李百全: 香港政務官

李百全 Patrick Li Pak Chuen
2021年3月1號，廣播處長李百全喺香港電台廣播大廈正門外面履新。
香港電台廣播處長
現任
就任日期 2021年3月1號
前任	梁家榮
個人資料
出世	1968年（55–56歲）  英屬香港

1990年8月，李百全加入香港政府政務職系。2019年4月晉升為首長級乙一級政務官。

2009年9月至2013年6月，佢做公務及司法人員薪俸及服務條件諮詢委員會聯合秘書處秘書長。2013年7月至2017年7月做民政事務總署副署長。2017年7月起做民政事務局副秘書長。

2021年3月1號開始擔任廣播處長，接提前解約嘅梁家榮手。佢一上任就郁香港電台嘅電視節目製作。

喺李百全上任香港電台台長之後，香港電台陷入咗好多關於編輯自主嘅爭議。民主派以及一啲溫和建制派嘅言論都試過畀人抽起或者過濾。

3月4號，李百全同港台各部門主管召開編輯會議，其中《鏗鏘集》、《視點31》同《香港故事》等重點節目被特別點名，要求之後播放嘅集數要經佢個人事先睇過，先可以對外廣播。其中《香港故事》嗰星期嘅受訪者、樂隊LMF歌曲夾雜住好多粗言穢語，佢認為「唔decent（唔體面）」，有「極端政治取態」，反問「點解唔揾另一種聲音」。佢明言，若果節目無法通過佢嘅公正測試，將無法廣播。結果，李百全臨時抽起原定喺3月7號播出嘅《香港故事》，理由係指嘉賓主持、作家蔣曉薇曾經喺節目提到個人對反修例事件嘅睇法。

3月11號，李百全又再抽起原定喺當晚8點播出嘅《議事論事》，臨時改為重播行政長官卓越教學獎得主嘅舊節目《卓越教室》。節目網頁存檔顯示，當晚嘅節目會談及全國人民代表大會修改香港選舉制度，由港台記者陳月慧任主持，立法會主席曾鈺成喺「政事溫度計」環節中採訪前立法會議員李華明、國際政治學者袁彌昌，另外民主黨前主席劉慧卿亦會接受專訪，而喺同月18號播出嘅節目預告亦未見顯示。據指，李百全喺節目播出前半個鐘決定抽起，並多次出通告，警告員工唔可以對外透露機密資訊，否則會視為違反《官方機密條例》或者《節目製作人員守則》。

3月17號，李百全抽起咗《卓越教室》、《環顧日常》、《聽出好戲勢》同《香港故事—幸福的繞道》四個節目，其中《卓越教室》由車牌查冊被控嘅港台編導蔡玉玲任編導，《環顧日常》有黃店「渣哥」老闆娘譚小環出鏡，《幸福的繞道》訪問民主派初選案被捕人李芝融，以及因蠔涌爆炸品案被判入獄3年10個月嘅彭艾烈，《聽出好戲勢》由親民主派藝人黃秋生旁白。

原定喺3月29號播放嘅《鏗鏘集》節目《青春的一場修煉》被抽起，呢個節目探討反修例事件之後，八間資助大學只有香港理工大學學生會內閣當選並運作為嘅「斷莊」現象，受訪者包括香港中文大學學生會當選內閣「朔夜」、香港理工大學學生會成員、中文大學校董劉國勳同立法會教育事務委員會成員容海恩。原定喺4月5號播放嘅《鏗鏘集》經過李百全睇過後亦不獲通過，或會被抽起。嗰集內容訪問前有線新聞中國組「過檔」眾新聞後嘅傳媒生存空間，內容無觸及各個傳媒政治光譜等議題。同樣由《鏗鏘集》團隊負責製作嘅《鏗鏘說》，主持蘇玉華被指「太黃」，遭到替換，改為民建聯兼中國聯合國協會理事林琳接任。計劃4月2號播出嘅《鏗鏘說》同4月5號播出嘅《鏗鏘集》轉交綜合節目組和文教及康體組（原教育電視組）負責，但係同時未暫定原負責團隊公共事務組嘅工作，換言之兩個節目喺港台內部會有兩個製作版本。另外，李百全計劃日後若果《鏗鏘集》同《鏗鏘說》唔符合要求，負責嘅製作人員將會被調查係咪涉及失職，甚至被追討製作費。

審查憂慮同反對《港區國安法》嘅意見

5月21號，香港電台播出時政節目《議事論事》，自由黨榮譽主席田北俊提及美國商會喺5月嘅調查，指商界憂慮《港區國安法》撤走嘅部分，被港台聲稱唔中立刪走。當時田北俊提及商界嘅憂慮，受訪嘅在港美國會員入面，超過4成計劃離開香港。田北俊又談及47名民主派初選案被告，保釋一度全部被拒。之後田北俊傳媒查詢嘅時候，表明唔樂見內容被刪走，港台工會批評高層編委會，多次無視同事意見同編輯決定，踐踏團隊專業製作，而之前接受訪問之後被審查，最後訪問被抽起嘅袁彌昌亦指，田北俊陳述事實都唔得，而田北俊已是「安全系數」好高嘅親中派人物都俾人禁言，反映批評「國安法」是港台紅線。