鍾奕莊家族

家族奠基人鍾奕莊，又叫鍾銘選，1888年喺福建出世，畬族人，最初佢學做珠寶首飾，到1921年，佢去到星加坡做珠寶金飾生意，後來佢嘅生意王國擴張到福建、上海同香港。

戰後，鍾奕莊派咗佢年紀最大嘅幾個仔鍾江海、鍾明輝、鍾正文等喺香港做生意，自己就留守星加坡大本營。鍾奕莊喺星加坡嘅生意旗艦係鴻福機構，最知名嘅地標係國際廣場。

香港方面，鍾江海佢哋喺香港以地產、酒店為主，最為人所知嘅就係創立總統酒店，當時係香港最頂級嘅酒店之一，同時佢哋嘅公司華源置業喺港九各地都起咗唔少住宅，到1965年，佢哋同霍英東，以及一眾地產商成立香港地產建設商會，鍾明輝當時係會董。1965-67年，香港經歷一連串動盪，華源置業亦都受波及，好幾個樓盤都變咗爛尾樓，同章記樓宇發展嘅百嘉新邨就係例子之一。

1970年代，香港股票開始普及，鍾明輝同陳普芬等人合作成立九龍證券交易所（九龍會），第一隻喺九龍會上市嘅股票漢國置業就係鍾氏兄弟旗下嘅公司，全盛時期佢哋有好多間上市公司。喺地產方面，三兄弟各自有自己嘅公司，大佬鍾江海嘅怡華置業；二佬鍾明輝嘅益新置業；四佬鍾正文就有益大發展。鍾江海同鍾明輝因為成日一齊投地，所以佢哋兩間公司合稱「怡華益新」。怡華益新以工廈嘅發展最標青，港九新界都有地盤，鍾江海更加有「工廈大王」嘅美譽，70年代尾，怡華、益新重同新世界、恆隆等地產商合組財團標到幾個地鐵港島線嘅上蓋項目，更有富商形容「佢哋投地好似唔使錢噉」。

到咗1980年代，三兄弟嘅生意開始走下坡，受香港前途問題拖累，地產市道好差，早幾年鍾氏兄弟因為生意擴張得好快，結果周轉唔嚟，要變賣上市旗鑑凱聯酒店股權套現同押畀銀行，而細佬鍾正文重因為同佳寧集團嘅陳松青夾份做生意，後期佳寧案爆發，佢都被拖累。冇幾耐鍾正文嘅益大破產收場，生意失敗嘅佢最後重人間蒸發。與此同時，鍾奕莊三房嘅仔女就喺市場度吸納凱聯嘅股票，後嚟更加將大房嘅一干人踢出董事局，凱聯嘅控制權就由大房轉到三房。

1984年，鍾奕莊喺星架坡過身，總共有3個老婆、16個仔同12個女，星架坡嘅鴻福實業就留畀二房嘅人。

響一連串打擊下，鍾明輝同鍾江海都避走香港，走咗去台灣，幾年之後至返嚟。兩兄弟自此亦沉寂咗唔少。到2000年，鍾江海過身，元配一房人同二房秦蘭鳳就開始為咗遺產打官司，最後仍然係由二房繼承遺產。

近年嚟，家族因為第四代鍾培生嘅出位行為再次為人所知，鍾培生喺2013年成立電子競技公司，被視為香港頭一批推廣電競嘅人，同時佢都係一個YouTuber。佢喺網上成日講一啲出位嘢，重有好多花邊新聞。

2023年，鍾明輝以103歲高齡過身。

另外，鍾家一直都有捐助家鄉，多年嚟都為鄉下起醫院、學校、公路等等設施。

• 鍾奕莊=Lim, Kiam、林義、林配
  • 1鍾江海（Kiam，1916-2000）=林美、秦蘭鳳
    • 鍾進財
      • 鍾培杰
      • 鍾培源
    • 鍾寶珊=梁錦濠（離咗婚）
    • 鍾棋偉=龔素霞
    • 鍾仁偉=胡雪儀
      • 鍾培生
    • 鍾英偉=何國馨
  • 2鍾明輝（Kiam，1920-2023）=葉榮華
    • 鍾賢書
    • 鍾慧書
    • 鍾建書
  • 3鍾金科
  • 4鍾正文（Kiam）=白彩華
  • 5鍾金星=葉寶燈
  • 6鍾金獅
  • 7Cheong Kim Kow
  • 8Cheong Kim Seah （1939-2022）
  • 9鍾金榜（義，1942-）=朱薇瑾
  • 10鍾輝煌（配，1947-2022）=湯明露
  • 11鍾瓊林（配，1949-）=林育遜
  • 12鍾斌銓（義，1949-）=徐綺玲
  • 13鍾斌盛（義，1950-）=林碧珠
  • 14鍾烱輝（配，1953-）=巫惠惠
  • 15鍾燊南（配，1959-）
  • 16鍾燊榮（義，1960-）=劉麗娟
  • 鍾秀卿=林斌
  • 鍾麗卿=白勝利
  • 鍾錦卿（義）=陳篤漢
  • 鍾瑞卿（1952-）=陳子興
  • 鍾敏卿（配，1954）
  • 鍾惠卿（義，1952）
  • 鍾珮卿（義，1954）
  • 鍾瑜卿
  • 另外重有4個女