«Сузо́р’е» — менскі гурт, граў у стылістыцы гард-рок.
Першы на Беларусі рок-гурт, які атрымаў статус прафэсійнага. Калектыў запісаў першы ў гісторыі беларускай рок-музыкі магнітаальбом(uk) і даў больш за 1500 канцэртаў у розных гарадох СССР.
Сузор’е | |
Інфармацыя | |
---|---|
Гады | 1977—1991 |
Адкуль | Беларуская ССР |
Мова | беларуская расейская |
Жанр(ы) | рок |
Удзельнікі | Андрэй Казлоўскі Андрэй Філатаў Валянцін Пучынскі Ігар Майскі Уладзімер Пучынскі |
Былыя ўдзельнікі | Аляксей Казлоўскі Аляксандар Растопчын Вольга Аліпава Вольга Хіжанкова Павал Харэвіч Аляксандар Брынцаў Нэлі Дзянісава Аляксандар Несьцяровіч |
Гурт зьявіўся у верасьні 1977 году як штатны гурт аднайменнага камсамольска-моладзевага кафэ ў Менску ў складзе: Андрэй Казлоўскі (сьпеў, гітара), Валянцін Пучынскі (сьпеў, бас-гітара), Андрэй Філатаў (бубны), Ігар Майскі (клявішныя), Уладзімер Пучынскі (гукарэжысэр). Напачатку сваёй дзейнасьці гурт выконваў вядомыя рокавыя і блюзавыя творы замежных аўтараў, абраўшы ў якасьці асноўнага кірунку прагрэсіў- і гард-рок.
Ад 1981 году гурт стаўся штатным калектывам Беларускае дзяржаўнае філярмоніі, дзе і працаваў да 1991 году, выконваючы ў асноўным расейска- і беларускамоўныя творы Пучынскага, Лучанка і Будніка. У выніку ажыцьцяўленьня пастановы ЦК КПСС у 1983 годзе калектыў быў пазбаўлены назвы і расфармаваны, але дастаткова хутка аднавіўся як інструмэнтальны ансамбль пад кіраўніцтвам А. Несьцяровіча. У сярэдзіне 80-х гурт выступаў як акампаніруючы ансамбль Сьвятланы Кульпы і Надзеі Мікуліч, узбагаціўшы сваё гучаньне народнымі інструмэнтамі. Пад назовам «Сузор’е» гурт аднавіўся у 1986 годзе.
Музыкі першымі на беларускае папулярнае сцэне рэалізавалі інструмэнтальныя фрагмэнты з «Полацкага сшытку», напісалі музыку на фрагмэнты паэмы «Песьня пра зубра» Міколы Гусоўскага (у 2008 годзе аднайменная рок-опэра была скончаная і выйшла на дысках).
У розныя гады у склад гурту ўваходзілі Аляксей Казлоўскі (бас-гітара, сьпеў, пазьней — Zindan), Аляксандар Растопчын (гітара 1982—1984, пазьней «Тоніка», «Песьняры»), Вольга Аліпава (сьпеў), Вольга Хіжанкова (сьпеў), Павал Харэвіч (сьпеў), Аляксандар Брынцаў (сьпеў), Нэлі Дзянісава (сьпеў, пазьней — Zindan), Аляксандар Несьцяровіч (клявішныя, ад 1983). Гурт запісаў музыку для спэктаклю «Транслегатар» (Беларускае радыё, 1980), музычнага спэктаклю «Клеменс» (Нацыянальны акадэмічны драматычны тэатар імя Якуба Коласа).
Гурт прыпыніў існаваньне ў 1991 годзе. Напрыканцы 2001 з ініцыятывы прадусара Ўладзімера Пучынскага гурт быў часова адноўлены, і адбылося колькі клюбных канцэртаў у Менску.
Найбольш вядомыя песьні — «Старый мост», «Фортуна», «Весенний день», «Капитан», «Сентябрьская река», «Песня пра зубра», «На шляху дзікіх гусей».
Фэстывалі: Міжнародны фэстываль палітычнае песьні «Рыга 1978» (Рыга, Латвія), Усесаюзны конкурс эстраднае песьні «Ялта 1981» (Ялта, Украіна), Другі ўсесаюзны фэстываль польскае песьні ў Віцебску (1990).
Узнагароды: I прэмія Міжнароднага фэстывалю палітычнае песьні «Рыга 1978» (Рыга, Латвія), «За ўнёсак у разьвіцьцё беларускае рок-музыкі» на «Рок-каранацыі»-2001.
Альбом «Песня пра зубра» трапіў у топ-10 па вэрсіі «Experty.by» па выніках 2008 году.
This article uses material from the Wikipedia Беларуская (тарашкевіца) article Сузор’е (гурт), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.