薩拉熱窩嘅羅密歐同朱麗葉

爾對拖友同其他好多波斯尼亞男女一樣，各有信仰背景，後生仔Бошко Бркић（1968.05.13–1993.05.19）係塞爾維亞裔波斯尼亞人，後生女Адмира Исмић（1968.08.11–1993.05.19）係波斯尼亞克裔穆斯林。對拖友自從喺薩拉熱窩一個除夕派對相識，已經拍拖9年，原本住喺薩拉熱窩。喺薩拉熱窩被圍困一年之後，因爲生活實在變得太艱難，對拖友決定去後生仔喺塞爾維亞嘅老家避難。

對拖友本來已經疏通好，講掂數兩人會喺1993年5月19號下晝5點鐘出城，到時交戰雙方就會停火。點知就喺對拖友行到米利亞茨卡河（塞爾維亞文：Миљацка）上嘅Vrbanja橋之際，突然有人開槍，後生仔首先中槍死咗，後生女轉頭又中槍受傷。後生女爬向後生仔條屍，攬住佢一直到一個骨之後連姖都死埋，兩人死時得25歲。美國記者Mark H. Milstein當時喺附近避緊難，親眼望到嗰對拖友中槍雙雙倒地上嗰剎那，佢影低嘅相成爲咗當時嘅國際要聞。好多大眾傳媒登咗嗰對拖友嘅屍嘅相，路透社戰地記者（英文：War correspondent）Kurt Schork（英文：Kurt Schork）（1947.01.25–2000.05.24）將隻故仔報道咗出來。嗰對拖友象徵住世上咸不剌受緊各樣衝突逼迫嘅人所受嘅苦。

 

對拖友冧低嘅地方喺正交戰雙方僵持嘅戰場，所以曝屍咗8日塞爾維亞軍隊先至逼波斯尼亞戰俘趁住天黑走去執屍。波斯尼亞同塞爾維亞軍隊都指責係對方開槍。1996年4月16號，嗰對拖友嘅遺體被送返薩拉熱窩，然後同其他薩拉熱窩圍城戰嘅無辜犧牲者一齊安葬喺獅子墳場。

香港女歌手鄭秀文主唱嘅《薩拉熱窩的羅密歐與茱麗葉》（中島美雪作曲、林振強作詞）都係用爾件事做主題。