Альбэрт: мужчынскае асабістае імя (Albert)

Асноўны артыкул: Імёны ліцьвінаў

Альбэрт (Albert) — імя германскага паходжаньня, якое звычайна разглядаюць як вытворнае ад старажытнага германскага імя Адальбэрт (Adalbert), і выводзяць ад старагерманскага adal 'шляхетны' і berht 'бліскучы'. Таксама бытавала старажытнае гоцкае імя Алаберт (Alabert). Іменная аснова ал- (імёны ліцьвінаў Алігут, Альмін, Аламунт; германскія імёны Algut, Almin, Alamunt) паходзіць ад гоцкага alls 'увесь, кожны', а аснова -берт- (-бэрт-, -барт-) (імёны ліцьвінаў Зыбарт, Кібарт, Любарт; германскія імёны Siebart, Kibart, Lubert) — ад германскага berhta 'яркі'.

Этымалягічны слоўнік старапольскіх асабовых імёнаў, выдадзены Польскай акадэміяй навук, адзначае гістарычнае бытаваньне ў Польшчы германскага імя Albert (Albart, Jalbert, Olbert).

Варыянты імя ў гістарычным крыніцах: nobilibus dominis… Alberto de Radoszkowycze… Alberto Moszeykowycz de Ywyenyecz (15 чэрвеня 1477 году); nobilibusque dominis… Alberto Naruszowicz (10 ліпеня 1490 году); nobilibus viris… Alberto Jagelowycz (8 траўня 1496 году); nobiles Albertus Iwaskowicz… Albertus Talminowicz… Nos vero Albertus episcopus Wilnensis… Albertum Iwaskowicz… Albertum Talminowicz… Alberti Iwaszkowicz… Alberti Talminowicz (20 траўня 1503 году); nobilibus… Alberto Stanisławowicz (12 траўня 1506 году); homines… Albertum (3 чэрвеня 1510 году); unum obnoxium cum pueris nomine Albertum (11 траўня 1520 году); бояринъ нашъ добрыневъскии на имя Лукашъ Ольбертовичъ (28 кастрычніка 1527 году); служебникъ его милости Албертусъ (23 кастрычніка 1529 году); войть Альберть Ябутовичъ (1554 год); Ioannis Albertowicz Trilupis filiae (23 чэрвеня 1586 году).

• Альбэрт (Альбрахт) Карэйва († па 1413) — дзяржаўны дзяяч Вялікага Княства Літоўскага, староста медніцкі і вялёнскі
• Альбэрт Гаштольд (Альбрахт Гаштольдавіч; † 1539) — дзяржаўны дзяяч Вялікага Княства Літоўскага, канцлер вялікі літоўскі
• Альбэрт (Войцех) Каяловіч (Віюк-Каяловіч) (1609—1677) — пісьменьнік і гісторык Вялікага Княства Літоўскага
• Альбэрт Паўловіч (1875—1951) — беларускі паэт і драматург
• Альбэрт Айнштайн (1879—1955) — нямецкі і амэрыканскі фізык-тэарэтык, стваральнік тэорыі адноснасьці, ляўрэат Нобэлеўскай прэміі
• Альбэрт Іпэль (1885—1960) — нямецкі пэдагог і клясычны археоляг, першы дасьледнік беларускага народнага мастацтва

Альбяртовічы — літоўскі шляхецкі род з Троцкага павету.

На 1900—1903 існавалі вёска (двор) і фальварак Альбэрцішкі (Альбэртышкі) у Шавельскім павеце Ковенскай губэрні.

• Ала
• Бэрт