田北俊

田北俊係拔萃男書院中學畢業。自1988年起做立法局議員到回歸前（1992年除外），之後順利過渡，成為臨時立法會議員，並且喺1998年參加立法會選舉，成功當選。2007年4月1號起接任香港旅遊發展局主席，為期三年。

2003年7月6號，立法會就《國家安全條例草案》進行二讀辯論前，一向支持法案條文內容嘅自由黨主席田北俊突然宣佈唔支持喺7月9號進行二讀，並即時辭咗行政會議席位；特區政府於是連夜召開緊急行政會議。由於冇咗自由黨係立法會嘅支持，條例草案將無法通過，前行政長官董建華喺7月7號凌晨宣佈撤回草案，並且無限期延遲立法。

田北俊亦都係萬泰集團主席。佢細佬田北辰喺兩鐵合併前係九廣鐵路主席，2022年8月頭，佢同周梁淑怡、劉健儀一齊退出自由黨。

• 太平紳士（1988年）
• 金紫荊星章（2001年）

田北俊、田黃玉華兩公婆同埋一對仔女田啟文、田啟安（包括女婿鄭宇）係香港賽馬會會員、馬主，自1994-1995馬季開始擁有超過廿匹以「武士」、「勇士」命名嘅馬匹，包括雅典武士、陽剛武士、人民武士、威水武士、自由武士、新東武士、醒目武士、快樂武士、幸運武士、忠心武士、聰明武士、精靈武士、神速武士、現代武士、風雲武士（SUPREME KNIGHT）、閃爍武士（田北俊）、優愈武士、影之武士、赤壁武士、閃悅武士、糖心勇士、鈁糖武士、風雲武士（STORM RIDER）（田啟文）、盈威勇士、忠心勇士、神光勇士、仙樂勇士、超能勇士、時光勇士、星河勇士、銀刺勇士（田啟安）。

當中嘅「忠心勇士」出道初期曾經被封為「香港未來短途馬王」，亦曾經打破沙田馬場1000米全港紀錄。

• 田元灝家族