鍾江海(1916年—2000年10月2號)係香港同南洋嘅生意人,由於佢喺香港起過唔少樓,尤其集中起工廠大廈,所以有「工廈大王」嘅美譽。
1916年,鍾江海喺福建安溪出世,早年佢老豆派佢去上海做生意,後來又去咗星架坡。到咗50年代,鍾江海嚟咗香港發展地產生意,當中代表作就係喺尖沙咀嘅總統酒店,重有同霍英東等人夾份起嘅星光行。當期時,鍾江海成日都拍住細佬鍾明輝一齊去投地起樓,佢哋又比較集中起工廈,所以鍾江海就有「工廈大王」嘅美譽。
到1980年代頭,香港嘅地產市道因為前途問題而變差,當時揸重貨嘅鍾江海同鍾明輝負債好多,而另一個細佬鍾正文更加牽涉入去佳寧案入面,結果三人被迫將凱聯酒店嘅股票押畀銀行同拋貨套現。到1983年,一直密密掃貨,以鍾輝煌為首嘅二房成功喺股東大會踢走鍾江海同鍾明輝,得到凱聯嘅控制權。經過呢一件事之後,鍾江海有一排去咗台灣,到1988年返嚟香港。而佢重有華廈置業一間上市公司,但發展步伐好慢。
鍾江海到2000年過身,享壽84歲。喺佢死後,大房及二房就開始爭身家,兩房人更加向對方大鬧粗口,最後二房打贏官司,繼續成為遺產信託執行人同鍾江海生前送畀二太秦蘭鳳嘅公司股權。
鍾江海嘅老豆係鍾奕莊,佢係做珠寶學徒起家,後來長駐星架坡,喺當地有鴻福實業,阿媽係林配,鍾江海係兩人嘅嫡長子,鍾明輝、鍾正文係佢同父同母嘅親兄弟。
鍾江海有一妻一妾,大婆係林美,喺1977年2月過身;二房係秦蘭鳳。兩個老婆一共同佢生咗6個仔同10個女,其中一個女鍾寶珊就係前立法局議員梁錦濠嘅前妻,梁氏亦因為鍾江海同王德輝關係好好,繼而識到王氏,成為佢嘅契仔。
鍾江海個孫係電競公司老闆、香港網絡紅人鍾培生。
This article uses material from the Wikipedia 粵語 article 鍾江海, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.