ژوئیه ۲۰۱۸

۱۰

• جاپون دله بنه لاییز هاکردن په 124 نفر بمردنه.
• امریکا و چین تجاری جنگ ره گمرکی مالیات بی‌یشتن جه شروع هاکردنه.

۱۱

• اتیوپی و اریتره هِدی جه صلح‌نومه بنویشتنه. وشون میون سال‌ها جنگ بی‌یه و این پیمون جه شه اختلافات ره کنار بی‌یشتنه.

۱۲

• عباس امیر انتظام، که سیاسی زندونی و سیاستمدار سابق بی‌یه، سوئد دله بمرده.

۱۳

• ساری مسجد جامع تش بیته و بسوته. ونه تش تا بعضی دیکون‌هایی که بازار نرگسیه دله دَینه ره هم چـِک بَیته.

۱۵

• فرانسه فوتوال جهونی جام ۲۰۱۸ دله قهرمون بیّه و فینال دله کرواسی ره 4-2 بَورده. نیمه اول کرواسی شه ره اتا گل بزوئه په، کا ره مساوی هاکرده ولی اَی اتا پنالتی هدانه که وی‌ای‌آر جه بئیت بیّه. اینتی نیمه اول ره فرانسویون گریژمان گل جه، بَوردنه و نیمه دوم ضد حمله جه دِ تا گل دیگه هم امباپه و پوگبا بزونه و مانژوکیچ هم اتا گل ره، گُلر ِاشتباه جه، پس هدا. (عکس دله)

۲۰

• «یهودی دولت-ملت» ِقانون رسماً اسراییل تصویب بیّه. پیش از این اسراییل شه ره اتا دموکراتیک و لیبرال کشور دونسته که دین و سیاست ره سیوا دونسته و نژادون ره برابر اعلام کارده ولی اسا این قانون یهودون ره کشور ِصاحاب دونده و وشون ره امتیازاتی دنه. این قانون گانه دیگر عربی اتا از دِتا رسمی زوون نی‌یه و فقط عبری ونه رسمی زوون بائه. این قانون ِپیش‌نویس ره پیش از تصویب ات‌که تغییر هدانه. اروپای اتحادیه‌یِ سفیر این قانون ره نژادپرستی‌آشی بنومسته.

۲۲

• پژاک مریوان دله ات دسته نظامی که ات‌جا جمع بَی بینه ره حمله هاکرده و یازده‌تا پاسدار ره بَکاشته. (رویترز)

۲۶

• یونان دله اتا ویشه تش بَیته و ۷۶ کشته و ۱۸۷ زخمی بجا بی‌یشته. سه روز عزا این کشور دله اعلام بیّه.
• سوریه دله‌یی جنگ دله، داعش اتا انتحاری حمله جه سویدا دله صدها نفر ره بکاشته و مجروح هاکرده. همین گادر سوریه‌ی ارتش جنوبی مناطق ره تموم بَییته.

۲۸

• روژاوا گانه که بشار اسد جه مذاکره هاکردنه و قرار هسته سوریه دله اتی تنک قدرت حکومت ره بداره. (یورونیوز)

۲۹

• عمران خان اکثریت آرا ره پاکستون پارلمون دله بدست بیارده.

۳۱

• دلار ِقیمت ایران ِبازارون دله دَه هزار تمن ره یور بورده و طلایِ سکه سه میلیون بیّه.
• تاجیکستون گانه ایران دله جه چنتا تروریست، که اسلامی نهضت عضو بینه، بوردنه و این کشور ِ توریست‌ها ره حمله هاکردنه. ولی داعش مسئولیت ره بعهده بَیته و عاملین ِبیعت هاکردنِ ویدیو ره تنک هاکرده. (دویچه وله و بی بی سی)