jauh deui, minton dina acara mingguan Chavéz, Alo Présidénte sarta nyarita, "Kuring ceuceub kana naon waé nu datang ti Amérika Serikat. Ceuceub kabina-bina." Dina Désember 2008, najan kitu, Maradona nyokot sikap nu leuwih pro-AS nalika manéhna nembongkeun kasukaanna ka pangganti Bush, présidén kapilih Barack Obama, sarta nyepeng harepan nu gedé ti manéhna.
Perwatek kawasan kumuh miskin dijadikeun ku Maradona minangka sosok kamasyarakatanna. Nalika panggih jeung Paus John Paul KK di Vatikan taun 1987, maranéhna pasalia ngeunaan isu teu ratana kasajahtraan, ku caritaan Maradona, "Kuring debat jeung manéhna sabab kuring keur di Vatikan jeung kuring nempo éta kabéh lalangit emas sarta tuluy ngadénge Paus nyarita yén Garéja mikamelang kana kasajahtraan barudak miskin. Jual wé atuh lalangit éta téh, amigo, usaha!" Dina bulan Séptémber 2014 Maradona panggih jeung Paus Francis di Roma, mumuji Francis alatan ngailhaman manéhna pikeun balik deui kana agama saeunggeus sakitu lilana; manéhna nyarita, "Urang kabéh kudu nurutan Paus Francis. Lamun tiap saurang di antara urang méré naon waé ka nu lian, moal aya di dunya ieu nu kalaparan."
Bulan Désémber 2007, Maradona nyérénkeun hiji kaos meunang néken bari maké pesen nu ngadukung masarakat Iran: dipajang di museum Kaméntrian Luar Nagri Iran. Bulan April 2013, Maradona zarah ka makam Huqo Chavéz sarta ngajujurung urang Vénézuéla sangkan milih pangganti nu geus diancokeun ku jenatna, Nicolas Maduro, sangkan nuluykeun warisan kapamingpinan sosialis; "Tuluykeun pajoangan," Maradona nyarita dian tivi. Maradona ngahadiran kampanye akhir Maduro nu lumangsung di Karakas, nanda tangan bal jeung tuluy disepak ka balaréa, sarta mikeun hiji kaos Argéntina ka Maduro. Sanggeus zarah ti makam Chavéz, bareng jeung Maradona, Maduro nyarita, "Ngobrol jeung Maradona matak pikasediheun lantaran comandante Chavéz mikaresep pisan ka jinisna." Maradona icikibung jeung jojogédan nalika kampanye nu lumangsung dina pamilihan présidén Vénézuéla taun 2018. Mangsa krisis kaprésidénan Vénézuéla taun 2019. Federasi Sépakbola Méksiko ngadenda manéhna alatan ngalanggar kode etik jeung mikeun tropi kameunangan ka Nicolas Maduro.
Bulan Oktober 2015, Maradona nganuhunkeun Ratu Elizabeth II jeung Parlemén Inggris di London alatan méré kasempetan ka manéhna pikeun nyadiaan "kaadilan sajati" salaku pupuhu dina hiji organisasi nu dijieun pikeun nulungan barudak leutik. Dina hiji video nu dikaluarkeun dina laman Facebook resmina, Maradona mastikeun yén manéhna bakal nampa panyalonan dirina keur jadi diréktur Amérika Latin pikeun organisasi non-pamarentah Football for Unity.
Bulan Maret 2009, pajabat Italia ngabéwarakeun yén Maradona masih boga hutang ka pamarentah Italia 37 juta euro dina urusan pajak lokal; 23,5 juta euro mangrupa tambahan bunga tina hutang aslina, Maradona ngan mayar 42.000 euro pikeun arloji méwah jeung anting sasetél.
Tanggal 25 Nopémber 2020, dina umur 60 taun, Maradona tilar dunya di imahna di Buénos Aires alatan serangan jantung. Saméméhna, di awal Nopémber Maradona kebat nandangan operasi di otakna gara-gara aya geutih ngaguruntul (hematoma subdural). Présidén Argéntina, Alberto Fenandez, ngabéwarakeun tilu poé sungkawa nasional di Argéntina, dina raraga ngahormat ka Maradona. Maradona dikurebkeun di Pamakaman Bella Vista di pasisian Buéno Aires, Argéntina, dina tanggal 27 Nopémber 2020.
Koran Amérika The Houston Chronicle nulis ngeunaan Maradona:
Sanggkan ngarti kana rohakana bayangan Maradona di lemah caina nu kaédanan menbal, jalma kudu nyambat pangabisa Michael Jordan, kakuatan Babe Ruth jeung kaléléwodéhan Mike Tyson. Galokeun kabéh dina hiji jalma nu simar dada bewos jémros, tah éta El Diégo téh, pujaan jutaan jalma nu nyebut dirina ku D10S, campuran tina nomer maénna jeung kecap Spanyol pikeun nyebut déwa.
Sanggkan ngarti kana rohakana bayangan Maradona di lemah caina nu kaédanan menbal, jalma kudu nyambat pangabisa Michael Jordan, kakuatan Babe Ruth jeung kaléléwodéhan Mike Tyson. Galokeun kabéh dina hiji jalma nu simar dada béwos jémros, tah éta El Diégo téh, pujaan jutaan jalma nu nyebut dirina ku D10S, campuran tina nomer maénna jeung kecap Spanyol pikeun nyebut déwa.
Di Argéntina, Maradona dianggap minangka pahlawan nasional. Ngeunaan pamujaan nu nyampak di Argéntina, manten batur maénna, Jorge Valdano nyarita, "Wanci Maradona mundur tina aktifitas sépakbola, ninggalkeun trauma pikeun Argéntina. Maradona leuwih ti ngan saukur pamaén bal nu hadé. Manéhna téh faktor pangbeubeurah khusus pikeun hiji nagara nu geus mangtaun-taun aya dina kadiktatoran militer jeung sagala macem frustasi sosial." Valdano nambahkeun yén "Maradona nawarkeun ka rakyat Argéntina hiji jalan kaluar tina frustasi massal maranéhna, éta nu matak nyieun rakyat mikacinta dirina. Aya tangtungan panutan."
Maradona diasupkan kaba rupa-rupa cameo dina buku komik Argéntina, Él Cazador de Aventuras. Sanggeus ditutup, pangarangna ngajieun hiji buku komik pondok anyar dijudulan "Él Die", maké Maradona salaku karakter utamana. Maradona ogé aya dina sababaraha kaulinan kilat online nu kabéhna didédikasikeun pikeun dirina. Di Rosario, Argéntina, urang dinya nyieun parodi agama "Garéja Maradona". Kumpulan éta ngarumuskeun rupa-rupa unsur dina tradisi Karésten saperti Natal atawa do'a-do'a, jadi ngeunteungkeun detil Maradona. Kumpulan éta dijieun ku 200 anggota sarta tuluy nambahan puluhuan rébu leuwih anggotana liwat website resmina.
"Unggal jalma boga opini ngeunaan Maradona, hal éta geus kajadian ti poé-poé mimiti manéhna maén. Pintonanna nu sakitu éndah sarta gul luar biasana di Méksiko 86 bakal salawasna nyayang dina ingetan jalma-jalma nu mikaresep ménbal, ka asup kuring. Ingetan kuring nu paling nyata nyaéta hiji budak nu boga bakat luar biasa di Piala Dunai FIFA U20 di Jepang. Manéhna nieun unggal jalma calangap tiap-tiap meunang bal."
- Présidén FIFA Sepp Blatter
Réa artis Argéntina mintonkeun lagu dina raraga ngahormat Diégo, contona "Marado" ku El Potro Rodrigo, "Maradona" ku Andres Calamaro, "Para siempre Diégo" (Diégo salilana) ku Los Ratones Paranoicos,"Francotirador" (Sniper) ku Attaque 77, "Maradona Blues" ku Charly Garcia, "Santa Maradona" ku Mano Negra, "La Vida Tombola"ku Mano Chao, jeung nu lianna. Ogé aya filem siga: Maradona, La Mano dé Dios (Maradona, si Tangan Tuhan), Él Camino dé San Diégo (Jalan Saint Diégo), Amando a Maradona (Micinta Maradona), "Maradona" ku Kusturica.
Taun 1982, Maradona jadi salah sahiji bentang olahraga panggedéna jeung geus néken kontrak jeung rupa-rupa pausahaan, kaasup Puma jeung Coca-Cola, nambahan panghasilanna ku 1.5 juta dolar per taun ngaleuwihan gajih klubna. Taun 1982, manéhna mintonkeun iklan Piala Dunia pikeun Coca-Cola jeung iklan di Jepang pikeun Puma. Taun 2010 manéhna kaluar dina hiji iklan pikeun imah fésyen Perancis Louis Vuitton, maén sépakbola méja bareng jeung batur-baturna nu sarua meunang Piala Dunia, Pélé jeung Zinedine Zidane. Maradona makalangan ogé dina video musik keur lagu Piala Dunia 2010 "Waka-Waka" ku Shakira, dina filemna nempokeun manéhna ngarayakeun kameunangan Argéntina dina Piala Dunia 1986.
Hiji iklan tivi taun 2006 pikeun minuman ringan Brazil Guarana Antarctica ngagambarkeun Maradona minangka anggota tim nasional Brazil, maké baju konéng jeung nyanyi lagu nasional Brasil bareng jeung pamaén Brazil Ronaldo jeung Kaka. Tuluy dina iklan éta téh manéhna hudang sarta nyadar manéhna tas ngimpi sanggeus mabok gara-gara loba teuing nginum. Sanggeus ditontonkeun, hal ieu nimbulkeun kontroversi di kalangan média Argéntina (najan sabenerna mah iklan éta téh lain pikeun tontoneun urang Argéntina, bobotoh bisa nempo online). Maradona ngajawab yén manéhna teu boga masalah maké kaos Brazil, najan Argéntina jeung Brazil téh minangka musuh satru dina ménbal, tapi Maradona nyatakeun yén manéhna bakal nolak mun kudu maké kaos River Plate, musuh bubuyutan Boca Juniors. Kacatetkeun ogé fénomena urang-urang Brazil nu maké ngaran Maradona minangka panghormatan, contona pamaén bola Diégo Costa.
Taun 2017, Maradona dipintonkeun minangka hiji pamaén légendaris dina video game FIFA 18 jeung Pro Evolution Soccer 2018. Taun 2019, hiji filem dokuménter dikaluarkeun ku nu meunangkeun Academy Award jeung BAFTA Award tukang nieun filem Asif Kapadia, diréktur Filem Amy (ngeunaan panyanyi Amy Winehouse) jeung Filem Sénna (ngeunaan pabalap Ayrton Senna). Kapaida nyarita. "Maradona téh bagéan katilu tina trilogi ngeunaan budak jenius jeung sohor." Manéhna nambahkeun, "Kuring kapincut ku lalampahanna, ka mana waé manéhna indit aya waé kajadian-kajadian cerdas nu luar biasa jeung drama. Manéhna téh pamingpin, mawa timna ka puncak, tapi ogé sering kasoran dina karirna. Manéhna salawasna ibarat jalma leutik nu ngalawan sistem... sarta daék ngalakukeun naon waé, ngagunakeun kalicikan jeung intelejensina pikeun meunang.
Season | Klub | Liga | Liga | Piala | Benua | Lianna | Total | |||||
---|---|---|---|---|---|---|---|---|---|---|---|---|
Maen | Gul | Maen | Gul | Maen | Gul | Maen | Gul | Maen | Gul | |||
1976 | Argentinos Juniors | Primera División | 11 | 2 | 0 | 0 | – | – | 13 | 2 | ||
1977 | 49 | 19 | 0 | 0 | – | – | 49 | 19 | ||||
1978 | 35 | 26 | 0 | 0 | – | – | 35 | 26 | ||||
1979 | 26 | 26 | 0 | 0 | – | – | 26 | 26 | ||||
1980 | 45 | 43 | 0 | 0 | – | – | 45 | 43 | ||||
1981 | Boca Juniors | 40 | 28 | 0 | 0 | – | – | 40 | 28 | |||
1982–83 | Barcelona | La Liga | 20 | 11 | 5 | 3 | 4 | 5 | 6 | 4 | 35 | 23 |
1983–84 | 16 | 11 | 4 | 1 | 3 | 3 | – | 23 | 15 | |||
1984–85 | Napoli | Série A | 30 | 14 | 6 | 3 | – | – | 36 | 17 | ||
1985–86 | 29 | 11 | 2 | 2 | – | – | 31 | 13 | ||||
1986–87 | 29 | 10 | 10 | 7 | 2 | 0 | – | 41 | 17 | |||
1987–88 | 28 | 15 | 9 | 6 | 2 | 0 | – | 39 | 21 | |||
1988–89 | 26 | 9 | 12 | 7 | 12 | 3 | – | 50 | 19 | |||
1989–90 | 28 | 16 | 3 | 2 | 5 | 0 | – | 36 | 18 | |||
1990–91 | 18 | 6 | 3 | 2 | 4 | 2 | 1 | 0 | 26 | 10 | ||
1992–93 | Sevilla | La Liga | 26 | 5 | 3 | 1 | – | – | 29 | 6 | ||
1993–94 | Newell's Old Boys | Primera División | 5 | 0 | – | – | – | 5 | 0 | |||
1995–96 | Boca Juniors | 24 | 5 | – | – | – | 24 | 5 | ||||
1996–97 | 1 | 0 | – | – | 1 | 0 | 2 | 0 | ||||
1997–98 | 5 | 2 | – | – | – | 5 | 2 | |||||
Total | Argentinos Juniors | 166 | 116 | – | – | – | 166 | 116 | ||||
Boca Juniors | 70 | 35 | – | – | 1 | 0 | 71 | 35 | ||||
Barcelona | 36 | 22 | 9 | 4 | 7 | 8 | 6 | 4 | 58 | 38 | ||
Napoli | 188 | 81 | 45 | 29 | 25 | 5 | 1 | 0 | 259 | 115 | ||
Sevilla | 26 | 5 | 3 | 1 | – | – | 29 | 6 | ||||
Newell's Old Boys | 5 | 0 | – | – | – | 5 | 0 | |||||
Total Karir | 492 | 259 | 57 | 34 | 32 | 13 | 8 | 4 | 590 | 310 |
Tim Nasional Argéntina | ||
---|---|---|
Taun | Maen | Gul |
1977 | 3 | 0 |
1978 | 1 | 0 |
1979 | 8 | 3 |
1980 | 10 | 7 |
1981 | 2 | 1 |
1982 | 10 | 2 |
1983 | – | – |
1984 | – | – |
1985 | 10 | 6 |
1986 | 10 | 7 |
1987 | 6 | 4 |
1988 | 3 | 1 |
1989 | 7 | 0 |
1990 | 10 | 1 |
1991 | – | – |
1992 | – | – |
1993 | 4 | 0 |
1994 | 7 | 2 |
Total | 91 | 34 |
Mimiti 03 Désémber 2018.
Tim | Nagara | Mimiti | Réngsé |
Mandiyú de Corrientes | Argéntina | Januari1994 | Juni 1994 |
Racing Club | Argéntina | Méi 1995 | Nopémber 1995 |
Argéntina | Argéntina | Nopémber 2008 | Juli 2010 |
Al Wasl | UÉA | Méi 2011 | Juli 2012 |
Fujairah | UÉA | April 2017 | April 2018 |
Dorados | Méksiko | Séptémber 2018 | Masih kénéh |
Boca Juniors
Barcelona
Napoli
Argéntina Muda
Argéntina
This article uses material from the Wikipedia Basa Sunda article Diego Maradona, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Eusi nu nyangkaruk ditangtayungan ku CC BY-SA 4.0 iwal lamun disebutkeun béda. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Basa Sunda (DUHOCTRUNGQUOC.VN) is an independent company and has no affiliation with Wiki Foundation.