Аляксандар Зімоўскі

Нарадзіўся 10 студзеня 1961 году ў Нямецкай Дэмакратычнай Рэспубліцы. Служыў у савецкім войску (1979—1984). Скончыў тры курсы факультэта ваеннай журналістыкі Львоўскай вышэйшай ваенна-палітычнай вучэльні (1980—1983), факультэт банкаўскай справы Палескага дзяржаўнага ўнівэрсытэту (2007).

Быў працоўным Барысаўскай райаграпрамтэхнікі, карэспандэнтам шэрагу газэтаў і часопісаў («Дзелавы весьнік», «Чалавек і эканоміка», «Нацыянальная эканамічная газэта»), карэспандэнтам і палітычным аглядальнікам службы інфармацыі тэлебачаньня інфармацыйнага агенцтва Белтэлерадыёкампаніі, працаваў у Югаславіі падчас вайсковага канфлікту на Балканах (1998—1999).

З 2000 па 2002 гады — намесьнік старшыні Нацыянальнай дзяржаўнай тэлерадыёкампаніі Рэспублікі Беларусь. З 1995 г. па 2001 г. вёў інфармацыйна-аналітычную праграму «Рэзананс» на Беларускім тэлебачаньні. У 2002 годзе стаў генэральным дырэктарам ЗАТ «Сталічнае тэлебачаньне».

22 сьнежня 2005 году прызначанаы Кіраўніком Нацыянальнай дзяржаўнай тэлерадыёкампаніі Беларусі. 28 сьнежня 2010 году звольнены з пасады на карысьць Генадзя Давыдзькі.

Па квоце прэзыдэнта ў 2004 годзе стаў дэпутатам Савету Рэспублікі. Чалец Сталай камісіі па эканоміцы, бюджэце і фінансах.

Ад 2011 году жыве ў Санкт-Пецярбургу, дзе працуе мэдыя-кансультантам. У гэтым жа годзе заснаваў інтэрнэт-рэсурс inosmi.by. Калумніст парталу навінаў naviny.by.

У беларускіх апазыцыйных СМІ Зімоўскі характарызуецца як адзін зь людзей, адказных за пабудову сыстэмы прапаганды аўтарытарнага рэжыма Лукашэнкі.

У красавіку 2006 году за ўдзел у фальсыфікацыях прэзыдэнцкіх выбараў у Беларусі Аляксандру Зімоўскаму быў забаронены ўезд у ЗША і краіны Эўрапейскага Зьвязу. Амэрыканскі Сьпіс спэцыяльна вызначаных грамадзянаў і заблякаваных асобаў 2006 г. уключаў дзесяць асобаў, «адказных за падрыў дэмакратычных працэсаў і інстытутаў, парушэньне правоў чалавека, дзяржаўную карупцыю».

У 2011 годзе ў сувязі з хваляй рэпрэсіяў супраць актывістаў апазыцыі пасьля прэзыдэнцкіх выбараў у Беларусі ў 2010 годзе Аляксандар Зімоўскі і іншыя ўплывовыя супрацоўнікі дзяржаўных СМІ Беларусі былі ўключаныя ў санкцыйныя сьпісы Эўрапейскага зьвязу. Ім быў забаронены ўезд на тэрыторыю краінаў Эўрапейскага Зьвязу, а іхныя актывы на тэрыторыі ЭЗ падлягалі замарожваньню. Забарона была зьнятая ў 2016 годзе.

Паводле Рады Эўрапейскага Зьвязу, Аляксандар Зімоўскі

	Мэдыйны кансультант і былы старшыня дзяржаўнай тэлерадыёкампаніі. Ён быў галоўнай дзеючай асобай у тым, што тычыцца дзяржаўнай прапаганды, да сьнежня 2010. Ён займаўся сыстэматычнай дыскрэдытацыяй апазыцыі, апраўдваў грубыя парушэньні правоў чалавека і пастаянныя рэпрэсіі супраць апазыцыі(be) і грамадзянскай супольнасьці ў Беларусі.

• Дыплём Беларускай асацыяцыі журналістаў «Ганаровы крумкач» (1996)
• Ордэн «За службу Радзіме» ІІІ ступені (1999)
• Ордэн Францыска Скарыны (2007)

• Зимовский А.Л., Козловский В.В. Справочник банковского служащего, Мн.: Веды, 1998

• Профіль на сайце Савета Рэспублікі НС РБ (рас.)