加拿大

加拿大（英文：Canada）是北美洲北部國家，面積邪氣大，是世界上第二大个國家，人口只有三千五百萬（2013.9），比吳語使用者還要少交關。老早茲有蠻多个原住民部落，譬如克裏人（Cree),因紐忒人（inuit)。公元1000年左右，北歐海盜（有些人謳渠拉“維京人”）到過紐芬蘭島，但是渠拉搭原住民發生衝突，沒留下來。十六世紀初，交關歐洲國家亦開始派人到加拿大考察，譬如法國个介底埃（Jacques Cartier），17世紀，英國搭法國開始爭奪殖民地，打仗打茲好兩場，最後勒七年戰爭（1756~1763）之後，法國人拿渠全部个北美殖民地（新法蘭西）儕割讓畀英國搭西班牙。直到公元1867年加拿大東面个四個省（Ontario,Québec,New Brunswick,Nova Scotia）聯合成立自治領，加拿大一直是英國殖民地。該之後一百年裏向，加拿大參加了兩場世界大戰，獨立性增強。從上個世紀六十年代開始，講法語个蓋辦克（Québec）希望從加拿大獨立出去，勒1980年搭1995年舉行茲兩埭全民公投，尤其是後頭一埭，支持率達到49.4%，但是仍舊沒獨立成功。乃晌个加拿大，市場經濟交關發達，與美國个經貿關係邪氣密切，政治浪來講，渠是議會制聯邦，分上下兩院，以英國君主作爲國家元首，以總理爲政府首腦。加拿大是雙語國家，加拿大小囡勒學堂裏要學另外一種官方語言，而法語勒蓋辦克之外也有一定个地位。漢語族語言个使用者勒拉加拿大超過100萬，該浪向粵語个影響力頂大。加拿大个人類發展指數（HDI）達0.911，搭上海差弗多。