Oblast
In oblast (Russysk en Oekraynsk: область, Wytrussysk: вобласць of вобласьць (Łacinka: vobłaść - voblast); Tsjechysk en Slowaaksk: oblast; Bulgaarsk: област; Kazachsk: облысы as oblısı) is in bestjoerlike ienheid yn ferskate lannen lykas de Russyske Federaasje, Oekraïne, Wyt-Ruslân, Kazachstan, Kirgyzje, Bulgarije, Slowakije en foar in skoft yn it eardere Jûgoslaavje.
De oblast is te ferlykjen mei in provinsje yn oare lannen sa as yn Nederlân. It wurd oblast betsjut letterlik "gebiet" en komt benammen foar yn lannen mei in Slavyske taal en lannen dy't earder part fan de Sovjet-Uny wiene.
Oblasten lizze ornaris ien laach ûnder it nasjonale bestjoerslaach en binne fierder ûnderferparte yn distrikten, el wol rajons neamd. Meastentiids binne de oblasten neamd nei it bestjoerlik sintrum dêrfan.
Yn guon eardere Sovjetrepubliken waard nei 1991 it wurd oblast omneamd nei in namme dy't ôflaat is fan it Arabyske wilaya. Dat jild foar Uzbekistan en Tadzjikistan (viloyat) en Turkmenistan (welayat).
Sûnt 2000 fynt der yn Ruslân in grutte weryndieling fan it bestjoerlik systeem plak. Ien fan de feroarings wie it opsetten fan federale distrikten, in oerkoepeljende bestjoerslaach dêr't de oblasten, krajs, republiken, autonome gebieten en federale stêden yn groepen ynferparte wurde. Ek in stel fan de gebietsdielen waarden gearfoege ta gruttere ienheden.
Lannen
Bulgarije
De Bulgaarske ienheidsteat is sûnt 1999 yn 28 oblasten ferparte, dy't foar 1987 as okrûgs oantsjut waarden. Fan 1987 oant 1999 eltse trije oant fjouwer okrûgs yn ien oblast gearfoege.
Kazachstan
Kazachstan is ûnderferparte yn 14 oblısı en twa stêden mei in bysûndere status.
Kirgyzje
Kirgyzje is yn sân oblasten en twa selsstannige stêden Bisjkek en Osj ferparte.
Ruslân
De Wikipedy hat ek in side Oblasten fan Ruslân.
Yn Ruslân binne der 46 oblasten, dy't mei harren autonomy te ferlykjen binne mei Amerikaanske steaten en Dútske dielsteaten.
Slowakije
Der binne 4 oblasten dy't allinnich brûkt wurde as regio's oangeande de NUTS-yndieling.
Oekraïne
Ukraïne hat 24 oblasten en de Krim en 2 stêden hawwe in bysûndere status.
Wyt-Ruslân
Der binne 6 voblasten en it haadstêdlik distrikt fan Minsk.
Joegoslaavje
Fan 1922 oant 1929 wie it Keninkryk Jûgoslaavje ûnderferparte yn 33 oblasten.
Sovjet-Uny
Yn de Sovjet-Uny wiene de oblasten de bestjoerslaach ûnder dy fan de Sovjetrepubliken.
| Boarnen, noaten en/as referinsjes: |
This article uses material from the Wikipedia Frysk article Oblast, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.