1984年夏季奧林匹克運動會
1984年夏季奧林匹克運動會係第23屆現代奧林匹克運動會，1984年7月28號到8月12號喺美國洛杉磯搞。
賽事焦點
- 1984年5月8號，由於蘇聯以「顧及選手安全」同埋「反對奧運會商業化」為理由，宣布缺席呢屆夏季奧運會，結果呢屆奧運畀18個國家（當中包括7個東歐社會主義國家：蘇聯、東德、捷克斯洛伐克、匈牙利人民共和國、保加利亞人民共和國、波蘭人民共和國、阿爾巴尼亞社會主義人民共和國，同埋古巴、也門民主人民共和國、伊朗、阿富汗民主共和國、蒙古人民共和國、北韓、老撾、越南、埃塞俄比亞、安哥拉、利比亞）抵制（之但係，伊朗、利比亞同埋阿爾巴尼亞係自願杯葛1984年奧運會嘅），作為對以美國為首嘅資本主義列國杯葛上一屆奧運嘅回應。（社會主義國家裡面，中華人民共和國、羅馬尼亞社會主義共和國、南斯拉夫社會主義聯邦共和國、索馬里民主共和國、貝寧人民共和國、剛果人民共和國同埋莫三鼻給人民共和國參加，呢啲國家同蘇聯關係唔係咁好）
- 中華人民共和國自1952年部分參加之後，呢屆終於可以全程參加夏季奧運會，而且，許海峰喺男子50米手槍慢射比賽入面打贏瑞典選手，重做埋中國史上頭一位奧運冠軍。
- 中華民國重返闊別咗三屆（1952、1976同埋1980年）嘅夏季奧運，第一次以「中華台北」嘅名義參加夏季奧運會。
- 喺開幕典禮裏面，中華人民共和國代表團同埋中華台北代表團入場時，背景音樂同樣係中國人民解放軍軍歌《三大紀律八項注意》（呢個旋律，中華台北方面叫做《國民革命軍軍歌》）。
- 喺男子60公斤級舉重比賽裡面，嚟自中國大陸同埋中華台北嘅選手（陳偉強同埋蔡溫義）分別攞到金牌同埋銅牌。
- 中國男子體操選手李寧攞到自由體操、鞍馬同埋吊環三項單項金牌，成為到目前為止，中國選手喺單屆奧運會入面攞到金牌數目最多嘅運動員（喺2008北京奧運裏面，中國選手鄒凱追平咗佢嘅三金記錄）。
- 美國嘅田徑運動員卡爾·劉易斯攞到男子100米、男子200米（刷新奧運會記錄）、男子跳遠同埋男子4乘100米接力跑（刷新世界記錄）4面金牌。
- 美國嘅女子體操運動員瑪莉·盧·雷頓打破咗東歐列強壟斷女子體操個人全能金牌嘅局面。
- 來自摩洛哥嘅納華爾·阿勒·慕達華基（Nawal El Moutawakel）贏得女子400米跨欄金牌，成為咗穆斯林國家同埋非洲國家裏面，第一個喺奧運會攞到金牌嘅女運動員。
- 女子馬拉松、韻律體操同埋韻律泳首次成為奧運會項目，網球同埋棒球做咗表演項目。
This article uses material from the Wikipedia 粵語 article 1984年夏季奧林匹克運動會, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈；可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.