Քերոլ Չեննինգ

Քերոլ Էլեյն Չեննինգը ծնվել է Սիեթլում 1921 թվականի հունվարի 31-ին։ Նրա հայրը՝ Ջորջ Չենինգը, լրագրող էր, և դստեր ծնվելուց անմիջապես հետո նրան առաջարկել են նոր աշխատանք Սան Ֆրանցիսկոյի հրատարակչությունում, ուր և տեղափոխվել է նրա ընտանիքը։ Չենինգը պատրաստվում էր հաճախել Վերմոնտ նահանգի Բենինգթոնի քոլեջ, երբ մորից իմացել է, որ որդեգրված դուստր է։ Նրա իրական ծնողները եղել են սևամորթ մի կին և գերմանացի ներգաղթյալ, ովքեր ապրում էին Ջեորջիա նահանգում։ Նրան որդեգրած մայրն ամեն ինչ պատմել էր, որպեսզի դուստրը հետագայում չզարմանա, եթե սևամորթ երեխա ծնի։ Քերոլ Չենինգը որոշել է թաքցնել դա՝ ապագա գործունեության առաջընթացի հետ կապված խնդիրներից խուսափելու համար։

Քոլեջն ավարտելուց հետո Չենինգը տեղափոխվել է Նյու Յորք, որտեղ 1941 թվականին սկսվել է նրա թատերական գործունեությունը։ Շուտով նա կատարել է իր դեբյուտը Բրոդվեյում, որտեղ իր առաջին բեմադրության մեջ նա եղել է Իվ Արդենի ուսուցիչը։ Հաջողությունը վրա է հասել 1949 թվականին՝ Լորելեյ Լիի դերից հետո Բրոդվեյի «Ջենտլմենները նախընտրում են շիկահերներին» ֆիլմում, որտեղ նա կատարել է նաև «Ադամանդները աղջիկների լավագույն ընկերներն են» հայտնի երգը։

1964 թվականին դերասանուհին խաղացել է Դոլլի Լևիի դերը Բրոդվեյի «Բարև, Դոլլի» օրիգինալ մյուզիքլում։ Նույն տարում նա այս դերի համար արժանացել է Թոնի մրցանակի՝ մյուզիքլի լավագույն դերասանուհի անվանակարգում։ 1966 թվականին Չենինգը արժանացել է թատրոնի «Սառա Սիդդոնս»–ի անվան մրցանակին՝ Չիկագոյի թատրոններում կատարած աշխատանքի համար։

Քերոլ Չենինգը բավականին քիչ է խաղացել ֆիլմերում, իսկ կինոկարիերայի ընթացքում նա նկարահանվել է ընդամենը հինգ ֆիլմում։ Նրա մասնակցությամբ ամենահայտնի ֆիլմը «Շատ ժամանակակից Միլի» մյուզիքլն է (1967), որի դերը նրան բերել է «Օսկարի» նոմինացիա՝ երկրորդ պլանի լավագույն դերասանուհի և «Ոսկե գլոբուս» մրցանակ նույն անվանակարգում։ Բացի իր կինոկարիերայից` դերասանուհին աշխատել է հեռուստատեսությունում, որտեղ նկարահանվել է «Սիրո նավակը», «Ո՞ւր է Ուոլին», «Ադամների ընտանիքը» և «Բուրկի արդարադատությունը» սերիալներում։

1995 թվականին Քերոլ Չեննինգին շնորհվել է հատուկ «Թոնի» մրցանակ՝ կյանքի նվաճումների համար։

Սան Ֆրանցիսկոն 2002 թվականի փետրվարի 25-ը հայտարարել է Քերոլ Չենինգի օր՝ սեռային փոքրամասնությունների իրավունքների պաշտպանության համար շարժմանը ակտիվ մասնակցելու համար։

Քերոլ Չենինգն ամուսնացել է չորս անգամ։ Իր վերջին ամուսնու՝ Հարրի Կուլիգյանի հետ ամուսնացել է 2003 թվականին։ Մահացել է երեքշաբթի՝ 2019 թվականի հունվարի 15-ին, ժամը 12:31-ին, իր տանը` Կալիֆորնիայի Ռանչո միրաժում։

• «Թոնի» 1964` «Ողջույն Դոլլի» մյուզիքլի լավագույն դերասանուհի անվանակարգ
• «Ոսկե գլոբուս» 1967` «Երկրորդ պլանի լավագույն դերասանուհի» («Շատ Ժամանակակից Միլլի»)