國產凌凌漆

IMDB頁（出面網頁）
出品地區：	香港
語言：	粵語
彩色/黑白：	彩色
片長：	90分鐘
級別：	香港：II
分類：	喜劇
編劇：	周星馳、張兆麟
主演：	周星馳、袁詠儀、羅家英
導演：	李力持、周星馳
出品公司：	永盛娛樂
發行時間：	1994年

《國產凌凌漆》（英文：From Beijing With Love）係周星馳喺1994年嘅粵語電影作品，主要演員重有袁詠儀同埋羅家英等。

呢套電影嘅背景發生喺現代；而有睇開電影嘅觀眾都唔難睇得出，佢其實係刻意咁模仿外國嘅特務片——《占士邦007》電影系列，將劇情加入咗中國特色原素，同埋通俗嘅諷刺，造成好誇張嘅搞笑效果。喺片入面，周星馳將特工嘅形象嚟個大轉變，佢將占士邦呢啲好似無所不能同埋打極都唔死嘅超人形象通俗化：主角凌凌漆係一個叫雞（召妓女）冇錢畀，要賒數、週身爛撻撻、鍾意用咀角叼住支煙嘅市井之人，之不過呢個佢就刀法如神，力發千鈞，心地重幾善良，可以話集齊好色同英雄氣息喺身，極盡諷刺之能事；套戲唔單只玩殘外國特工嘅瀟灑形象，就連喺香港出嘥名嘅鬼才導演王家衛，佢拍嘅戲都避免唔到俾周星馳攞嚟玩番下。

另外，本片嘅劇情因為有對中國官兵嘅行為有啲「特別」嘅描寫，可能因為咁而俾中國大陸方面列咗做禁片，唔准喺大陸播放，而當香港嘅無綫電視翡翠台播呢套電影嗰時，大陸轉播嘅電視台會喺嗰段時間播其它電影或者旅遊節目。

周星馳喺片入面飾演一個叫凌凌漆嘅人，佢表面上係個豬肉佬，但其實亦係一個俾國家雪藏咗嘅過氣特工。今次因為有件被列為國寶級嘅恐龍頭骨俾個叫金鎗人嘅鐵皮怪客搶咗去，組織嘅高官就派咗阿漆去香港進行搶返恐龍頭骨嘅任務，但喺香港同佢接頭嘅女特工李香琴其實亦係金鎗人嘅手下，佢嘅任務就係要殺死阿漆，等國家冇辦法再搶返恐龍頭骨，於是令到阿漆執行任務嘅過程驚險重重，死裏逃生。雖然係咁，但係阿漆憑住佢準繩嘅飛刀絕技，同埋一把重量非凡兼鋒利無比嘅豬肉刀，消滅咗金鎗人同埋幫佢偷運國寶嘅組織，完成咗國家指派嘅任務之餘，過程中重感化咗阿琴呢個雙面女特工，最終抱得美人歸。

• 本片嘅英文片名「From Beijing With Love」，係影射《鐵金剛勇破間諜網》嘅英文片名「From Russia With Love」。
• 周星馳喺片中嘅某啲打扮同埋行為，相當程度係用嚟影射占士邦嘅造型。
• 主題音樂嘅舞步，參考自《鐵金剛勇破爆炸黨》（Octopussy）。

• 周星馳吹頭嗰段戲其實係模仿王家衛作品《阿飛正傳》入面梁朝偉梳頭嘅一段。
• 周星馳喺豬肉檔慢慢咁舉起一杯Dry Martini（馬天尼酒），而身邊人流急速穿梭嘅快慢對比鏡頭，明顯係影射王家衛作品《重慶森林》入面梁朝偉飲咖啡嘅一幕。
• 片中袁詠儀飾演嘅李香琴，影射喺粵語片時代成日飾演奸妃嘅資深演員李香琴。而佢媽媽叫做李香蘭，就用嚟影射第二次世界大戰期間，經常喺日本統戰電影扮演中國人嘅日本演員李香蘭。
• 周星馳喺片中哼唱張學友嘅名曲《李香蘭》，周星馳問袁詠儀鍾唔鍾意張學友嘅歌，話佢自己就鍾意，只不過鍾意嘅並唔係呢首歌。

• 羅家英飾演嘅「達聞西」，經常要提醒阿漆叫就要叫晒佢全名，唔好「聞西」前「聞西」後咁，係因為呢個詞嘅廣東話發音有影射幫女性口交，聞著個「屄」嘅意思。
• 超級武器霸王——「攞你命3000」，其實原來係當時一部低成本拍攝嘅鹹片。
• 片尾刀上的嘅題詞係「民族英雄——小平贈」，映射六四事件後鄧小平為解放軍戒嚴部隊嘅題字。
• 片中凌凌漆因為中彈而要喺無用麻醉藥嘅情況下做手術，佢模仿「關雲長下棋刮骨療傷」，而用鹹片來麻醉自己。嗰套鹹片係Traci Lords嘅Educating Mandy（中文名：春潮爛漫海棠紅）。

• （當阿漆擺緊豬肉檔嘅時候）

妓女：「你以為你暱嚮度就搵你唔到咩？無用呀！好似你啲咁出色嘅男人，無論嚮咩地方，都好似漆黑中嘅螢火蟲一樣，咁鮮明，咁出眾！你憂鬱嘅眼神，唏噓嘅鬚根，神乎奇技嘅刀法，同埋嗰杯Dry Martini，都徹底咁嘅將你出賣咗。雖然你係咁出色，但係行有行規，無論點你都要找埋尋晚嘅過夜數，叫雞唔使畀錢呀？」
阿漆：我重以為我哋嘅交往係建立嚮感情之上，估唔到原來只係一盤生意！
妓女：咁講感情都要畀錢㗎
阿漆：明白嘅，但呢排啲人都食齋，攞住抽豬肉頂住數先

• （阿漆同聞西俾中央徵召嘅時候）

聞西：（一路行一路問）阿漆，呢十年嚟你一直都喺度賣豬肉呀？
阿漆：唔係，只不過係一個唏噓嘅豬肉佬。
聞西：我又何嘗唔係一個坎坷嘅賣菜仔呢，好彩，我嚮中央精神病院嗰邊有一份兼職，做研究工作。
司令：做啲咩研究？
聞西：俾人研究。
司令：（點一點頭）唔錯！

• 呢個表面上係一個風筒，但係呢道有一層白金屬網膜，事實上，佢係一個鬚刨

• （阿漆俾阿琴嘅暗鎗射中，返到屋企後，阿漆叫阿琴幫佢喺大髀度攞返粒子彈出嚟嘅時候）

阿漆：古時有關雲長全神貫注捉象棋刮骨療毒，今日有我凌凌漆聚精會神睇鹹帶鑿骨攞彈頭。

• （當阿漆佢哋返到去總部決戰金鎗人嘅時候）

聞西：（扯開件外套）廢物？！我費咗一生嘅精力，集合十種殺人武器於一身嘅超級武器霸王，產品編號「攞你命3000」終於研究成功啦！阿漆！企遠啲，遠啲，再遠啲！
金鎗人：係咩？咁我真係想見識見識。
聞西：「攞你命3000」！！西瓜刀、單車鏈、火藥、硫酸、毒藥、手鎗、手榴彈、三角銼，每一樣都能夠獨當一面，而家集合埋一齊……問你怕未？

• 皇室堡
• 石崗軍營

• 凌凌漆：周星馳
• 李香琴：袁詠儀
• 達聞西：羅家英
• 鐵奶罩女殺手：陳寶蓮
• 鄭祖
• 尹德拉·里奇（Indra Leech）
• 黃錦江
• 凌凌義：于榮光

• 《國產凌凌漆》喺互聯網電影資料庫嘅資料（英文）
• 《國產凌凌漆》喺香港影庫嘅資料

• YouTube《國產凌凌漆》線上看