عربستون و ایسراییل هِدی جه اتا نشست داشتنه که ایران ِمقابله وسّه برنومه دَچینه. این ملاقات دله تصمیم بَییتنه اتی هاکِنِن که عرون و ایسراییل روابط بِتـِّر بَواشه و کوردستون ِاستقلال ره قبول هاکنِن و ایران ِرژیم عَوِض بَیّن سَر تِلاش هاکِنِن. (یورونیوز)
حسن عمر البشیر، سودان ِرییسجمهور، بورد بییه جنوبی آفریقا دله تا آفریقای اتحادیهی ِاجلاس دله شرکت هاکنه که لاههی ِبینالمللی دیوان ونه بازداشت ِدرخاست ره جنوبی آفریقای ِدولِت وِسّه بَرِسِنییه و وشون جه بخاسته که عمرالبشیر ره تحویل هادِن. این کشور ِمقامات اسا نَدونّه که ونه این حُکم جه چتی هاکِنِن. اتا دادگاه این کشور دله بائوته که عمرالبشیر ره ممنوع الخروج هاکرده. وه متهم هسته که بشریت ره جنایت هاکرده و آفریقاییتِبارون ره شه کشور دله نسلکاشی کانده. وه بیست و یک سال هسته که سودان ِرییسجمهوره. آفریقای اتحادیهی ِرییس زیمبابوهی ِدیکتاتور ِرییسجمهور هسته که لاههی ِبینالمللی ِدادگاه ِحکم ره قبول ندانّه و کشورون جه خانه وه ره اعتنا نَکانِن. برعکس جنوبی آفریقا همیشه حقوقبشر ِحامیون جه بییه و هسته. (یورونیوز)
باکو دله اروپایی مسابقات ِاولین دوره برگزار بیّه. آذربایجون این مسابقات ِافتتاحیه وسّه خله تِلاش هاکرده و حتی لیدی گاگا این مراسم دله شعر بخوندسته. (یورونیوز)
لیبی دله شایعه هسته که آمریکایِبالونها بتونستنه که القاعدهی ِمغرب ِچلّهی ِرییس ره بَکاشِن. مغرب ِالقاعده گروه دله مختار بالمختار رییس بییه، وه که فقط اتا چش داشته ره الاعور ونگ کاردنه. ونه بمردن ِشایعه چن سال پیش هم اعلام بَیبییه. (یورونیوز)
حسن عمر البشیر، سودان ِرییسجمهور، (عکس دله) که جنوبی آفریقا دله گیر دَکِت بییه و ممنوعالخروج بییه، بتونِسته این کشور جه بریم بِئه و وَردَگِرده شه کشور. (مهر)
پید بتونسته تل ابیض ِشهر ره بَییره و داعش ِاصلیترین راه ره قطع هاکنه. داعش ِنیشتنگا (=پایتخت) نوم رقه هسته که تل ابیض ِراه جه ترکیه ره وصل بییه. داعشیون این مسیر جه اسلحه و نفت ره قاچاق کاردنه. اسا این مسیر دَوِسته بیّه که هِچّی، سوریه کوردستون ِدِتا کانتون (=منطقه) هِدی جه وصل بَیینه. کوبانی که چن وقت پیشته همه وَری داعش و ترکیهی ِمحاصره دله دَیّه، اسا قامشلو جه راه پیدا هاکرده. این جنگ دله سوریه آزاد ارتش و آمریکای ِهوایی ائتلاف هم کوردها ره کومِک کاردنه. امّا ترکیه خله این اتفاق جه ناخِش هسته و حتی کوردها ره متهم هاکرده که عربون و ترکمونها ره شه منطقه جه پاکسازی کانّه. این در حالی هسته که این نبرد ِدله عربون هم کوردهای ِهمراهی ره کاردنه و وشون پَلی جنگِستِنه. پید گانه که داعش ِاعضا وقتی جنگ ره بِباختِنه بوردنه ترکیهی ِسامون دله و اون کشور وشون ره پناه هِدائه. (یورونیوز و العالم و کوردپرس)
سلیمان دمیرل، ترکیهی ِیَتّا معروف ِسیاستمدار که اتخله مدت نخستوزیر و رییسجمهور بییه، ۹۱ سالگی گادِر آنکارا دله بمرده. وه ره «ترکیهی ِسیاسی پییر» نوم جه اشناسِنّه.(یورونیوز)
تکریت ِمردمون کمکم دَرنه وَرگِردِنّه شه سِره و سامون دله. این شهر چن وقت پیش داعش ِدَس دَکِتبییه. (یورونیوز)
ناتو و روسیه میون دَر اختلافات شدید وانه. ناتو شرقی ِاروپا دله اتخله پایگا و تسلیحات بییشته و روسیه هم بائوته که دَره شه دفاعی سیستمون ره قوی کانده. (یورونیوز)
ایران دله صد و هفتاد و پنجتا شهید ره که ایران و عراق جنگ دله اسیر و قتلعام بَیبینه ره پیدا و تهران دله تشییع هاکردنه. (انگلیسی یورونیوز)
اتا آمریکایی اسپهپوست مَردی، که نژادپرستونه عقاید داشته، جنوبی کارولینای ِایالِت دله اتا کلیسا ره حمله هاکرده و نُهتا سیوپوست آدِم ره بَکاشته. (یورونیوز)
سوئد ِبعضی مسلمونها تصمیم بَییتنه مکهی ِساعِت جه روزه بَییرِن چون این کشور ِشمالی شهرون دله اصلاً شو نَوانه. شمالی یخبَزه قطب دله شیشما روز و شیشما شو هسته. (یورونیوز)
داعش دِباره دَره کوبانی ره مِزراب یِنّه. پید چن روز پیش تا رقه، داعش ِنیشتنگا، ِپنجاه کیلومتری ره بَییته و دَره آمریکا کومِک جه داعش ره سرکوب کانده. (یورونیوز)
داعش شه وسّه اتا جدید ِدینار بساته که خانه شه اعلام ِموجودیت ِسالگرد سَره احتمالاً ونجه رونمایی هاکنه. این سکهئون ره ۱۳۹ دلار جه برابر اعلام هاکردنه. (العالم)
فلسطین شه اسناد و مدارک ره هِدائه بیناللمللی دیوان ِدَس و ایسراییل جه دِتا شکایت هاکرده. وشون ایسراییل ره متهم کانّه که غزه دله جنگی جنایِت هاکرده و بیتالمقدس ِشرقی مناطق ره زورپِشتی بَییتنه. (یورونیوز)
یونان ِنخستوزیر که چن وقته دَره اروپای اتحادیه جه مذاکره کانده، اعلام هاکرده که این کشورون ِطرح ره یونان دله رفراندوم یِنّه تا مردِم بِتونِن دموکراسی پِشتی این مسئله جِواب ره هادِن. الکسیس سیپراس اینتی دِتا مسئله که زمونی محدودیت و بینالمللی انتقادات بینه ره حل کانده. (یورونیوز)
آمریکای متحده ایالات دله همجنسکرون ِازدواج آزاد بیّه. قبلاً چاردهتا ایالِت بینه که اینتی ازدواج ره قبول نِداشتنه. (یورونیوز)
خلق مدافعون یگان (= پید) اعلام هاکرده که داعشیون ره ات بار دیگه وسّه کوبانی جه بریم هاکردنه. داعش که چن بار هسته پشتهم کوردها جه دَر شکست خانّه، دِباره کوبانی ره حمله هاکرده و ۱۵۰ نفر ره هم قتلعام هاکرده ولی باز هم پکک ِطرفدارون جه شکست بخارده. (یورونیوز)
کویت شنبه ره عمومی عزا اعلام هاکرده و ات سری متهم ره بازداشت هاکرده که شاید انتحاری حملهی ِعامِل ره کومِک هاکرد بائِن. سهتا ایرانی هم بمردهئون میون دَیینه. کویت ِدولِت گانه این کارها جه ات سری خانّه تشیع و تسنن میون اختلاف دِمبَدِن. (یورونیوز)
ایسراییلیون ماریان ِکشتی، که خاسته غزه ره غذا و دِوا و… بَرِسِنه، دَم ره بَییتنه. این کشتی سوئد جه دَرشییه فلسطین و سهتا کشتی دیگه هم این ناوگان دله دَیینه که این اتفاق په، غزه جه دور بَیینه. ایسراییلیون این بار خشونت جه استفاده نَکاردنه. (یورونیوز)
This article uses material from the Wikipedia مَزِروني article ژوئن ۲۰۱۵, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). محتوا جه تحت CC BY-SA 4.0 دسترسی دارنی، مگر اینکه ونه خلاف ثابت بَواشه. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki مَزِروني (DUHOCTRUNGQUOC.VN) is an independent company and has no affiliation with Wiki Foundation.