„Зямля́ пад бе́лымі кры́ламі“ (па-ўкраінску: Земля під білими крилами) — нарыс беларускага пісьменьніка Ўладзімера Караткевіча пра Беларусь.
Першапачаткова быў выдадзены ў Кіеве ў 1972 годзе на ўкраінскай мове, а пасьля — і на беларускай.
Зямля пад белымі крыламі | |
Аўтар: | Уладзімер Караткевіч |
---|---|
Мова арыгіналу: | беларуская |
У нарысе Караткевіч па-мастацку падрабязна расказаў пра Беларусь, ейную культуру, мову, літаратуру, фальклёр і прыроду. У гэтым нарысе ён ахапіў беларускую гісторыю ад старажытнасьці да 1970-х гадоў, закрануў найбольш важныя падзеі, такія як гісторыя Вялікага Княства Літоўскага, Грунвальдзкая бітва 1410 году, Люблінская ўнія 1569 году, а таксама іншыя важныя моманты з гісторыі Беларусі.
Лёс Уладзімера Караткевіча быў сьцісла зьвязаны з Украінай. Ён правёў у Кіеве некалькі месяцаў у 1944 годзе пасьля ягонага вызваленьня, потым навучаўся ў Кіеўскім дзяржаўным унівэрсытэце імя Т. Р. Шаўчэнкі й працаваў настаўнікам у школе вёскі Лесавічы Тарашчанскага раёну Кіеўскае вобласьці.
Невыпадкова першы варыянт кнігі быў пабудаваны на паралелях двух брацкіх народаў. Нарыс сьпярша пісаўся для ўкраінскіх вучняў старэйшых клясаў і быў выдадзены на ўкраінскай мове ў Кіеве ў 1972 годзе пад назвай «Зямля пад белымі крыламі: Мая Беларусь» (па-ўкраінску: „Земля під білими крилами: Моя Білорусь“) — на ўкраінскую мову з рукапісу пераклалі В. Іскра, Г. Ткачэнка, К. Скрыпчанка, Н. Цішчанка.
На беларускай мове кніга была ўпершыню выдадзена ў 1977 годзе ў выдавецтве «Мастацкая літаратура». Беларускае выданьне кнігі — гэта ейна новая рэдакцыя. Яно адрозьніваецца больш ґрунтоўным дасьледаваньнем гісторыі беларускае зямлі, ейнае культуры, мовы й літаратуры, а таксама значным скарачэньнем экскурсаў у гісторыю Ўкраіны.
Рукапіс першага варыянта нарысу захоўваецца ў Цэнтральнай навуковай бібліятэцы імя Якуба Коласа Нацыянальнае акадэміі навук Беларусі з указаньнем даты заканчэньня працы: 12 ліпеня 1971 году.
This article uses material from the Wikipedia Беларуская (тарашкевіца) article Зямля пад белымі крыламі, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.